Immikkut aallartitaq toqqarneqartoq: Kalaallit Nunaata USA-mut ilanngunnissaa sulissutigissavaa
Donald Trumpip Louisianami guvernøri Kalaallit Nunaannut immikkut aallartitatut toqqarpaa. Taassuma Kalaallit Nunaata USA-mut ilaalernissaanut sulissutiginissaanut toqqarneqarnini ataqqinaatigigini, guvernøri X-imut allappoq.
Assi: Kevin Mohatt/Reuters/Ritzau Scanpix
USA-p præsidentiata Donald Trumpip Louisianami guvernøri Jeff Landry USA-p Kalaallit Nunaannut immikkut aallartitaatut toqqarpaa.
Trump nammineq nittartakkamini inuit attaveqaqatigiittarfianni, Truth Social-imi, ataasinngornerup unnuaani allappoq.
Landryp Kalaallit Nunaat USA-p isumannaatsuunissaanut qanoq pingaaruteqartigisoq nalunngikkaa, Trump oqarpoq.
TRUMPIP KALAALLIT NUNAANNIK SOQUTIGINNINNERA
Donald Trumpip Præsidentitut siullermi atuunnermi 2019-imi aggustimi, Kalaallit Nunaat pisiarisinnaagunarlugu oqarpoq. Isumaliorneq tamanna ministeriunerup Mette Frederiksenip isumanngilluinnartutut taavaa, tamatumalu kingorna Trumpip Danmarkimut tikeraarnissani taamaatippaa.
Ukiut tallimat sinnerlugit qaangiuttut, tassa 2024-mi decembarip 22-anni, præsidentitut ivertinneqarnissi sioqqullugu Donald Trump Kalaallit Nunaat pillugu allamik oqariartuuteqarpoq:
- Nunarsuaq tamakkerlugu eqqissineqassappat, USA-p Kalaallit Nunaat oqartussaaffigisariaqarpaa, Trumpip inunnik attaveqatigiittarfimmini Truth Socialimi allappoq.
Tamatuma kinguninngua, aamma 2024-mi decembarimi, Trumpip Kalaallit Nunaat juullimut inuulluaqquaa. Amerikamiut aallartitaat Trumpip ernera Donald Trump Jr. ilagalugu januaarip arfineq-aappaanni Kalaallit Nunaannukarniartut, 2025-mi januaarip allaartinnerani paasissutissiissutigineqarpoq.
Qaammatini tulliuttuni Trumpip USA-p Kalaallit Nunaat pigisariaqaraa arlaleriarluni oqaatigaa.
USA-p præsidentiata tullia J.D. Vance nulianilu Pituffimmut marsip 28-ani tikeraarput. Nulia Usha Vance Kalaallit Nunaanni sumiiffinnut allanut tikeraartussaagaluarpoq, tamannali akerlererujussuarneqarnerata kingorna taamaatiinnarneqarpoq.
Tikeraarnerata kinguninngua Donald Trump NBC News-imit apersorneqarluni ima oqarpoq: - Kalaallit Nunaat tamakkiisumik tiguassavarput.
Trumpip tusagassiortunik apriilip 25-ani katersortitsinermini Kalaallit Nunaat eqqaallatsiarpaa.
Præsidentip taamanimiilli, unnuaq immikkut ittumik aallartitamik toqqaanermi nalunaarutiginissaata tungaanut, Kalaallit Nunaat pillugu oqaaseqanngilaq.
- Louisianami guvernøri pikkorissoq Jeff Landry USA-p Kalaallit Nunaannut immikkut aallartitaanut toqqarnera nuannaarutigalugu nalunaarutigaara.
- Jeffip Kalaallit Nunaat nunatta isumannaatsuunissaanut qanoq pingaaruteqartigisoq paasisinnaavaa, nunatta soqutigisaanik siuarsaassaaq - aamma nunarsuup sinnerata - isumannaatsuunissaq, toqqissisimanissaq aninguinissarlugu pillugit, Donald Trump allappoq.
Sakkutuuiarnerullunilu politiiunikoq
Republikanerip 54-inik ukiullip Jeff Landryp, Louisianami januaarimi 2024-mi guvernørinngortup, Trumpimit toqqarneqarnini qujamasuutigaa.
- Kalaallit Nunaat USA-mut ilanngunniarlugu nammineq kajumissutsinnik sullinnissat ataqqinaataavoq. Tamanna Louisianami guvernøritut atuuffiinnut arlaannaatigulluunniit sunniuteqassanngilaq, X-imi allappoq.
Landry USA-mi sakkutuuiarneruvoq, politikerinngunngikkallrami politiiunikuulluni sulffeqarfimmillu piginnittuulluni, Louisianap guvenøriata allaffiata nittartagaani allaqqavoq.
Landry naalagaaffiup immikoortuani ukiut marlungajaat matuma siorna guvernørinngunngikkallarami USA-mi kongressimi ilaasortaanikuuvoq Louisianamilu inatsisinik atortitsinermut ministeriunikuullunu.
Trumpip Kalaallit Nunaannut soqutiginninnera
Donald Trumpip USA-p isumannaatsuunissaanut Kalaallit Nunaat USA-mut ilannguttariaqartoq arlaleriarluni oqaatigisareerpaa.
Trump Kalaallit Nunaat aqussinnaajumallugu sakkutuunik atuinissaq tunuarsimaarfiginagu aamma oqaatiginikuuaa.
Oqaatigisai nunani tamalaani politikkikkut uivertitsisuupput, aamma USA-p Danmarkillu Kunngeqarfiata akornanni pissutsinik piffissap ilaani ilungersunartumik inissisimalerlutik.
Nunanut allanut tunngasunut ministerip Vivian Motzfeldtip USA-p Danmarkimi sinniisua Ken Howery decembarip arfineq-pingajuanni ataatsimeeqatigaa.
Oqaatsit toqqissisimajunnaartitsisut
Trumpip oqaasii Kalaallit Nunaanni toqqissisimajunnaarsitsisut, Motzfeldt tassani oqarpoq.
- Soorunami pisut toqqissisimajunnaartitsillutillu eqqarsaatinik pilersitsipput. Taamaattumik tamakku ammasumik oqaloqatigiissutiginissaat pisariaqarluinnarpoq.
- Nunatta USA-llu qanimut suleqatigiinnerat naqissuserusuppara. Siunissami suleqatigiinnissamut attaveqaqatigiinnermullu aqqutissiuisoqarpoq, Vivian Motzfeldt Sermitsiamut oqarpoq.
Nutaarsiassaqartitsivik Reuters Trumpip Jeff Landrymik Kalaallit Nunaannut immikkut aallartitanngortitsinera pillugu iluatsinngitsumik oqaaseqartinniaraluarpaa. Jeff Landry aamma oqaaseqartinniarneqaraluarpoq, aamma iluatsinnani.
/ritzau/
