Sarfaarunnerani qerisut aannissaat ernummatigineqartarlunilu upalungaarsimasut susinnaajunnaartarput. Illoqarfiilli pingaarnersaat qanoq eqqugaasinnaatigaa?
Nuummi juulip 15-ianni sarfaarunnikuunera illoqarfimmi inuussutissarsiortunut innuttaasullu toqqissisimanerannut qanoq sunniuteqarsimanersoq Sermitsiamiit misissorparput.
Qatserisartoqarfiup sarfaarunnera sekundialuinnaat malugaat. Ajornartoornermi sarfalersuut ingerlaannaq ikippoq.
- Ajutoortoqartillugu sarfalersuuterput ajunngitsumik ikippoq sekundialuillu qaangiummata qatserisarfik tamarmi sarfaqaleqqilluni. Sarfalersuuterput ajunnginnersoq qaammammut minnerpaamik ataaasiarluni illumik isumaginnittumiit misilittarneqartarpoq, upalungaarsimanermut pisortaq Jens Mikkelsen Sermitsiamut allakkatigut akissuteqarluni allappoq.
Illoqarfik qamittooraangat naneruutisimaartut amerlisarput, tamannalu ikuallattoortoqarsinnaaneranik kinguneqarsinnaanera annertunerulersarluni. Juulilli 15-iani taamaattoqanngilaq.
- Soorunami innuttaasut naneruusisimaaraangata ikuallattoortoqarsinnaaneq ilimanaateqarnerulertarpoq, taamaattoqarneranilli kalerrisaarisoqanngilaq innuttaasullu suut ikitersimanerlugit eqqummaariffigalugit, Jens Mikkelsen allappoq.
Illoqarfiup ikuallattoqartillugu kalerrisaarutai (ABA-t) sarfaarunnerami qamikkaluartut upalungaarsimasut piareersimanerannut kalluaanngilaq. Ajutoortoqartillugu sarfalersuutit ajunngitsumik ikipput.
- ABA-nik qamitoqqanngilaq, ABA-llu tamarmik UPS-imik atortorissaaruteqaramik piffissap aalajangersimasumi ikumasinnaapput. Kalerrisaarut ataaseq ajoquteqarmat illumi akisussaasoq ingrlaannaq paasitinneqarpoq, upalungaarsimanermut pisortaq allappoq.
Politiit upalungaarsimanerat ajunngitsumik pivoq Kalaallit Nunaanni Politiit toqqissisimatitsinissamik, eqqissisimasoqarnissaanik ajortoqannginnissaanillu isumaginnittuupput, pinerluttoqarsimatillugu paasiniaasarlutik kiisalu allaffissornikkut suliaqartorlutik, soorlu akuersissutinik tunniussinernut tunngasunik. Sarfaaruttoqarnerani assigiinngitsut unitsineqartaraluartut inuiaqatigiinni pingaarutilinnik suliaqartut suliaminnik ingerlassinnartussaapput.
Politiit ajutoortoqartillugu sarfalersuuteqaramik sarfaaruttoornerup nalaani sulinertik ingerlatiinnarpaat, aamma oqarasuaat pingaarneq allamut nuunneqarluni.
Assi: Oscar Scott Carl
Juulip 15-ianni nalunaaquttap akunnerini arlalinni sarfaqannginnerani oqarasuaatitigut attaveqaatit sivikitsumik ajutoorput, taamaakkaluartoq innuttaasunut attaveqarsinnaaneq periarfissaaginnarluni. Politiit ajornartoornermi atortorissaarutaat pilersaarutit malillugit aallartipput, politeeqarfiullu ajornartoornermi sarfalersuutai qamittooqqanerup nalaani akornuteqanngitsumik ikillutik.
– Politeeqarfik sarfaaruttoqartillugu, politiit suliinnarnissaat qulakkeerniarlugu, ajutoortoqarnerani sarfalersuuteqarput.
- Akunnerit pingasut minutsillu 30-it missaanni sarfalersuut qaminngavoq, nalunaaqutaq 10.30-p missaani oqarasuaatikkut attaveqaat 70 14 48 sivikitsuinnarmik ajutoorpoq. Politiit normuat pingaarnerpaaq pisariaqartitsiffiusumut oqarasuaatitsinnut nuussinnaanngorlugu aaqqinneqarpoq, taamaalilluni innuttaasut tamarmik suli attaveqarsinnaallutik. Tamanna ajornanngitsumik pivoq, politiit allaffeqarfianniit Julie Elmelund oqarpoq.
