Tusagassiivik: DR-ip piviusulersaarusiaa assortuussutaasoq festivalimit piunngitsumit nersornaaserneqarpoq

Piviusulersaarut Orsugiak - Grønlands Hvide Guld qanittukkut Edinburgh Film Awardsimi „piviusulersaarutitut pitsaanerpaatut“ nersornaaserneqarmat ilisimatuup paasissutissiisartullu Naja Dyrendom Graugaardip piviusulersaarusiortullu nuannaarutigaat.

Maannali festivali nersornaallu aningaasarsiorniaannarluni peqquserlunnermi pilersinneqarsimasoq paasineqarpoq. Tamanna Danmarkimi tusagassiorfiup Tjekdet.dk-p misissuinerata takutippaa.

Tusagassiivik inuup ataatsip filmfestivalit 47-t nersornaasiiffiusartut pilersissimagai uppernarsaatissaqarluarpoq.

Festivalit nunarsuarmi illoqarfinnut assigiinngitsunut attuumassuteqartinneqartarput, Tjekdet-ilu naapertorlugu festivalit taakkua taaguutaat festivalinut tusaamasaasunut assingusorujussuusarput. Edinburgh Film Awards piunngitsoq Edinburgh International Film Festivalimut tusaamaneqarluartumut assinguvoq.

Tjekdet naapertorlugu festivalimik aaqqissuussisoq Iranimeersuuvoq, filmiliallu nersornaaserneqarnissaannut innersuunneri annikitsumik akeqartarmata taamaalilluni aningaasarsiorpoq.

DR-ip piviusulersaarusiaa 2025-p aallartinnerani takutinneqarami oqallisaangaatsiarpoq. Ivittuuni kryolitimik piiaaffimmik qallunaat atuinerat pillugu piviusulersaarusiaavoq, kingusinnerusukkullu naatsorsuinerit ilaat aallakaatitassiami saqqummiunneqartut qularutigineqarmata DR-imit peerneqarpoq.

Piviusulersaarulli filmiliornermi ilitsersuisoq Otto Rosing Film.gl-ip ukiumoortumik filminut nersornaasiuttagaanik Innersuarmik nersornaaserneqarmat piviusumik nersornaaserneqarpoq.