Nalunaaquttap aalajangersarneqarnera pillugu Inatsisartuni suliarineqarnissaata kinguartinneqartarnera tupaallaataavallaarunnarsisimassagaluarpoq. Taamaakkaluartoq oqallisissap aappassaaneerneqarnissaa pingajussaaneerneqarnissaalu ukiaanerani ataatsimiinnermut kinguartinneqartoq pingasunngorma paasinarsimmat Naleqqamiit Siumumiillu tupaallaatigineqarpoq.
Partiit immikkut tusagassiuutitigut nalunaaruteqarlutik allapput.
Nalunaaquttap aalajangersarneqarnera pillugu Inatsisartuni suliarineqarnissaata kinguartinneqartarnera tupaallaataavallaarunnarsisimassagaluarpoq. Taamaakkaluartoq oqallisissap aappassaaneerneqarnissaa pingajussaaneerneqarnissaalu ukiaanerani ataatsimiinnermut kinguartinneqartoq pingasunngorma paasinarsimmat Naleqqamiit Siumumiillu tupaallaatigineqarpoq.
NUNATSINNI NALUNAAQUTTAT INGERLAAQATIGIIFFII
Kalaallit Nunaanni nalunaaquttap ingerlaaqatigiiffii assigiinngitsut pingasuupput.
Nunap annersaani UTC-2-uvoq.
Pituffimmi sakkutooqarfik Amerikap kangiata nalunaaqutaa malillugu UTC -4-miippoq.
Tunumi Nationalparkimi silasiorfik Danmarkshavn UTC +0-miippoq.
Kitaani Tunumilu nalunaaquttap ingerlaaqatigiiffia UTC -3-mit UTC -2-mut 2023-mi oktobarimi allanngortinneqarpoq.
Ittoqqortoormiit 2024-mi marsimi UTC-1-imit UTC-2-mut aamma nuuppoq.
Danmarkshavni Pituffillu Space Baselu kisimik pinnatik nunap sinnerani aasaanerani nalunaaqutaq atorneqarpoq.
Partiit immikkut tusagassiuutitigut nalunaaruteqarlutik allapput.
Partiit taakkua marluk naalakkersuisooqatigiit aalajangiisinnaanngissuseqarnerat kamaatigaat.
- Partiit aasaanerani nalunaaqutaq atorunnaarsinniarlugu UTC-3-mullu uternissamik innuttaasut kissaataannik tapersersuissappata, tamanna akuersissutiginiarlissuk. Akerlianilli isumaqarunik akerliullutik taasiniarlik, kinguartitsinerpassuit akornanni toqqorterunnaarniarlik, Naleraq allappoq.
- Siumumiit Inatsisartut aalajangiinissamik kinguartitsisaqattaarnerat aaliangiisinnaassuseqannginnermik aammalu innuttaasunik tusaajumajunnaarnermik ersersitsisutut isigaarput, aalajangiiniaaluusaarnerummi innuttaasorpassuit, inunnik innarluutilinnik meerallit, inuussutissarsiuteqartullu imaannaanngitsumik sunneqqavai, Siumut allappoq.
Siumup Naleqqallu inatsisissatut siunnersuutaat, Kalaallit Nunaanni nalunaaquttap ingerlaarfianut uterteqqiinissamut aasaaneranilu nalunaaquttap atorunnaarsinneqarnissaanut tunngasoq, 2025-mi ukiaanerani ataatsimiinnermi siullermeerneqarpoq. Taamanimiilli aappassaaneerneqarnissaa arlaleriarluni kinguartinneqartarpoq.
Tamannalu ajornartorsiutaasoq ilungersunartoq Naleqqami siulittaasoq oqarpoq.
- Qinigaaffinni arlalinni apeqqutit saqqummiunneqareersimagaangata amerlanerussuteqartullu suli aalajangiiumanngikkaangata politikkikkut kinguarsaarneruvoq, Pele Broberg tusagassiuutitigut nalunaarummi allappoq.
Aappassaaneerneqarnerat unitsinneqartoq
Inatsisissatut siunnersuutit aappassaaneerneqarnerat maajip tallimaani aallartippoq. Inatsisinut ataatsimiititaliap oqallinnissaq sioqqullugu piffissaq atorneqartoq allanngortinneqarani aasaanerani nalunaaqutaq atorunnaarsinneqassasoq kaammattuutigaa.
