Inuup normuisa susassaqanngitsunit takuneqarsinnaalernerat annertuumik akiligassiisoqarneratigut paasineqartoq

Danmarkimi suliffeqarfeeqqamut akiligassaq "annertooq" pissutigalugu susassaqanngitsut septembarimi ulluni qulini Danmarkimi innuttaasut 8,8 millionit pillugit paasissutissanik takunnissinnaasimasut oqartussaasut paasivaat.

Tamanna Ilisimatusarnermut, Ilinniartitaanermut Digitaliseerinermullu Naalakkersuisoqarfimmi pisortap Mikkel Lehardtip marlunngornermi tusagassiortunik katersortitsinermi uppernarsarpaa.

- Aningaasarpassuit akiligassiissutigineqarput, tamatumalu suliarujussuaqartoq takutippaa, taanna oqarpoq.

Oqartussaasut suliffeqarfik sorleq pineqarnersoq oqaatigiumanngilaat, taassumali paasissutissat inatsisinut naapertuuttumik pissarsiarisinnaavai.

Suliffeqarfik inuup normuisa nalunaarsorsimaffianni misissuigaangat tamatigut akiliuteqarfiusarpoq, taamaammallu suliffeqarfimmut akiligassiissuteqangaatsiartoqarneranut tunngatillugu peqquserluttoqarnera paasineqarpoq.

Suliffeqarfeeqqap danskiusup nalunaarsuiffimmut isertaataa susassaqanngitsup atornerlussimagaa ataasinngornermi paasinarsivoq.

Oqartussaasulli kina pisuunersoq suli oqaatigisinnaanngilaat.

Henriette Erbs, National Unit for Særlig Kriminalitet-imi (NSK), tassa immikkut ittumik peqquserluttoqartillugu nuna tamakkerlugu paasiniaasartuni, immikkoortortami pisortaq taamatut oqarpoq.

- Kina pisuunersoq qanorlu periaaseqarnersut oqaatigissallugu maannakkut siusippallaarpoq.

- Suliani taamaattuni killissamik qaangiilluni peqquserluttoqartarpoq, taanna oqarpoq, taamatuttaarlu "kikkut pisuunersut maannamullu unnerluutigisaqanngitsoq" ilanngullugu oqaatigaa.

Pisoq oqartussat ilungersunartutut isigigaat Laila Reenberg, Inuiaqatigiinni isumannaallisaanermut pisortaaneq, tusagassiortunik katersortitsinermi tamatumani oqarpoq.

- Paasissutissat katersorneqartut sumut atorneqarumaarnersut paasisimanngilarput, kikkut maannakkut tunuliaqutaanersut aamma naluarput, kisianni qarasaasiakkut peqquserluttoqarsinnaasoq erseqqippoq, Reenberg oqarpoq.

Paasissutissat „aternut najuganullu tunngasut“ amerlanerit pissarsiarineqarsimapput. Mikkel Leihardt taama oqarpoq.

Inuup normuinik nalunaarsuiffimmi atit adressillu saniatigut kinaassusersiissutit, soorlu inuk qanoq aappaqarnersoq, sumi inunngorsimanersoq, qaniginerpaasai kikkuunersut, oqaluffimmi ilaasortaanersoq, naalagaaffimmut innuttaanersoq, aamma isumassuisunik ilaqarnersoq pillugit paasissutissanik imaqarput.

Ullumikkut innuttaasut nalunaarsorneqarsimasut 11 millionit missaanniipput, taakkualu saniatigut Danmarkimi inuusut, nunami najugaqarsimasut, toqusimasut, nunanullu allanut nuussimasut ilaapput.

Kiap inuup normuinik nalunaarsorsimaffiup nakkutiginissaa akisussaaffigigaa Leihardtip akiumanngilaa.

Tamanna pissutigalugu innuttaasut ilaat allamik inuttut normoqalissanersut suli oqaatigiuminaappoq.

Digitalimik ineriartortitsinermut ministeri Christina Egelund (M) ataasinngornermi taama oqarpoq.

- Inuup normuinik nalunaarsorsimaffiup tamarmi isumannaallisaanikkut misissorneqarnissaa qinnutigaara. Misissuisoqareerpat inuup normuinik nalunaarsorsimaffinni maanna ilisimasatsinni aaqqiisoqassanersoq allanngortitsisoqartariaqarnersorluunniit takujumaarparput, Egelund oqarpoq.

RITZAU