Illersuisup unnerluutigineqartoq inuusuppallaarnerarpaa — unnerluussisullu angut navianaatilittut isigaa

Angut 19-inik ukiulik Nuummi marloriarluni toqutseriarsimasutut allatigullu unnerluutigineqartoq killilimmillu pillaatisinneqartariaqartoq, pitsaasumillu ineriartornissamut periarfissaqartoq, taassuma illersuisua Kirsten Birch, isumaqarpoq.

Taassuma Eqqartuussisoqarfik Sermersuumi inaarutaasumik suliaqarnermi arlaleriarluni erseqqissarpaa Nuussuarmi arnat inuusuttut pingasut biiliniittut marloriarluni timmiarsiummik seqqornermini 17-iinnarnik taanna ukioqartoq.

- Marloriarluni timmiarsiummik seqqorneq toqutseriarsimanermut uppernarsaataanngilaq. Sullitara toqutsinissamik siunertaqanngilaq, taamaammat navialisitsisimasutut eqqartuunneqassaaq, illersuisoq oqarpoq.

Unnerluutigineqartoq nassuerpoq biilinut seqqorsimalluni, taassumali nassuiaatigaa qunusaariniaannarluni taamaaliorsimalluni.

Aamma angut aallaasersortoq biilimut qanoq ungasitsiginersoq assigiinngitsunik isumaqarfigineqarpoq, tamannalu pisup ulorianarneranik nalilersuinermut sunniuteqarsinnaavoq.

Eqqartuussiviup toqutseriarsimasutut eqqartuunniaraluarpaguluunniit, tamanna angutip inuusuttup pineqartup pineqaatissinneqarnissaanut ingasattajaarnerusoq, illersuisup oqaatigaa.

AAMMA ATUARUK

Arnat inuusuttut biiliniillutik oqarasuaatitik isigaat — taava aallaaseqarluni takkuppoq

Unnerluussisup Andrias Kjølbrop illersuisup oqaasii upperinngilai, angutilli toqutseriarsimasutut eqqartuunneqarnissaa kissaatigalugu.

- Unnerluunneqartoq sioorasaariinnarsimasuuguni timmiarsiunni takutiinnarsimasinnaagaluarpaa silaannarmulluunniit seqqorsinnaasimagaluarpoq. Taamaaliunngilaq, sakkoq nalunngisani ulorianartoq atorlugu toqqaannartumik seqqorpoq. Soorunami toqusoqarsinnaanera takusinnaasimassavaa, Andrias Kjølbro oqarpoq.

Taamaattoqartillugu killiligaanngitsumik paarnaarussassanngortinneqarnissaanik kinguneqartariaqartoq unnerluussisussaatitaasoq isumaqarpoq, naak illersuisup inuusunnera pissutissarsiorfigigaluaraa:

- Angut inersimasoq matumani taama isiunngilaq, Kirsten Birch oqarpoq.

Parnaarussat allat ersiortut

Unnerluussisussaatitaasup killiligaanngitsumik tigummigallarneqarnissaminik naliliinermini, tarnikkut nappaatinik misissuisartut nalunaarutaat nakorsat eqqartuussinermi siunnersortaasartut naliliinerat tunngavilersuutigaa. Unnerluutigineqartup pissusaa isiginnittariaasialu pillugu ima naliliisoqarpoq.

Tarnikkut nappaatinik misissuisartut naliliineranni allassimavoq taanna isummamigut allaassuteqartoq imminullu pingaartittuusoq. Nalunaarut naapertorlugu pisinnaasani sinnerlugit imminut nalilertarpoq akisussaaffimmillu tigusiumaneq ajorluni. Pissusilersuutiminilu ajornartorsiutaasut nammineq takujuminaatsittarlugit.

- Parnaarussat allat ersigisimavaat, allassimavoq

Inuit allat inuunerannut, peqqissusaannut atugarissaarnissaannullu navianartorsiortitsisinnaavoq, isumaliortaatsikkut naliliinermi allassimavoq. Naliliinerullu tikkuarpaa, killiligaanngitsumik tigummineqarnissaa eqqarsaatigineqartariaqartoq.

Aammattaaq angut inuusuttoq taanna silassorissuusoq immaqalu ineriartornissamut periarfissaqartoq, pisariaqartumilli ikiorneqarumalluni akuersisariaqartoq, ersersinneqarpoq.

Aamma nakorsat eqqartuussinermi siunnersortaasartut naliliineri eqqartuussinermi oqaluuserineqarput.

- Nakorsat eqqartuussinermi siunnersortaasartut allassimanngilaat killiligaanngitsumik tigummigallarneqarnissap pisariaqarluinnarnera, oqarpulli pisariaqarsinnaasoq, Andrias Kjølbro oqarpoq.

Eqqartuussiveqarfik Sermersuumi unnerluutigineqartoq toqutseriarsimasutut pisuutinneqarpat, killiligaanngitsumillu tigummigallarneqarnissaa naleqqutinngitsutut nalilerneqarpat, unnerluussisussaatitaasup ukiuni arfinilinni pineqaatissinneqarsimasut inissiisarfianniittussanngortinnissaa piumasaraa.

Unnerluussissummi angutip 19-inik ukiullip toqutseriarsimanera pingaarnertut pineqarpoq. Aammali allarpassuarnik unnerluutigineqarpoq, ilaatigut ikiaroornartumik hashimik tigummiaqartutut, biilinik tillittutut, aserorterisutut, pisortat oqartussaanerannik kanngunarsaasimasutut, neriniartarfimmi tillinniartutut nakuusernerillu allat ilaatigullu Nuummi savimmik kapisisimasutut, tamatumanili pisuunnginnerarpoq.

Eqqartuussisut tunuartinnagit pisarneq malillugu unnerluutigineqartoq naggataamik oqaaseqarpoq.

- Ajuusaarutigaara, oqarpoq.

Eqqartuussineq pilersaarut malillugu pingasunngornermi ualikkut naammassissaaq.