Iliuusissatut pilersaarut naqinnernik ilisarinnissinnaannginnermut suliniarnermut nukittorsaassaaq

Naalakkersuisut naapertorlugit Kalaallit Nunaanni meeqqat, inuusuttut inersimasullu amerlavallaat ullumikkut naqinnernik ilisarinnissinnaannginnermut allatigullu atuarniarnikkut allanniarnikkullu ajornakusoorutinut pisariaqartumik ikiorserneqarneq ajorput.

Iliuusissatut pilersaarut nutaat, Ilinniartitaanermut Aqutsisoqarfimmi suliarineqartoq, immikkoortumi siunnerfeqarnerusumik suliniarnermik qulakkeerinnissasoq, Naalakkersuisut tusagassiuutinut nalunaarummi allapput.

Ilinniartitaanermut naalakkersuisoq Nivi Olsen (D) maanna unammilligassat passunneqarnissaanut siunnerfigissaartumik pilersaarummik peqalernera nuannaarutigalugu oqarpoq:

– Siusissukkut suliniuteqarnikkut, ikiorsiissutit eqqortut atornerisigut ilinniakkatigullu nukittuunik sulisoqarnikkut atuarfimmiinaanngitsoq, inuunerli tamakkerlugu annertuumik iluaqutsiisinnaavugut, taanna oqarpoq imalu nangippoq:

– Pilersaarutip immikkoortut tamaasa akimorlugit nukittunerusumik iliuuseqarnissamut pisussaaffilerpaatigut, taamaalillunilu arlaannaalluunniit takkuitsoorneqassanngilaq. Tamanna inuiaqatigiinnut naligiinnerusunut akuutitsinerusunullu, kikkut tamarmik anguniakkaminnik piviusunngortitsinissamut periarfissaqarfigisaanni, tamatumani ilinniagaqarneq kisiat pinnagu, inuuneralli tamakkerlugu alloriarneruvoq pingaarutilik, Nivi Olsen oqarpoq.

Naalakkersuisut naapertorlugit iliuusissatut pilersaarut suliniuteqarfinnut pingaarutilinnut ukununnga aallussivoq:

1. Misiligutit qulaajaassutillu kalaallisut oqaasertallit ineriartortinneqarnerat

2. Atuarnermut allannermullu sakkut digitaaliusut kalaallisut oqaasertallit atuutsilersinneqarnissaat

3.  Inatsisit piareersaaffigalugit suliniutit

4. Atuartitsisut siunnersuillu ilinniagaasigut qaffassarneqarnissaat.

Iliuusissatut pilersaarut Inatsisartut 2021-mi ukiaanerani ataatsimiinnermi aalajangernerisa malitsigisaanik pilerpoq. Aalajangernermut atortussiani taamanikkut Kalaallit Nunaanni naqinnernik ilisarinnissinnaanngitsut allanniarnikkullu ajornakusoorutillit pillugit ajornartorsiutit qanoq angitiginerannik paasissutissaateqartoqanngilaq, Naalakkersuisulli 2018-mi Kalaallit Nunaanni innuttaasut 5-10 procentii naqinnernik ilisarinnissinnaanngitsut missingerpaat.