Nunaqavissut nikalluallattut: Nunatsinniit milliardilikkaanik pissarsiniarnissinni katataanissarput akuersaarsinnaanngilarput

Ittoqqortoormiini najukkami ataatsimiititaliami siulittaasoq Hans Brønlund, Naalakkersuisunut aatsitassarsioqatigiiffiillu pisortaannut marlunnut ammasumik allagaqarpoq. Amerikamiut uuliasioqatigiiffiat Greenland Energy Company Jamesonlandimi pingasunik akuersissuteqartoq Canadamiut aatsitassarsioqatigiiffiat Greenland Resources Qaarsunni aamma akuersissuteqarpoq.

Najukkami ataatsimiititaliami siulittaasoq Hans Brønlund naapertorlugu nunap inoqqaavi suliniutinut peqataatinneqanngillat, taakkualu maanna "tunngaviusumik pisinnaatitaaffiit naleqartitallu naapertuilluartumik agguaanneqarnissaat“ piumasaraat.

"Tusarniaanermi nunaqavissut soqutigineqanngilluinnarput, namminerlu oqaatsigut atorlugit tusarniaatitsisoqanngilaq", taanna oqarpoq.

Nutaamik atuarfittaarnissaq napparsimmavittaarnissarlu piumasarineqartut

Hans Brønlundip allakkamini Namminersorlutik Oqartussat, kommuninilu ingerlatseqatigiiffiit akornanni isumaqatigiissusiornissamut piumasaqaatit pingaarnerit arlallit — Impact Benefit Agreementsimik (IBA-mik) taaneqartartut qaqilerpai — Ittoqqortoormiini meeqqat atuarfiata nutaap aningaasalersorneqarnissaa, najukkami ineriartornermut aningaasaateqarfiup ukiumut minnerpaamik 3 millionit koruuninik aningaasartallip pilersinneqarnissaa aamma imaatigut talittarfiup pilersinneqarnissaa piumasarineqartariaqartut taanna isumaqarpoq.

Aammattaaq imermik pilersuinerup pingaarnersiuinermi salliunneqarnissaa, illunilu tamani perusuersartarfinnik kuutsittakkanik ikkussuisoqarnissaa, nutaamik napparsimmaviliornissaq, utoqqaat illuannik sanaartortoqarnissaa aamma umiatsialerivimmik pilersitsisoqarnissaa piumasaraa.

Aammattaaq innuttaasut suliffissanut salliunneqartarnissaat, aatsitassarsiorfiillu sulisuisa nakorsaannut kigutilerisuannullu saaffiginninnikkut sullinneqartarnissaat pineqarpoq.

Naalakkersuisunut apeqquterpassuit

Hans Brønlundip allagai Naleraq sinnerlugu Inatsisartunut ilaasortamit Mette Arqe-Hammekenimit Naalakkersuisunut apeqquterpassuarnik malitseqartinneqarput.

Jamesonlandimi uuliasiorluni ujaasisoqarsinnaanera piiaasoqarsinnaaneralu qanoq iluaqutissartaqarnersut ajoqusiisinnaanersulluunniit, sumiiffimmik saliinissaq, matusinissaq iluarsaasseqqinnissamullu atatillugu piumasaqaateqarnersoq, kiisalu nunamut, pinngortitamut najukkamilu innuttaasunut annertuumik kingunerlutsitsisoqarsinnaanersoq paasineqarpat Naalakkersuisut uuliasiornissamik suliniut unitsissinnaaneraat, ilaatigut apeqqutigai.

Naalakkersuisoq: Innuttaasut tusaaneqartariaqarput

AAMMA ATUARUK

Ingerlatseqatigiiffik Jameson Landimi uuliasiornissamut 70 millionit dollarinik aningaasaliisoq

Nunanut allanut, inuussutissarsiornermut aatsitassanullu naalakkersuisup Múte B. Egedep, Mette Arqe-Hammekenip §37 naapertorlugu apeqqutai suli akisimanngilai, tusagassiuutitigulli nalunaarummi ernumassutigineqartut — ilaatigut attaveqaatit pitsaanerusut pisariaqartinneqarnerat, najukkami naleqarnerulersitsisoqarnissaa peqataatitsinerullu annertusinissaa — ilungersunartutut isigalugit allappoq.

”Innuttaasut ataatsimiisitsinermi, Ittoqqortoormiormiunik peqataasoqarluarnera qujamasuutigaara. Aatsitassarsiornikkut suliniutit ulluinnarni inuunermut toqqaannartumik sunniuteqartut ineriartortinneqarnerini najukkami innuttaasut tusarneqarnissaat akuutinneqarnissaallu Naalakkersuisut pingaartippaat.”

Suliniutit aallarterlaat

Greenland Resourcesip Malmbjergimi suliniutaa aamma Greenland Energyp Jameson Landimi uuliasiornera suli iluamik aallartissimanngittut, avatangiisinut sunniutinut naliliinerit (VVM) inuiaqatigiinnullu sunniutissat nalilersorneqarnerat (VSB) tamanut suli tusarniutigineqanngitsut Múte B. Egedep erseqqissarpaa. Aamma Namminersorlutik Oqartussat, kommuni ingerlatseqatigiiffiullu akornanni IBA-mik isumaqatigiissutit suli isummerfigineqarsimanngitsut, tassanilu suliniutit qanoq inuiaqatigiinnut iluaqutaanissaat pineqarpoq.

“Ittoqqortoormiini innuttaasut isumaat Naalakkersuisut sulineranni ilanngunneqassapput,” Múte B. Egede oqarpoq.

Avatangiisinut sunniutaasinnaasut nalilersorneqarnerat pingaarutilik

Tamatuma saniatigut suliat tamarmik maleruagassat atuuttut periutsillu aalajangersimasut malillugit suliarineqartartut, Avatangiisinut, Pinngortitamut, Nukissiutinut Ilisimatusarnermullu Naalakkersuisoq Jørgen Rosbach oqarpoq.

”Jamesonlandimi ujaasilluni qillerinerit pilersaarusiorneqarnerannut atatillugu Jamesonlandimi avatangiisinik nalilersuisoqassaaq. Sumiiffiup immikkuullarissuunera avatangiisinilu mianernartuunera tamatumunnga pissutaavoq. Suliaq ilaatigut tamanut tusarniaanissaq, tusarniaanermi oqaaseqaatinik katersineq kiisalu misissuinerit suliaqarnikkullu naliliinerit pisariaqartut suliniutip avatangiisinut sunniutaasinnaaneranik qulaajaanermut atorneqartussat siunertaralugit  nalilersorneqarpoq.” Jørgen Rosbach allappoq.

Nutaarsiassaqartitsivik Danwatch Ittoqqortoormiini pisunik allaaserisaqarpoq, taannalu uuliasioqatigiiffik Greenland Energy Company pingasunngornermi nal. 19.30 innuttaasunik ataatsimiisitsinissamut aggersaasoq ilaatigut allappoq.