INATSISARTUT MARLUNNIK NERSORNAASIISUT
Inuussutissarsiornermik ingerlatsisoq kiisalu Jess G. Berthelsen sulilluarsimanertik pissutigalugu sølvimik nersornaaserneqartut
Nikolaj Ezekiassen Nersornaammik sølviusumik nersornaaserneqarpoq sanasut namminersortutut inuusuttut ilinniartinnissaat pingaartiluugu inissaqartitsiuarnera peqqutigalugu. SIK-p siulittaasua Jess G. Berthelsen aamma ukiorpassuarni kattuffimmi sulisimanerminut Nersornaammik tunineqarpoq.
Nuummi Hans Egedep Illuani Kim Kielsenip Nikolaj Ezekiassen decembarip 22-anni 2025-mi sølviusumik Nersornaaserpaa .
Assi: Bureau for Inatsisartut
Juulli sioqqullugu inuussutissarsiornermik ingerlatsisoq Nikolaj Ezekiassen aamma SIK-p siulittaasua Jess G. Berthelsen Inatsisartut Nersornaataannik sølviusunik nersornaaserneqarput.
Inuussutissarsiornermik ingerlatsisoq Nikolaj Ezekiassen nersornaaserneqarpoq inuussutissarsiortutut suliniuteqarluarnini pillugu, pingaartumik inuusuttut ilinnialernissaannik neqerooruteqarnini pissutigalugu.
Jess G. Berthelsen soraarnerussutisiaqalernissamut aningaasaateqarfimmi SISA-mi siulittaasutut sulisimanerminut aamma sulisartut kattuffianni SIK-mi ukiuni 35-ni siulittaasuunermini angusarissaarsimanini pillugu nersornaaserneqarpoq.
NERSORNAAT
Kalaallit Nunaanni Namminersorlutik Oqartussat nersornaasiuttagaat Nersornaat, Namminersorlutik Oqartussat ukiuni qulinngortorsiorneranut atatillugu 1989-mi pilersinneqarpoq.
Namminersornerullutik Oqartussat nersornaasiuttagaat akimanerpaaq tassaavoq saqqarmioq sølviusoq, taannalu Kalaallit Nunaanni innuttaasunut, qallunaanut nunanullu allanut tunniunneqarsinnaavoq, Kalaallit Nunaannut immikkut ittumik suliniuteqarsimasut pillugit, inuiaqatigiinnut kiffartornermut, inuussutissarsiornermut, eqqumiitsuliornermut, ilisimatuussutsimut allamullu tunngatillugu.
Nersornaatinut innersuunneqartut Siulittaasoqarfimmut nassiunneqassapputinatsisartut@inatsisartut.gl
.
Paasissutissaq: Inatsisartut
Inatsisartut nittartakkaminni taama ilisimatitsipput.
Ilinniartut immikkut iliuuseqarfigineqarput
Inatsisartut siulittaasuat Kim Kielsen nersornaasiivoq, oqalugiarnerminilu erseqqissarpaa Nikolaj Ezekiassenilu namminersortutut ukiorpassuarni sanasutut inuusuttut ilinniartinnissaat immikkut pingaartitarigaa:
- Suliffeqarfiutigisat Sanasoq 1999-mi pilersippat, sannavissat nammineq naqqaniit sanariarlugu ukiut ingerlanerini ineriartortissimavat.
- Maluginiarneqarsimavoq, immikkut ittumik inuusuttunik ilinniartuuteqarnissaq pingaartikkit, sulisullu ilinniagaqanngitsut ilinnialernissaannik annertuumik kaammattortarsimagitit illillu suliffeqarfiutinni ilinniartuunissaannut inissaqartittarlugit. Suliniutit taamaattut nersualaagassaapput allanullu aamma isumassarsiorfiusinnaallutik, Kim Kielsen oqarpoq.
Sulisartunut suliniuteqarnera nersualaarneqartoq
Jess G. Berthelsenimut oqalugiarnermini Kim Kielsenip erseqqissarpaa taanna sivisuumik sulinermini suliniuteqarluarsimasoq siulittaasuullunilu eqiasuitsuusoq, tassanilu akissarsiakinnerpaat atugaat immikkut ukkatarigaa:
Inatsisartut siulittaasuata Kim Kielsenip decembarip 22-ani 2025-mi Nuummi Hans Egedep Illuani Jess G. Berthelsen sølviusumik Nersornaaserpaa.
Assi: Bureau for Inatsisartut.
- Sulisartut kattuffianni SIK-mi ukiorpassuarni sulisimaninni, immikkut ittumik sulisartut akissarsiakinnerpaat atugaat ukkatarisimavatit pitsaanerpaamillu atugaqarnissaat anguniartuarsimavat siulittaasutut annertuumik sukataaruteqarnikkut. Taamatullu sumiluunniit pisortat suliffeqarfiutaanni, peqqinnissaqarfimmi aalisakkerivinni niuertarfinniluunniit sulisuuppata tamaasa sullittarlugit, Kim Kielsen oqalugiaammini oqarpoq.
Jess G. Berthelsen aamma soraarnerussutisiaqalernissamut aningaasaateqarfiup SISA-p pilersinneqarnerani peqataasimanera pillugu nersualaarneqarpoq, kiisalu soraarnerussutisiaqarnermut aningaasaateqarfiup qanittukkut nunatsinni aalisakkerinermut aningaasaliinera pillugu nersualaarneqarluni, ilaatigut Polar Seafoodimik pisisimanera immikkut taaneqarluni:
- Apeqqutaanngilaq, fagforbundip siulittaasuattut piffissaq tamaat sammisimavat nunaqavissut inuussutissarsiornermik ingerlataqartut, kissaatigalugu, sumiiffimmi katersat aningaasat aamma nunamiiginnarnissaat, oqarpoq Kim Kielsen nersornaammik tunniussinermi.
