Danmarkimi imminut toquttartut ikinnerulersut

 Danskit ikinnerusut imminut toqunnikkut inuunertik naasaraat, Center for Selvmordsforskningip kisitsisaataasa takutippaat.

2025-mi Danmarkimi imminut toquttut 502-t nalunaarsorneqarput taakkulu angutinut 370-nut arnanullu 132-nut 15-t sinnerlugit ukiulinnut agguataarsimapput.

Taakku ukiup siulianit 91-nik ikinnerupput, ukiunilu 2015-p 2025-llu tungaanut aatsaat taama ikitsigalutik.

Iliuusissatut pilersaarut 2024-meersoq imminut toquttarnernik imminullu toqoriartarnernik pinaveersimatitsisussaq, pitsaasumik ineriartornermut patsisaasunut ilaasoq, Centerimi ilisimatusartut pisortaat Erik Christiansen oqarpoq.

Imminut toquttarnerup paquminarunnaarnera patsisit ilagaat.

- Siornatigut imminut toquttarnerup oqaluuserinera navianartoq eqqarsartoqartarpoq, tamannami allanik isumassarsisitsisinnaammat. Ullumikkulli taama eqqarsariaatsip kukkusuunera nalunngilarput, tamannalu amerlanerit eqqummaariffigaat.

- Assersuutigalugu nakorsat nakorsiartitsisartut. Taakku toqqaannartumik aperisarnerisigut ikiorsiineq siusinnerusukkut aallartinneqarsinnaasarpoq,  Erik Christiansen oqarpoq.

Taamattaaq nakorsaanerup  professorillu Merete Nordentoftip suliniutit tamarmik ataatsimut sunniutaat tikkuarpaa.

Taanna Rådet for Selvmordsforebyggelsimi ilaasortaavoq, taakkulu iliuusissatut pilersaarummi suliniutit arfineq pingasut atulersinneqarnerat malinnaaffigissavaat.

- Pissutsit ajunngitsup tungaanut ingerlapput, tamannalu ilaatigut imminut toqunnissamut ulorianartorsiortut ikiorneqartarnerisa ajornannginnerulernerannik patsiseqarpoq, Merete Nordentoft oqarpoq.

Assersuutigalugu imminut toqunnissamut pinaveersaartitsinermi nakorsiartarfiit regionini tallimaniittut aningaasaliissutitigut amerlisaavigineqarput, taamaalillutik inunnik imminnut toqunnissamut eqqarsaateqartunik, imminulluunniit toqoriaraluarsimasunik amerlanerusunik oqaloqatiginninnissamik neqerooruteqarsinnaanngorlutik.