Sarfaarunnerup nalaani politiinut nalunaaruteqartut amerlanissaannik aarlerineq piviusunngunngilaq. Politeeqarfiup iluani suliassat, pigaartullu immikkoortortaqarfiani pisut taamaallaat pisarissersuutaalaarput.
- Nalunaaruteqartoqanngilaq allatigulluunniit suliassaqarnerulertoqarani. Sarfaaruteqarnerup nalaani pigaartut immikkortoqarfianni sulisunut pisortamullu taamaallaat suliassaqartitsinerulaaleraluarpoq. Innuttaasuniilli sarfaaruttoqarnera pissutaalluni arlaannik pisoqarneranik saaffiginnittoqanngilaq, Julie Elmelund allappoq.
Politiit sarfaarunnerup nalaani sapinngisamik toqqaannarnerpaamik attaveqartoqarsinnaanera qulakkeerpaat.
- Nuummi sarfaaruttoqarnerata nalaani politiit biilii illoqarfimmi angalaarusaarput, taamaalilluni politiit biilii takuneqarsinnaallutillu politiit attavigineqarsinnaallutik, Julie Elmelund allappoq.
Nuummi oqartussaasut sarfaaruteqqanerup nalaani qanimut suleqatigiipput, politiillu illoqarfiit pingaarnersaanni oqartussaasut pingaarutillit attaveqarfigiinnaavillugit.
- Nukissiorfiit, qatserisartut, napparsimmavik Issittumilu Sakkutooqarfik akuttunngitsumik attaveqarfigineqaqattaarput, Julie Elmelund oqarpoq.
Inuussutissarsiortunut minutsit akisuut Sarfaarunneq niuertarfinni aamma malugineqarsinnaavoq, tassani sulisunut pinianullu unammilligassaqarpoq. Brugsenip sillimaniarneq pissutigalugu matugallartariaqarnerani annaasaqaataasut naatsorsorneqartarput.
- Sarfaaruttoqaraangat pisiniarfitsinni pisiniat aneqqusariaqartarpagut, tamannalu kaaviiaartitanik annaasaqarnermik kinguneqartarluni. Sulisugullu pisiniarfitsinniillutik nakkutilliisarlutik, KNB-imi attaveqaqatigiinnermi suliaqartoq Ellen Schärfe allappoq.
Illoqarfimmi niuertarfinni innaallagiaarunneq qinngarnaqqaalaariarluni ulluinnarni ingerlatsinermut unittoortitsivoq. Neriniartarfimmi Siam Orchidimi iffiorfik, akiliisarfik qulliillu qamimmata sulisut neriartoqqasunut qanoq aaqqiissanerlutik eqqarsaatigipallattariaqalerpaat.
- Siam Orchid ajutoornermi sarfalersuuteqanngilaq. Sarfaarummat atortorissaaritit innallagiartortut tamarmik qamipput. Sulisut neriartortunut pisoq pillugu paasissutissiillutillu eqqissisimasumik iliuuseqarniarput. Neriartortut neriniartarfimmiittut ammaannarsinnaanitta nalilerniarnerani ingillutik issiaannartariaqarput. Inniminniisoqarsinnaajunnaarallarpoq, nalinginnaasumimmi sullissisinnaajunnaarallaratta, Siam Orchidimiit Sermitsiamut paasissutissiipput.
Sarfaaruttoqartillugu neriniartarfinni qulliit qamiinnarneq ajorput, taakkua pingaarnertut suliffiat ajornartoorfiusinnaasarpoq - igaffik. Nillataartitsiviit silaannarissarfiillu atorsinnaajunnaarnerat ingerlatsinermut eqqiluisaarnermullu kinguneqarsinnaasarput.
- Igaffipput eqqungaanerpaasarpoq, tassanimi atortuvut amerlanerpaat innaallagiatortuupput. Naak ataasiakkaat innaallagiaqarata suliarisinnaagaluarlugit sarfaqartigata nerianiartarfittut ingerlasinnaanngilagut. Silaannarissarfik, nillataartitsivik, qerititsivik igaffimmilu atortut qamittarput, taamaattoqaraangallu pitsaasumik tunisassiorsinnaasanngilagut, Siam Orchidimiit nassuiaapput.
Nerisassat nutaat qerisullu annaaneqarsinnaanerat Neriniartarfinni akunnialuinnarni sarfaaruteqqaneq annertunngitsumik pisarissersuutaasaraluartoq sivisunerusumik sarfaaruteqqaneq aningaasarpassuarnik annaasaqarfiusinnaasarpoq. Nerisassaasiviup eqqungaaratarsinnaanera aarlerinarnerpaasarpoq.
