Mette Frederiksenip Trumpi naapissagaa: Attaveqarfigilluarpara

Ministeriunerup Mette Frederiksenip sapaatip akunnerata tulliani USA-p præsidentianik naapitsinnissani sapaammi uppernarsarpaa.

Tassanilu Kalaallit Nunaata, Danmarkip USA-llu akornanni suleqatigiinnissamik isumaqatigiissut, Naalagaaffiit Peqatigiit Ataatsimeersuarnerannut atatillugu New Yorkimi atsiorneqassaaq.

- Amerikamiut præsidentiannut attaveqarfiginnilluarpunga.

- Nunarsuarmi eqqissiviilliorfiusumi isumaqatigiissut una isumannaatsuunitsinnut pitsaasuusoq isumaqarpunga, Mette Frederiksen New Yorkimut aallarnissani sioqqullugu TV 2-mut oqarpoq.

Mette Frederiksenip Donald Trumpillu akornanni attaveqatigiinneq - tamanit ilisimaneqartut malillugit - siorna januaarip 15-ianili Amerikamiut præsidentiannik kingullermik oqaloqateqarneranit pitsaanerunngillat.

Taamanikkut Donald Trumpip qaammatip siuliani Kalaallit Nunaata Amerikamiunit pigineqarlernissaanik kissaateqarnerminik oqarnerata kingorna, Mette Frederiksen Donald Trumpilu oqarasuaatikkut oqaloqatigiipput.

Kingornalu ilaatigut nunanut allanut ministeri Lars Løkke Rasmussen (M) danskit USA-mik attaveqarnerannik isumaginnittuuvoq.

Ukioq manna januaarip qaammataani Lars Løkke Rasmussen taamanikkut nunatta nunanut allanut naalakkersuisua Vivian Motzfeldt peqatigalugu Washington D.C.-miippoq.

Tassani ilaatigut USA-p vicepræsidentia J.D. Vance USA-llu nunanut allanut ministeria Marco Rubio ataatsimeeqatigaat.

Ataatsimiinnerup malitsigisaanik suleqatigiissitamik pilersitsisoqarpoq, taakkulu sulinerat aamma suleqatigiinnissamik isumaqatigiissutissamik inerneqarpoq.

- Ullualuit qaangiuppata aatsaat isumaqatigiissuteqalersimassaaagut, taamanikkussamullu imarisaa pillugu aatsaat oqaaseqassaanga, Mette Frederiksen oqarpoq.

Donald Trumpip isumaqatigiissummik malinninnissaa naatsorsuutigineraa, aperineqarpoq.

Kikkut tamarmik taamaaliorumaarnerat naatsorsuutigaara. Assigiinngitsunut tunngatillugu immitsinnik isumaqatigiissuteqartarnerput sungiusimavarput, Mette Frederiksen TV 2 Newsimut oqarpoq.