Meeraq iterpoq qissaserlunilu. Alla pinngussat eqqaanni tuppallersarneqartariaqarpoq.
Piffissami tassani aamma nangilersuisoqartariaqarlunilu, kakkissisoqartariaqarlunilu, nerisitsisoqartariaqarlunilu meeqqat sinneri eqqissitinneqartariaqarput. Tamakku pinerini meeraq kisimiilluni issialluni takuneqarnissaminut utaqqivoq.
Meeraq iterpoq qissaserlunilu. Alla pinngussat eqqaanni tuppallersarneqartariaqarpoq.
Piffissami tassani aamma nangilersuisoqartariaqarlunilu, kakkissisoqartariaqarlunilu, nerisitsisoqartariaqarlunilu meeqqat sinneri eqqissitinneqartariaqarput. Tamakku pinerini meeraq kisimiilluni issialluni takuneqarnissaminut utaqqivoq.
Nuummi meeqqerivimmi Soralumi ullaap tungaa nalinginnaasoq taamaassinnaavoq, Hansine Kristensen, meeqqerivimmik aqutsisoq oqaluttuarpoq.
PERORSAASUT AMIGAATAANERAT
Kalaallit Nunaanni perorsaasunut atorfiit 381-iusut affaangajaat, tassa 169-it, inuttassaqartinneqanngitsut, NISK-ip (siornatigut NPK) nalunaarusiaani maajimi 2023-mi saqqummersumi atuarneqarsinnaavoq. Kisitsisinik nutaanerusunik soqanngilaq.
Perorsaasunut atorfiit nuna tamakkerlugu inuttassarsiuunneqartut katillugit 79-iusut, taakkunannga 64-it meeqqerivinniittut, Sermitsiami 2026-mi maajip sisamaani saqqummersumi allaaserineqarpoq.
Meeqqerivimmi inimi ataatsimi sulisut pingasuunissaat maanna nalinginnaavoq, tassa meeraaqqerivimmiittut aqqaneq-marluk imaluunniit meeqqerivinniittut 20-t taakkunannga paaqqutarineqartarput. Sulisut pingasuniit sisamanut amerlinissaat Inatsisartut apriilip 29-ani akuersissutigaat.
Meeqqat meeqqerivinniittut minnerpaamik amerlassusissaat pillugit siunnersuut Inatsisartut akueraat. Naalakkersuisullu periarfissat sukumiinerusumik maanna misissussavaat.
Inatsisartunut ilaasortaq Pipaluk Olsen (D) siunnersuuteqartuuvoq, paaqqinnittarfinnimi pissutsinut politikkikkut akisussaaffeqarnerulernissamut piffissanngortoq taanna isumaqarpoq.
- Sulinermi atugassarititanik allanngorannginnerusunik pilersitsinissamut, paaqqinnittarfiit iluini eqaannerusumik periarfissaqalersitsinissamut, tassanngaannartumillu paarlatseqarnissamik pisariaqartitsinnginnerunissamut, inimi ataatsimi atorfiit akuerisaasut minnerpaamik sisamanngortinneqarnerat sakkussaasinnaavoq pingaarutilik, taanna siunnersuutimini allappoq.
Siunnersuut meeqqerivinni “Soralummi” “Uilumilu” aqutsisunit, perorsaasut suliassaqarpallaarnerat pillugu sivisuumik oqariartuuteqartarsimasunit, iluarineqarpoq.
Meeqqat ulapaarneq malugisaraat
Soralummi pisortaq Hansine Kristensen naapertorlugu ulapittarneq kisimi pinnani aammali isumassuinerup pitsaassusia unammillernarpoq. Napparsimanerit, sulinngiffeqarnerit atorfiilluunniit inuttaqannginneri pissutigalugit sulisussaaleqiffiusuni sulisut meeqqanut tunngatillugu pingaarnersiuisariaqartarput.
- Meeqqat ataasiakkaat piffissaqarfiginissaat peqatiginissaallu pineqarpoq. Meeqqat ukiumi siullermi inuuneranni tunngavileeqataavugut. Taamaammat siunnersuut tapersersortorujussuuara, Hansine Kristensen oqarpoq.
Hansine Kristensen, Soralumi aqutsisoq.
Assi: Oscar Scott Carl
Inimi ataatsimi ilinniarsimasunik pingasunik sulisoqarsinnaasoq siunnersuivoq.
- Sulisut sisamassaappata taakkunannga pingasut ilinniagaqarsimasuullutillu ataaseq ikiortiussasoq siunnersuutigaara. Meeqqat ineriartornerat – timikkut tarnikkullu – kiisalu pilersaarusiorneq perorsaanermilu aaqqissuussineq ilinniarsimanermut ilaammata taamatut siunnersuivunga, taanna oqarpoq.
