Inatsisartut ukiorpassuarni kukkunersiuisortik taarseraat

Nunatta Karsiata 2024-mut naatsorsuutai Inatsisartuni akuerineqareersullu kukkunersiuisarfik BDO nunatta karsianut kukkunersiuisutut nutaatut toqqarneqarpoq.

Inatsisartut Siulittaasoqarfiat isumaqatigiissuteqarfigineqareermat BDO-p 2025-mi kukkunersiuinissamik suliassaq tiguaa, Kukkunersiuinermut Ataatsimiititaliap siulittaasua Iddimanngiiu Jensen Bianco Inatsisartut nittartagaatigut ilisimatitsivoq.

AAMMA ATUARUK

BDO-p Nunatsinni Deloitte pisiaraa

BDO-p Deloitte, Namminersorlutik Oqartussat atuutilerneraniilli kukkunersiuisuusoq, taarserpaa.

BDO-p Deloittep Nuummi allaffeqarfigisimasaa 2022-mi allaffeqarfigilerpaa, Kukkunersiuinermullu Ataatsimiititaliaq naapertorlugu Deloitte Namminersorlutik Oqartussanut kukkunersiuinermi suliassaminik Danmarkimiit 2022-mili suliaqarpoq.

Inatsisartut kukkunersiuinermik suliassaq sapinngisamik najukkami kukkunersiuisoqarfimmit suliarineqassasoq kissaatigaat:

- Tamatumanilu kukkunersiuisoqarfimmik nunatsinni aalajangersimasumik ingerlatsisumik suliassamillu tiguserusuttumik aammalu suliassamik tamatuminnga manna tikillugu annertussutsip pitsaassutsillu assinganik isumaginninnissamut nukissaqarlunilu piginnaasaqartumik nassaartoqarnissaa pisariaqartinneqarsimavoq, Iddimanngiiu Jensen Bianco allappoq, nangillunilu:

 -  Taamaattumik BDO Nuummi allaffeqartoq ukiormanna aallartittumik isumaqatigiissuteqarfigineqarsinnaanera Kukkunersiuinermut Ataatsimiititaliamit pitsaasuusorineqarluinnarpoq.

Deloittep ukiorpassuarni tunniusimalluni sulisimaneranut pitsaasumillu suleqatigisimaneranut Kukkunersiuinermut Ataatsimiititaliamit qujaffigineqarpoq.