Inatsisartut USA pillugu oqallinnerat - Jens-Frederik Nielsen USA-miit sianerfigineqartoq
Inatsisartut USA-p pillugu ataasinngornermi oqallipput. Maana malinnaaffigiuk.
Naalakkersuisut siulittaasuata Jens-Frederik Nielsenip (D) USA-p Kalaallit Nunaannik aqutsilerusunnera pillugu ataasinngornermi nassuiaateqarpoq.
Assi: Oscar Scott Carl
Inatsisartut ataasinngornermi immikkut ataatsimiipput.
Oqaluuserisassaq ataasiinnaavoq, tassa USA-miit pisut. Præsidentip Donald Trump Kalaallit Nunaat aqukkusullugu kissaateqarnera.
Jens-Frederik Nielsenip nassuiaataa pillugu sukumiinerusumik uani atuartoqarsinnaavoq: - Nunarput qaammatit kingulliit 14-it ilungersunarluinnartumik inissisimavoq
Oqallinneq pillugu una allaaserisaq nutarteqattaarlugu malinnaatitsissaagut.
Sioorasaarutit nalunaarutigineqartassapput
Oqallinnermi nakuusernissamik sioorasaarinerit arlaleriarlutik eqqaaneqarput.
USA-mik tapersersuinermut akerliunermullu atatillugu politikkerit partiinit assigiinngitsuneersut sioorasaarneqartarsimapput.
Inatsisartuni siulittaasup Kim Kielsenip (S) nakuusernissamik sioorasaarinerit tamarmik ingerlaannaq politiinut nalunaarutigineqartassasut naqissuserpaa.
Jens-Frederik Nielsen USA-mit sianerfigineqarpoq
Oqallinnermi ilaani Naleqqap Jens-Frederik Nielsen Inatsisartunut qinersinerup kinguninngua Donald Trumpip oqaluukkusunngissimanera isornartorsiorpaa.
Jens-Frederik Nielsenip USA-mit sianertoqarsimanera ataatsimiittarfimi uppernarsarpaa.
- Naalakkersuisunut siulittaasutut suli ivertinneqarnanga USA-p præsidentiata pilluaqqorusukaanga sianerfigineqarpunga, Jens-Frederik Nielsen oqarpoq.
- Naalakkersuisutulli siulittaasuuninni taama pisoqanngilaq, Jens-Frederik Nielsen oqarpoq.
Pele Broberg USA-mi atorfilittanit attaveqarfigineqarsimalluni aamma oqarpoq, taakku Jens-Frederik Nielsen pissarsiarerusuppaat.
- Qineqqusaarnermi qinerneqarnerpaaq pilluaqquneqarusunneqarpoq, Pele Broberg oqarpoq.
Nunamut killuussinerua?
Oqallittoqalaavippoq, Demokraatillu apeqquteqarfigineqarput. Atassutip siulittaasuata Aqqalu C. Jerimiassenip inuit ilaat Amerikamiut erfalasuannik peqarnerat nunamut killuussinerunnginnersoq apeqqutigaa.
- Nunarput illersoraangatsigu qallunaajorusunnerarneqartarpugut, allalli kaaginik kilitsisoqarnerani nuannattarlugit, Aqqalu C. Jerimiassen oqarpoq.
Tassani USA-mik tapersersuisorujussuup Jørgen Boassenip USA-mi nalliuttorsiornermik peqataanera pigunavippaa, tassanilu kaagi Kalaallit Nunaattut ilusilik amerikamiut erfalasuannik qalligaq sassaalliutigineqarpoq.
Naleraq unikkallarnissamik kissaateqarpoq
Naleqqap siulittaasuata Pele Brobergip akunnerup affaanik unikkallarnissaq kissaatigaa. Ataatsimiinnissap sinnera upernaarumut kinguartinneqarsimanera ullaaq manna partiimit aatsaat paasineqarnera pissutaavoq.
Naalakkersuisut naggataarutaasumik oqaaseqareerpata aatsaat unikkallartoqassasoq Inatsisartut siulittaasuata Kim Kielsenip kaammattuutigaa.
Ataatsimiinnerup ingerlaannarnissaa amerlanerussuteqartut toqqarpaat.
Demokraatit: Ataatsimuussaagut
Jørgen Rosbach Demokraatineersoq oqaluttarfimmukarpoq.
- Pissutsinni eqqissisimanngiffiusuni maani nunatsinni ataatsimoornissarput ataqqeqatigiinnissarpullu pingaaruteqarpoq, oqarpoq.
USA-mit pisut eqqartorpai. Nunat killeqarfii isumaqatigiinniutigineqarsinnaanngitsut, aamma USA-mik Danmarkimillu oqaloqateqarneq pingaaruteqartoq ammasumillu ataqqinnittumillu ingerlanneqartariaqartoq oqaatigaa.
- Pisumi Kalaallit Nunaat kisimiinngitsoq Europamit tamarmit takutinneqaproq. Tamat oqartussaaqataarnerput sukataarutigalugulu illersoratsigu ataqqineqarpugut.
- Maanna pisut immikkorluinnaq ipput, nunatsinnullu siunissatsinnullu sunniuteqassapput, aammali nunarsuup sinneranut, Jørgen Rosbach oqarpoq.
Inatsisartut ataatsimoornissaat kaammattuutigalugu naggasiivoq, taamaaliornikkut ilaasortat ataasiakkaat USA-p Kalaallit Nunaannut qaninnerulernissaanik oqariartuuteqartaqqunagit.
Kielsen: Ataatsimiinnerup sinnera kinguartinneqarpoq
Inatsisartut siulittaasuata Kim Kielsenip (S) USA-mit pisut pissutigalugit ukiaanerani ataatsimiinnerup immikkoortuata aappaani oqaluuserisassat kinguartinneqartut paasissutissiissutigalugu ataatsimiinneq ammarpaa.
Tassa ukiakkut ataatsimiinneq, februaarip aqqaneq-aappaata tungaanut ingerlasussaagaluaq, ullumi oqallinneq naammassippat naggaserneqassaaq.
Oqaluuserisassat upernaakkut ataatsimiinnermut apriilip 14-iani aallartittussamut kinguartinneqartut Kim Kielsen oqarpoq.
Nalunaaquttap ingerlaaqatigiiffiata allanngortinneqarnissaanut siunnersuut taakkununnga ilaavoq, tassalu siornatigut ingerlaaqatigiiffimmut atorneqartumut uterteqqinneqarnissaa.
