Ilulissani imeqarfiup killeqarfiata nuunneqartussanngornera najukkami qinikkat iluarisimaaraat

Ilulissani imeqarfiup killeqarfia nuussaaq. Tamanna Aningaasaqarnermut Naalakkersuisup, Aqqaluaq B. Egedep (IA) danskit aningaasaqarnermut ministeriannik Peter Hummelgaardimik, marlunngornermi isumaqatigiissuteqarnerani qulakkeerneqarpoq.

Ilulissani imermut pilersuinermik suliniutit ukioq mannamit 2028 ilanngullugu katillugit 55.4 millionit koruuninik nalillit Danmarkimit aningaasalerneqarput. Suliniutinut taakkununnga imeqarfiup killeqarfiata, ukiuni kingullerni arlalinngortuni oqallisaasup, nuunneqartussanngornera isumaqatigiissutaavoq.

Tamanna borgmesterip tulliata siulliup, Jens Napãtûp (N) tusarluarpaa.

 - Uanga nammineq nuannaajallaatigisorujussuuara, killeqarfimmi maanna ajornartorsiutigisorujussuuarput.

- Killeqarfik Ilulissat sanaartornikkut ineriartoteqqinneqarnissaanut killilersuisorujussuuvoq, taanna Sermitsiamut oqarpoq.

Sermitsiap Aningaasaqarnermut Naalakkersuisoq imeqarfiup killeqarfia qanoq aamma sumorpiaq nuunneqassanersoq ilaatigut pillugu apersorumallugu attaveqarfigaa. Allaaserisalli suliarineqarnerani akissuteqartoqanngilaq.

Illuatungiliuttut: Qujanaqaaq

Avannaata Kommuniata kommunalbestyrelsiani illuatungiliuttuni partiip ilaasortaqarnerpaap, Demokraatit, eqimattami siulittaasuata aningaasaliineq aamma nuannaarutigaa. Taassuma suliniummut ukiuni arlalinni peqataasimanertik Sermitsiamut allakkatigut akissuteqarnermini erseqqissaatigaa.

- Maanna aningaasassaqalernera qujanaqaaq.

- Imeqarfiummi killeqarfiata nuutsunneranut illoqarfiup ineriartortinneqarneranut allarpassiarnullu soorlu qamuteralaat ingerlaarfiannut pitsaasumik sunniuteqartussaavoq, Lena Ravn Davidsen (D) allappoq.

Imeqarfiup maanna killeqarfia illoqarfiup sanaartornikkut inuussutissarsiornikkullu ineriartortinneqarnissaanut siornatigut aporfiliisarpoq. Assersuutigalugu imeqarfiup killeqarfiata iluani inissianik sanaartornissaq, qamutinik motorilinnik ingerlaarnissaq qimmiliveqarnissarlu inerteqqutaasarput.

Tamassuma ilaatigut maanna pitsaanerulissanera borgmesterip tulliata siulliup iluarisimaarpaa. 

- Illoqarfiup ineriartoqqinnissaanut killissaq tikivillugu tikinneqarnikuuvoq, tassa ineriartoqqissaguni nunaminertanik amigaateqartoqarpoq.

- Nunaminertanik nunarujussuarmi periarfissiisussanngorpoq. Pissanganarpoq. Tusagassiuutitiguinnaq tusarparput kisianni atuakkakka nuannaajallaatigalugit neriulluarfigaakka, Jens Napãtôk’ oqarpoq.

Sermitsiap Avannaata Kommuniani borgmesteri, Lars Erik Gabrielsen (S), Ilulissani pitsanngorsaasoqartussanngornera pillugu apersorusullugu attaveqarfigigaluarpaa. Taannali suliamut tunngatillugu Sermitsiamut oqaaseqarumanngilaq.