Inatsisitigut ataataqanngitsut naalagaaffimmut eqqartuilersuussinermi: Ilunni maqaasineq suli pigaara

Inatsisitigut ataataqanngitsut 26-t naalagaaffimmit taarsiiffigitinnissamik piumasaqartut eqqartuussivimmi pingasunngornermi nassuiaapput.

Østre Landsret Københavnimi Nordhavnimi
Saqqummersinneqarpoq

Kalaallit inatsisitigut ataataqanngitsut 26-t danskit naalagaaffiat eqqartuussivimmut suliassanngortippaat, inuit pisinnaatitaaffii unioqqutinneqartut taakku isumaqarput.

Sisamaat Nuummiit attaveqaatit atorlugit peqataavoq.

- Paasiuminaatsitannik timikkut peqarpunga. Meeraallunga paasilerpara ataataqarlunga, kinaanerali naluara. Paasiuminaatsorli kaanngarneq ajorpoq, ataatagaami toqusimavoq, Tida Ravn eqqartuussivimmi oqaluttuarpoq.

Tida Ravn Kalaallit Nunaanni1957-imi inunngorpoq, eqqartuussivimmilu sassartussat pingasut ilagaat.

Taassuma saniatigut Dorthea Josefsen, Klaus Frederiksenilu eqqartuussivimmiipput, sisamaallu - Uullat Bach - nittartakkatigut peqataavoq.

Dorthea Josefsenip nassuiaammini oqaluttuaraa ataatani ilisarisimasimanngisaannarlugu.

- Qallunaatut isikkoqarnera ataataqannginneralu pillugit qinngasaarneqartarpunga, Dorthea Josefsen qullingiartinnginnermini, iminnginnerminilu oqarpoq.

Kalaallit Nunaata Kitaani meeqqat 1963 sioqqullugu uersakkat, 1974 sioqqullugu nunap sinneranilu inunngorsimasut, ataatartik ilisimasinnaatitaanagu, kingornussisussaatitaanatillu naggataat atorsinnaanngilaat.

Inatsisip nutaap 2014-imi atuutilernerata kingorna inatsisitigut ataataqanngitsut ataataanermut kingornussisarnissamullu tunngatillugu meeqqanut allanut katissimanani inunngorsimasunut assingusunik pisinnaatitaaffeqalerput.

Dorthea Josefsen inatsisit allanngortinneqarnerisa kingunerisaannik ataatassarsiuussinermut tunngatillugu paasissutissanik pissarsisinnaanngorpoq. Tamanna ataatarisorisaanik nassaarnermik malitseqarpoq. Taamaattoqanngilarli.

Aatsaat eqqartuussivimmi ukioq kingulleq oktobarip 13-ianni aalajangiisoqarneratigut, ataataviusup kinaanera kiisami paasivaa. Taanna 1993-mi toquvoq.

- Ajoraluartumik ilisarisimalersinnaasimanngilara. Atersivara, kisianni qamuuna suli maqaasisaqarpunga kaanngarsinnaanngitsumik, toqussaralu tikillugu taamaattuassaaq, oqarpoq.

Eqqartuussivimmut suliassanngortitsisut 26-t tamarmik immikkut 10.000 koruuninik, katillugit 3.500.000 koruuninik, taarsiiffigitinnissamik piumasaqarput.

Suliap ingerlanerani eqqartuussivimmut suliassanngortitsisut marluk toqukkut qimagussimalereerput taakkuali kingornussisui suliamut kingusinnerusukkut ilanngupput.

Sisamanngornermi eqqartuussineq kingulleq ingerlanneqassaaq, qaqugulu eqqartuussut oqaatigineqassasoq suli ilisimaneqanngilaq.

RITZAU

Powered by Labrador CMS