Nittartakkatigut neqeroortitsisarfik kukkussutit pissutigalugit atorunnaarsinneqartoq
Pisortat pisiortornermut atortussaannut neqerooruteqarfissaq matuneqarallartoq, aaqqiissutissarlu utaqqiisaagallartoq atulersinneqartoq, Naalakkersuisut nittartagaanni paasissutissiissutigineqarpoq.
Toqqorsivimmit.
Neqeroortitsisarfik maanna atuuttoq "annertuunik kukkuneqarmat, amigaateqarmat, isumannaallisaanikkullu unammillernartoqarmat ingerlatiinnassallugu illersorneqarsinnaajunnaarpoq“, ingerlaannaq atorunnaarsinneqarneranut nassuiaatigineqarpoq.
Neqeroortitsisarfik Aningaasaqarnermut Sulisoqarnermullu Aqutsisoqarfiup (ASA) Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfimmiit 2026-p februaarip aallaqqaataaniit tiguaa.
”Neqeroortitsisarfissamik nutaamik, ullutsinnullu naleqqunnerusumik suliaqarneq aallartinneqareerpoq, ataavartumillu aaqqiissutissap saqqummiunneqarnissaata tungaanut neqeroortitsisarfiugallartussaq 2026-mi februaarip aappaanit atorneqarsinnaalissalluni”, paasissutissiissutigineqarpoq.
Aaqqiissutaagallartoq
Neqeroortitsinerit ingerlasut, neqeroortitsinerit naammassereersut, ajugaasullu pillugit paasissutissat 2026-mi februaarip aappaanit nittartakkami Govgen.gl-imi takuneqarallarsinnaalerput.
Digitalinngortitsinermut Aqutsisoqarfik suleqatigalugu neqeroortitsisarfimmik atuisunik ataatsimeeqateqartoqassasoq naalakkersuisoqarfik paasissutissiivoq.
”Apeqqutit akineqarnissaat kiisalu ikaarsaarnermi, neqeroortitsisarfissallu nutaap pilersinneqarnissaata tungaanut suleriaatsit eqqartorneqarnissaat siunertaavoq”, naalakkersuisoqarfik allappoq, atuisullu akornuserneqarnerat ajuusaarutigalungu.
