- Nunarput qaammatit kingulliit 14-it ilungersunarluinnartumik inissisimavoq

- Nunarput qaammatit kingulliit 14-nit ilungersunarluinnartumik inissisimavoq.

- Naluneqanngitsutut ajuusaarnaqisumik USA-miit Nunatta pigineqarnissaa aqunneqarnissaalu uteqqiasumik ulloq manna tikillugu oqariartuutigineqartarluni.

Nunap inissisimanera pillugu nassuiaammi Naalakkersuisut siulittaasuata Jens-Frederik Nielsenip (D) ataasinngornermi Inatsisartunut saqqummiussassaani oqaatsit siulliit taama nipeqarput.

Inatsisartut pilersaarutaaqqaaraluartumit ullormik ataatsimik sioqqutsillutik ataasinngornermi ataatsimiissapput. USA-p præsidentillu Donald Trumpip Kalaallit Nunaannut piffissami kingullermi tatisinerisa kingunerisaanik immikkut ittumik ataatsimiittoqassaaq.

Jens-Frederik: USA-p Kalaallit Nunaat aqukkusuppaa

Jens-Frederik Nielsenip nassuiaataa oqaluuserisassani kisiartaavoq, taannalu Inatsisartut ataatsimiinnissaat sioqqullugu nittartakkami saqqummiunneqarluni.

Jens-Frederik Nielsenip nassuiaami USA-p Kalaallit Nunaat USA-mut atassuteqalernissaa aqunneqalernissaalu piumagaa oqaluttuaraa:

- USA-p præsident-iata 2025-p aallartinnerani suli ivertinneqaranili oqaaserisani -  ivertinneqareernermilu kingorna - nangittumik tunuartinnikuunngilai, ataatsimullu eqikkaraanni oqariartuut anguniagarlu tassaavoq: Kalaallit Nunaat USA-miit pigineqalissaaq aqunneqalerlunilu.

- Tamanna ajoraluartumik suli atuuppoq allangortinneqaranilu. Kingullertigut sakkulersorluni tiguaasinnaaneq tunuartiimiffigineqarpoq taamaakkaluartorli Nunatsinnut inuinullu isiginninneq allannguuteqarani: Kalaallit Nunaat USA-mut atalersinneqassaaq aqunneqarlunilu.

Trump kisimi oqariartortuunngitsoq

Præsidenti kisimiilluni oqariartuuteqartanngitsoq Jens-Frederik Nielsenip aamma oqaatigaa. Qanimut suleqatai aqutseqataalu assigiinngitsunik ilaatigut Nunatsinnut inuinullu "nikassaarpalaartumik avissaartuuttitsinissamillu" siunertaqartunik imalinnik ataannartumik ukiup nutaap aallartinneraniillu ingerlatarigaat oqaatigaa.

Jens-Frederik Nielsenip Naalakkersuisut taamatut oqarneq akuerineqarsinnaanngitsutut isigigaat, aamma Kalaallit Nunaat Kunngeqarfiup ilaagigaa Namminersornermullu inatsisip ineriartora ingerlatiinnarneqassasoq naqissuserpaa.

Kalaallit Nunaat pissutsini ilungersunartorsiorfiusuni ilaatigut EU-miit annertuumik tapersersorneqarneq, aamma atorfilittanik qaffasissumik inissisimasunik ataatsimeeqateqarnerit aqqutigalugit Amerikamiut oqaloqatiginerat maanna iluatsittoq oqaatigaa.

Kunngeqarfimmi inatsisit malillugit namminiussuseqarneq ataatsimoorfigineqartariaqartoq

- Oqaloqatigiinnerit aallartipput kinguneqarluarsinnaanissaallu tamaviaarullugu Naalakkersuisuniit ingerlatissavarput, Jens-Frederik Nielsen oqarpoq, Kalaallit Nunaatalu illersornissaa ataatsimoorfigineqartariaqarnerarlugu:

- Ataatsimoortariaqarpugut Kalaallit Nunaat nalunngisarput illersorlugu. Ataatsimoortariaqarpugut Kunngeqarfimmi inatsisit malillugit namminiussuseqarnitta eriaginissaa, siunissatta nammineq aalajangernissaanut periarfissatta aammalu ineriartortinnissaa ingerlatiinnarumallugu

Ataatsimiinneq nal. 11 aallartissaaq.