Ilulissat mittarfissaani isumannaallisaanermik suliaqartut piareertut

Ilulissani mittarfik nutaaq, oktobarip naanerani ammarpat, isumannaallisaanermik suliaqartut qulit missaanniittut sulinissamut piareerput. Taakkua Billundimi sungiusaammik sulillutik misiliinertik naammassivaat. Billundimi isumannaallisaanermut sulisut novembarip naanera ilanngullugu Ilulissaniillutik ikiuutissasut, Greenland Airports allappoq.

Ilulissani mittarfissami isumannaallisaanermi sulisut Billundip mittarfiani sungiusarnerminni ataatsimoorlutik assilineqartut.

Ilulissani mittarfissami isumannaallisaanermi sulisut ilaat Billundip mittarfiani sungiusarnerminni ataatsimoorlutik assilineqartut.

Assi: Greenland Airports

Andreas Wille Andreas Wille Tusagassiortoq

Saqqummersinneqarpoq 28. Septembari 2026 - 10:15

Ussassaarut

Ilulissanit Ilulissanullu atlantiku qulaallugu timmisartuussisanerlinnisat ullorpassuujunnaartut qaangiuppata aallartissapput. Mittarfik taassumalu illorsuartai nutaat oktobarip 29-ani tamanut ammarnissaat pilersaarutaavoq.

Greenland Airports-ip ullormut tassunga piareersaaterpassuit ilaat maanna naammassisimallugit, Facebookkimi quppernermini sapaatiummat allappoq. Tassani mittarfissami isumannaallisaanermik suliaqartut Danmarkimi Billundip mittarfiani sulinermik malinnaajutigalutik misilittaasimasut, taamaalilluni Ilulissani sullissinissaminnut piareertut, ingerlatseqatigiiffik allappoq.

AAMMA ATUARUK:

Kalaallit Nunaanni mittarfissualiornerit naammassineqangajalersut

- Suleqatigiiaani marlunni sulisut sisamat-tallimaasarlutik tamarmik immikkut sapaatip akunnera ataaseq Billund-imiissimapput, tassani mittarfiup nammineerluni security-mi sulisui nakkutiginnittuuneranni malinnaaffigisimallugit aammalu mittarfimmi hunnorujulikkaanik ilaasoqartartumi ulapaarfiusumi ilinniartinneqarlutik, Greenland Airports allappoq.

Sulisut mittarfissap suli ammannginnerani misilittagaqalereernerat pitsaasuusoq, Ilulissani mittarfimmi isumannaallisaanermut pisortaq oqarpoq.

- Suleriaasissat atuarneqarsinnaasarput sungiusartoqarluarsinnaallunilu. Kisianni periaasissaq aalajangersimasoq aatsaat ingerlatileraanni sungiunneqartarpoq. Mittarfimmi ulapaarfiusumi sulineq qanimut malinnaaffigisimallugu, ulloq 29. oktober ammarutta suleqatigiit siusinnerusukkut amerlanerit misilereersimassavaat. Tamanna inimi atuartitsivimmi sungiusarneqarsinnaanngitsumik eqqissisimalersitsivoq, Lars Daner Lindholm oqarpoq.

Ussassaarut

Billundimi sulisut aallartisarnermi ikiuutissasut

Ilulissani isumannaallisaanermik suliaqartut Billundip mittarfiani isumannaallisaanermik suliaqartunik suleqateqarnerat tamaanga killeqanngilaq. Iluliarmiut Billundiliaratik Billundimiut maanna Ilulissiartussanngorput.

Oktobarip aallartinneranit novembarip naanissaata tungaanut sulisunik Billund-imeersunik ingerlaavartumik Ilulissani sulisoqartassasoq, Greenland Airports allappoq. Taakkua aallartinnermi ikiuunnissaq suliarissavaat.

- Billund-imi suleqatitta qujanangaartumik tigulluarsimavaatigut. Misilittakkaminnik avitseqatiginnipput aammalu ammareerutta ikiuunnertik ingerlatiinnassavaat. Suleqatigiinneq taamaattoq mittarfimmik nutaamik suleqatinillu pikkorissunik ulloq siullermiit suli pikkorinnerulersitsissaaq, Lars Daner Lindholm oqarpoq.