Aningaasaqarnermut Siunnersuisoqatigiit: Aningaasaqarnikkut siuariarneq annikitsoq
Aningaasaqarnermut Siunnersuisoqatigiit Nunatta aningaasaqarnera misissorsimavaat, siunissamilu qanoq ineriartortoqarnissaanik siulittuiniarsimallutik. Nunatta karsia 2025-mi amigartoorfiuvoq imaannaanngitsumullu anngussimalluni, tassami karsi imaarutingajakkaluarami.
Arkivfoto: Leiff Josefsen
Nunatsinni 2025-mi tunisat
ataatsimut nalingat 0,5 procentiinnarmik amerleriaateqarumaartut Aningaasaqarnermut ilisimatuut naliliipput,
tassa 2020-mit coronap nalaani ilungersunartorsiorfiusumit amerlanerulaaginnarlutik.
Tamanna mittarfiliortiternernut
pilersaarutit angisuut annikilleriarnerannik nassuiaatissaqarpoq, tamannali
ilimagineqareersimalluni. Aammattaaq raajat pisarineqartartut ikileriaateqarput,
aalisakkanilli avammut tunisaqartarneq saarullinniarneq iluaqutigalugu
siuariaateqarsimalluni, siornami saarulliit pisat amerleriarnerisigut akiisalu
qaffakkiartornerisigut aalisakkanit tunisassiat avammut tunisat nalingi
ataatsimut isigalugit qaffariaateqarsimammata.
Takornariaqarneq
siuariartorpoq, aasalli qaammataanni arlaqanngitsuni takornariarpassuaqarfiusartuni
taamaallaat atuulluni. Taamaalilluni takornariat isumagineqarsinnaasut qummut
killissaat anguneqajalluinnarpoq.
- Takornariaqarnerup taamaallaat
aasaanerani qaammatini pisarunnaarsillugu ukiup sinneranut sivitsorneqarnissaa
pisariaqartinneqarpoq aamma mittarfeqarfinnik, akunnittarfinnik takornarianillu
angallassisarnerit annertusarnissaat pisariaqarlutik, taamaalilluni
takornariaqarneq nunap aningaasaqarneranut tapersiinerusinnaalissammat,
Aningaasaqarnermut Siunnersuisoqatigiit nalunaarusiaanni allassimavoq.
Nunap aningaasarsiorfiisa pingajuanni
– aatsitassarsiornermi – suli misissueqqissaartoqarlunilu misissuisoqartarpoq,
taamaallaallu Kangerlussuup ilaani anorthositimik maanna piiaasoqartoq oqaatigineqarluni.
Nunami tunisat ataatsimut nalingat ukioq manna annertunerulissasoq
Ukioq mannali
aningaasarsiorneq 1 procentingajammik siuariarfiusussatut, taamaammallu
atuinerup annertusinissaa naatsorsuutigineqarpoq.
- Pisiniarfinni kaaviiaartitat
2024-mit 2025-p qiteqqunneranut uninngaannangajassimapput, 2025-mili ukiup affaani
kingullermi qaffariarsimallutik. Nioqqutissat akiisa qaffannerisa kingunerinik
inoqutigiit namminneq pisisinnaanerat annikillisissimavaa. Akissarsialli
qaffannerisigut aningaasarsiassat nalingi qaffakkiartuaartussaapput,
akileraarutinillu oqilisaassinerit iluaqutigalugit isertitarineqarsinnaasut
amerliartorumaartut, ilisimatitsissutigineqarpoq.
Aningaasat
naleerukkiartornerat 2025-mi 3 procentiussasoq, 2026-mili 2,5 procentinngussasoq
naatsorsuutigineqarpoq.
Pisortat
aningaasaqarnerat
Aningaasaqarnermut
Siunnersuisoqatigiit pisortat aningaasaqarnerat aningaasaqarnikkullu politiki
sammisarpaat.
Nunatta Karsiata
inissisimanera 2025-mi “annertuumik” ajorseriarpoq. Aningaasani
piareersimasuutitani nunap karsiata amigartoorutissai 386 millionit koruuninit
ikinnerunavianngitsut 2025-mi decembarimi naatsorsuutigineqarpoq.
Amigartooruteqarujussuarnermut
pissutaasut ilaat makkuusut oqaatigineqarput:
- Aalisarnermit
isertitakinnerulerneq,
- Inuttut akileraarutinit
isertitakinnerulerneq,
- Namminersorlutik Oqartussat
suliffeqarfiutaannik piginnittunit iluanaarutit ikinnerulernerat,
- Peqqinnissamut
utoqqalinersiutinullu aningaasartuutit qaffakkiartornerat
Tamatuma kingunerisaanik 2025-mi
ukiup affaani kingullermi Nunatta karsiata akiliisinnaassusia „ilungersunartumik
inissikkiartupiloorpoq, tassalu imaarutingajalluinnarluni“. Tamanna
tunngavigalugu Aningaasaqarnermut Siunnersuisoqatigiit aningaasanut inatsit
nutaaq ilassilluarpaat, tassanimi siunnersuutigineqarmat isertitat
aningaasartuutillu oqimaaqatigiissaarneqaqqissappata „pingaartumik
sukaterinissaq pisariaqartoq“.
Ajornartorsiutit
anigorniarlugit iliuuseqartoqartariaqartoq
Siornatigut nalunaarusiaasartut
assigalugit, Aningaasaqarnermut Siunnersuisoqatigiit erseqqissarpaat,
aningaasaqarnikkut ingerlalluartoqarnerani aningaasaqarnerup ajorsiartornerani
iluaqutissanik aningaasanik illuartitsisarnissaq politikerit isumagisimanngikkaat.
Pisortat aningaasaqarniarnerat
maanna ilungersunartorsiorfiummat, Siunnersuisoqatigiit siunnersuutigaat
missingersuutinut inatsimmi sinneqartoorfiusumik anguniagaqartoqassasoq, tassa
ukiut tamaasa missingersuusiortoqartassasoq sinneqartoorfiusunik.
Aningaasaqarnermut
Siunnersuisoqatigiit erseqqissarpaat aningaasaqarnerup ingerlalluarnerani
aningaasanik katersisarnissamut tamanna iluaqutaassaaq, taamaalillunilu
aningaasanut politiki patajaatsumik ineriartortinneqassalluni.