- Nerisassat nutaat qerisullu annaaneqarsinnaapput. Sivikitsumik sarfaaruteqqaneq kissassuseq allanngorartuutinnagu nalinginnaasumik anigorneqarsinnaavoq, sivisunerusumilli sarfaqannginneq neriniartarfimmut uagutsitut ittumut aningaasatigut annaasaqaataasinnaavoq. Nerisassaaterpassuaqarpugut akisuunik, soorlu aalisakkat, qaleruallit, neqit nerisassallu allat tikisitat aalajangersimasumik nillataartinneqartussat, Siam Orchidimiit allapput.
Sarfaaruttoqartillugu inuussutissarsiortut minutsit aningaasatigut annaasaqaataasut naatsorsortarpaat. Siam Orchidimi sarfaarunneq ataaseq aningaasatigut malunnaatilimmik malugineqartartoq, neriniartarfimmiit paasissutissiipput.
- Siam Orchidimi akunnermi ataatsimi sarfaaruteqqaneq, ullormi nalunaaqutap qassinngornera apeqqutaalluni, 5.000 koruunit 10.000 koruunillu akornanni akeqarsinnaavoq.
- Aningaasanik kaaviiartitaniit annaasaqaataaginnanngilaq, aammali inniminniinerit taamaatiinnarneqartarput, sulisut piffissaajaatigisarpaat, nerisassat asiusinnaallutik kiisalu assartuineq pilersaarusiornerlu kalluarneqarsinnaasarlutik, neriniartarfimmiit allapput.
Suliffeqarferujussuit kulturilerisullu eqqugaasarnerat Sarfaaruttoorneq neriniartarfinnut niuertarfinnullu kisimi eqquineq ajorpoq. Suliffeqarfissuit tunisassiorfiillu aamma unittoortarput.
Royal Greenlandimi assartuineq sarfaaruttoqartillugu tamarmi eqqorneqartarpoq – tunitsivinni tunisinerniit qerititsivinniittunut.
- Nuummi sarfaaruttoqarnerani tunisassiorneq unitsikkallarneqarpoq. Tunisassiornermi atortut, aalisakkanik tigooraaviit, kranit tunisassianullu naammassisunut qerititsiviit sarfartortuupput, Royal Greenlandimi attaveqaqatigiinnermut siunnersorti Heidi Møller Isaksen allappoq.
Suliffeqarfiit mikinerit ingerlatsiniarnerminni ingerlaannaq ajornakusuulersinnaasaraluartut nunatsinni suliffissuaqarfiit annersaasa ilaat sarfaaruttoornermi upalungaarsimanermut pilersaaruteqarpoq. Royal Greenlandimi tunisassiorneq unittooqqunagu isumaginninneq ingerlaannaq aallartinneqartarpoq.
- Royal Greenland sarfaaruttoqarnissaanut upalungaarsimanermut pilersaaruteqarpoq. Pisut qanimut malinnaaffigalugit Nukissiorfiit attaveqarfigaarput. Aamma sarfaneqqinnissaanut sannavik ikititereqqinnissamut piareersimasarpoq.
- Sarfaarunnera ingerlatsinermut tunitsivinnullu sunniuteqarsinnaavoq. Royal Greenlandimi pissutsinut naleqqussartuaannarpugut, tunisassiorneq atortullu aallarteqqinnissaat pingaarnersiortarlugu, Heidi Møller Isaksen allappoq.
Kulturip illorsuani Katuami ajutoornermi sarfalersuut nalinginnaasumik ingerlatsinissamut naammanngitsoq ingerlaannaq paasineqarpoq. Ikuallattoqarnerani qimmaaffissat ingerlaannaq ikikkaluartut illumi IT-mik atortorissaarutit tamarmik qamipput.
- Katuami ajutoornermi sarfalersuut qulliit anisarfinnut tikkuussisunut taamaallaat atuuppoq. Qarasaasiat, billetsinut tuniniaanermut atortoq, inniminniisarfik kaffisorniartarfitsinnilu atortut tamarmik atorneqarsinnaajunnaartarput, Katuamiit Ruth Sermitsiamut akissuteqarluni allappoq.
Sermitsiap suliffeqarfiit inuussutissarsiortullu arlallit sarfaaruttoqartillugu qanoq sunnerneqartarnersut paasiniarlugu saaffigai, aallaserisalli suliarineqarnerata naammasinnerani taakku akissuteqanngillat.
