Inuusuttut kommunalbestyrelsemi: Atuarfinni kammagiit klassiinik pilersitserusupput

Kommuneqarfik Sermersuumi inuusuttut kommunalbestyrelsia Nuummi juunip aallaqqaataaniit tallimaat ilanngullugu ukiumoortumik ataatsimiippoq.

Sermersuup illoqarfiinit sisamanit inuusuttut aqqanneq marluk Paamiuniit, Nuummiit, Tasiilamiit Ittoqqortoormiiniillu aamma nunaqarfinnit sisamaninngaanneersut Kulusummiit, Kuummiuniit, Sermiligaamiit Isertuminngaanniillu qinikkat peqataapput.

Innersuussutit

Atuarfeqarneq, inuusuttut kommunalbestyrelsiata atuuffia pimmatiginnittarnerullu akiorneqarnissaa qulequttatut sammineqarput, saniatigullu inuusuttut namminneerlutik oqariartuutigerusutaat Avaaraq Olsenimut (IA) Kommuneqarfik Sermersuumi borgmesterimut apuunneqarlutik.

Innersuussutit kommunalbestyrelsep ataatsimiinnerani saqqummiunneqarlutillu aalajangiiffigineqassapput.

Meeqqat atuarfiani kammagiit klassiata pilersinneqarnissaa, inuusuttut ornittagaanni aasaanerani sammisassat aasaanerani amerlanerusut, ilaqutariillu ullui amerlanerusut kissaatigineqarput.

Inuusuttut kommunalbestyrelsiata tunumi Islandimilu ataatsimiittarnissaa innersuussutigineqarpoq.

Pimmatiginnittarneq pillugu paasisat nutaat meeqqat atuarfiani atuartunut, ilinniartitsisunut angajoqqaanullu siammarterneqartarnissaat aamma pimmatiginnittoqarsimatillugu saaffissat, soorlu nakkutilliisut, socialrådgiverit aamma tarnip pissusiinik ilisimasallit amerlanerusut piumaneqarput.

Kinguaassiutitigut peqqissuunerup pinaveersaartitsinermullu tunngasunik pitsaanerusumik ilinniartitsisoqarnissaanik inuusuttut aamma kissaateqarput, kiisalu aanngajaarniutinik paasissutissanik pissarsiuminarnerutitsinissaq kissaatigalugu. Taamatullu timersornissamut periarfissat orniginarnerusut pilersinneqartariaqartut oqariartuutigineqarluni.

Ittoqqortoormiini inuusuttut nutaamik ornittagaqalernissaaat, Tasiilamilu   pitsaanerusunik silami pinnguartarfeqarnissaq kissaatigisanut ilaapput.

- Inuusuttortatta innersuussutaasa pingaaruteqartut Kommuneqarfik Sermersuup kommunalbestyrelsiata ataatsimiinnerani oqaluuserinissaat, suliassatullu ingerlaqqittussat suliaqarfiginissai qilanaarivara, Avaaraq Olsen kommunip nittartagaani nutaarsiassiineq naapertorlugu oqarpoq.