Ane Kuitsep, meeqqerivimmi Uilumi aqutsisup, siunnersuut tapersersorpaa, tassami siunnersuut sulisut ulluinnarni angummanniaannarunnaarnissaannut qulakkeerinneqataassaaq.
- Meeqqat ajunngitsunik atugassaqartikkumavagut, assaalli kissalaartut amigaataagaangata tamanna arlaatigut kinguneqartarpoq. Assersuutigalugu meeqqat mikisut pisariaqartitaminnik suli oqaasertalersinnaanngitsut soqutigineqannginnertik pissutigalugu meeqqanik allanik kiinninniartalersinnaapput, taanna oqarpoq.
Meeqqerivimmi suliassat aqagumut kinguartinneqarsinnaanngitsut erseqqissarpaa. Tassami meeqqat pisariaqartitaat allaffissornermut sanilliullugit maannakkorpiaq tunniunneqartariaqarput.
- Sulinerput aqagumut utaqqisinneqarsinnaalluni allaffissornerunngilaq. Meeqqalli taakkulu maannakkorpiaq atugarissaarnissaat pillugu sulineruvoq, Ane Kuitse oqarpoq.
Taanna naapertorlugu sulisorissaarneruneq meeqqanut iluaqutaaginnanngillat, aammali perorsaasunik atorfinitsitsinissamut sulisitsisunillu attassiinnarnissamut iluaqutaasinnaavoq.
- Inuppassuit meeqqanik sullisserusuttarput, kisianni suliap tatisinera pissutigalugu taamaaliornissaminnut tunuarsimaarsinnaapput, taanna oqarpoq.
Meeqqerivinni perorsaasunik atorfinitsitsinissaq taakkuninngalu attassiinnarnissaq unamminiarnartuusinnaasoq Ane Kuitsep erseqqissarpaa. Taanna naapertorlugu aningaasarsiat tamatumunnga qitiusumik attuumassuteqarput.
- Aningaasarsiat pissutaapput, taanna oqarpoq.
Meeqqerivinni atukkat pitsanngorsarneqarsinnaaniassammata maanna iliuuseqartoqartariaqartoq Ane Kuitse (saamerleq) aamma Hansine Kristensen (talerperleq) isumaqarput.
Assi: Oscar Scott Carl.
SERMERSOOQ ERSEQQISSUMIK AKISSUTEQANNGITSOQ
Amerlanerusunik sulisoqarnissamut aningaasat sumit pissarsiarineqarsinnaanersut Kommuneqarfik Sermersuumi borgmesterip tullia aamma Meeqqanut, Ilaqutariinnut Ilinniartitaanermullu Ataatsimiititami siulittaasup Poul Petersenip (D) erseqqissumik akinngilaa. Aningaasaatit allatut pingaarnersiuilluni atorneqarsinnaasut taarsiullugu oqaatigaa.
- Aningaasat allatut atornerisigut aaqqiissutissarsiortoqarsinnaavoq. Amerlanerusunik aningaasaliineq kisimi aaqqiissutissaanngilaq, taanna oqarpoq.
Kommuneqarfik Sermersuumit sukumiinerusumik akissuteqarneq pillugu allaaserisaq kingusinnerusukkut saqqummissaaq.
Utaqqisinnaajunnaartoq
Naalakkersuisut sulisussaaleqineq meeqqerivinni pitsaassutsimut sunniuteqarsinnaasoq siunnersuutip suliarineqarnerani nassuerutigaat. Aammali sulinermut atugassarititaasut, akissarsiat atorfinitsitsisarnerlu unammillernartuusut erseqqissarneqarpoq.
Sulinerput aqagumut utaqqisinneqarsinnaalluni allaffissornerunngilaq. Meeqqalli taakkulu maannakkorpiaq atugarissaarnissaat pillugu sulineruvoq
- Ane Kuitse
Ikinnerpaaffissaliinerilli suli atuutilersinneqarnavianngikkallarput. Aallaqqaammulli aningaasaqarneq, allaffissorneq sulisussallu pisariaqartinneqartut misissorneqassapput.
Oqallinnermi sulisut amerlassusaat aningaasartuutinullu missingersuutit kisimik pineqanngitsut meeqqerivinni Soralumi Uilumilu aqutsisut oqarput. Meeqqat meeqqerivinni ulluinnarni atugaat pineqarput.
- Meeqqasi allaffissuutaannaanngillat. Meeqqasi misigissuseqarput. Aalasarnissartik sulisunillu aalajaatsunik najorteqarnissartik pisariaqartippaat. Allannguisoqartariaqarpoq. Aappaagumut kinguartissinnaajunnaarparput, maannakkut allanngortitsisoqartariaqarpoq, Ane Kuitse oqarpoq.
