Inuit tarnimikkut peqqissusaat misissorneqassaaq

Inuiaqatigiit nalinginnaanngitsumik tatineqarneranni tarnikkut peqqissusaat atugarissaarnerallu misissuiffigineqartussanngorpoq.

Tamanna Kalaallit Nunaanni 2024-miit 2026-mut innuttaasunik misissuinermut maanna ingerlanneqartumut ilassutitut pissaaq.

Danmarkimi peqqissuseq pillugu ilisimatusarfik tusagassiuutitigut nalunaaruteqarpoq.

- Nunanut allanut politikkimut tunngatillugu maannakkut pissutsit, USA-p præsidentiata Kalaallit Nunaata tiguarnissaanik oqariartuutaa inuppassuarnit toqqissisimajunnaarsitsillunilu ernummatigineqartoq, tunngavigalugu misissuisoqassaaq, allapput.

Misissuineq apeqqutinik immersugassanik pivoq, tassanilu maannakkut qanoq inneq, qanoq isumakuluuteqarneq ulluinnarnilu inuunermut qanoq sunniuteqarnersoq apeqqutigineqarput.

Apeqqutit akinissaannut minutsit tallimat missaat atorneqarsinnaapput. Kalaallit Nunaanni 15-ileereersimasut tamarmik peqataanissamut kajumissaarneqarput.

Misissuinerup inernera maanna misissuinermit ingerlasumit, misissuinerniillu allaneersunit paasissutissanut sanilliunneqassaaq, taamaalilluni ilisimatusartut pissutsit maanna atuuttut innuttaasut isumakkut peqqissusaannut atugarissaarnerannullu qanoq sunniuteqarnersut paasisinnaavaat.

- Misissuinerup inernera Kalaallit Nunaanni nunanilu allani siammarterneqassaaq, taamaalillunilu immikkut ittumik tatineqarneq inuit ulluinnarni inuunerannut qanoq sunniuteqartartoq paasitinneqarumaarpoq, tusagassiuutitigut nalunaarummi allaqqavoq.

Misissuineq Kalaallit Nunaanni peqqissusermik Ilisimatusarfik, Ilisimatusarfik aamma Syddansk Universitet suleqatigalugit ingerlanneqarpoq.