Naalakkersuisut kaammattuutigineqartoq malillugu aasaanerani nalunaaquttap 2028-mi januaarip aallaqqaataaniit atorunnaarsinnialersaaraat, naalakkersuisut siulittaasuata Jens-Frederik Nielsenip (D) oqaluttarfimmi oqaatigaa.
Kinguninnguali Inatsisinut Ataatsimiititaliami ilaasortap Bo Martinsenip (D) immikkoortut ataatsimiititaliamut uterteqqillugit suliarineqaqqinnissaat siunnersuutigimmagu aappassaaneerneqarnera unitsinneqarpoq.
Naleraq amerlanerussuteqartut tusarnaarlutik isummaminnik allannguinissamik neriuuteqalersitsisoq allappoq. Oqallisigineqarnissaasa kinguarteqqinneqarnissaasa tungaanut.
- Ataatsimiititaliami amerlanerussuteqartut, tassa Demokraatit, Inuit Ataqatigiit aamma Atassut, oqaluuserisassat ukiakkut ataatsimiinnermut kinguartinniarnerat isumaqatiginngilluinnarpara, Inatsisinut ataatsimiititaliami ilaasortaq Kuno Fencker (N) oqarpoq.
Seqernup nuiasarnerata kingusinnera meeqqat sinittarnerannut aalisartullu piniartullu sulinerannut sunniuteqarmat, amerlasuut nalunaaquttap ingerlaaqatigiiffitoqaanut utertitsisoqarnissaa kissaatigaat.
- Inatsisartut innuttaasut tusarnaartariaqarpai imaluunniit aalajangiinini aalajangiusimassallugu aamma suliap kinguartinneqarnissaa pinngitsoortariaqarpoq naalakkersuisooqatigiit partiiisa akornanni pissaanermik iluani unammilleqatigiinnerit pilersillugit, Naleraq allappoq.
Air Greenlandip tunngavilersuutigineqarnera eqqortuua?
Nalunaaquttap ingerlaarfiata maanna atuuttup – Kalaallit Nunaata 2023-mi atuligaa – attatiinnarneqarnissaanik inuussutissarsiortut eqqarsaatigineqarnerat pingaarnertut tunngavilersuutigineqarpoq. Air Greenland taakku ilagaat, taakkumi Danmarkiminngaanniit akunnernik pingasunik nikinganeq timmisartumik angalassinermut iluaqutaanera erseqqissaatiginikuuaat.
Siumulli naalakkersuisooqatigiit Air Greenlandip aningaasaqarneranik tunngavilersuinerat upperinngilaat.
Taakkua Air Greenlandip aningaasaqarnera 2023-mi nalunaaquttap allanngortinneqarneraniilli pitsanngoriarsimanngitsoq – aamma bilitsit akii apparsimanngitsut – innersuussutigaat.
- Taamaattumik Siumumiit qanoq aalajangernissaq nalornissutaanngilluinnarparput illuatungaanilu inuiaqatigiit paasisariaqarpaat Naalakkersuisooqatigiit inatsisartuni ilaasortaatitai aaliangiisinnaanngitsutut inisseqqanerat, kinguarsaaleqqanerallu ersarissigaluttuinnartoq isumaqarpugut. Imaluunniit tamanna Naalakkersuisooqatigiit avissaartuussimanerannik ersiutaanerpoq? Siumut allappoq.
Air Greenland 2025-mi Atlantikoq qulaallugu timmisartuussinermi kaaviiaartitaqarnerulersimanera, ilaatigut nalunaaquttap ingerlaarfiata allanngortinneqarnerata kingorna Jet Time atorlugu angallassisinnaalertoqarnera pissutigalugu, Air Greenlandip pisortaanerata Jacob Nitter Sørensenip Sermitsiamiit siorna apersorneqarnermini oqaatigaa.
Naleraq assigalugu Siumup naalakkersuisooqatigiit innuttaasut kissaataannut tusarnaaqqullugit aaqqiissutissamillu nassaaqqullugit kajumissaarpai.
Suliaq qanoq inerneqarumaarnersoq – neriulluta – ukiaru paasinarsissaaq.
