Inuusuttut umiatsiamik angalasut ajunngitsut nassaarineqartut — illuaraq ikuallattoq

Angajoqqaat ernumasut, inuusuttuaqqat marluk 17-inik aamma 18-inik ukiullit pillugit politiinut sapaammi ullaaralaakkut nalunaaruteqarput.

Taakku Kangaamiuniit Sisimiunut ingerlaarnerminni apississimanngillat, taamaattumillu angajoqqaat ernumassuteqarlutik oqartussanut saaffiginnittut, pigaartut pisortaat Thomas Jeppesen Sermitsiamut oqarpoq.

Tamanna pissutigalugu politiit Issittumi Sakkutooqarfik suleqatigalugu sineriak ujaasiffigilerpaat, inuusuttut maqaasineqartut nassaariumallugit.

Inuusuttut ajunngitsut sapaammi nalunaaquttap-akunneri sisamat tallimallu akornanni sivisussusilimmik ujaasisoqareersoq, nassaarineqarput.

Illuaraq Ilulissat eqqaaniittoq ikuallattoq, politiinut sapaatip ullaavani kalerriutigineqarpoq.

Politiit qatserisartullu illuaqqamut ornigupput, oqartussaasulli tikiunnerani illuaraq nungulluni ikuallareersimavoq.

Ikuallattoqarnerani inunnik ajoqusertoqanngitsoq, pigaartut naalagaat oqarpoq.

Qaqortumi biilimik tillinniartoqarneranik, politiit sapaammi ullaap tungaani nalunaarfigineqarput. Biilit unnuakkut tillinneqarsimapput, piginnittuatalu illoqarfimmi biilini kussinermut nakkarsimasut sapaatillu ingerlanerani nassaarai.

Pinerluttup nassaarineqarnissaa siunertaralugu, politiiniit biilit aqqutigisimasai misissorneqarput, Thomas Jeppesen oqaluttuarpoq.

Nuussuarmi inuk aanngajaarniutinik sunnertissimasoq hashimik nassaarfigineqartoq

Politiit Nuup ilaani Nuussuarmi sapaammi ullup-qeqqa sioqqullugu angalaarput, tassanilu angut ikiaroornartunik sunnertissimasoq malinnaavigaat.

Angut taanna misissorneqarpoq hashimillu minnerusumik tingummiartoq nassaarfigineqarluni, tamannalu pillugu unnerluutigineqarpoq.

Angerlarsimaffimmi eqqissiviilliortoqarneranik nalunaaruteqartoqarmat, Politiit Nuussuarmut sapaatip unnuaani nalunaaqutaq 03.46 ornigupput.

Tassani politiit arnaq kamaqqasoq peqqarniisaartorlu naapippaat.

- Politiinit naapitsinermini, politiimut tukertaavoq, oqaatsinillu siorasaaraluni. Tamanna pissutigalugu tigusarineqarpoq, oqartussanilu sulisumut attuisimasutut, siorasaarisimasutullu unnerluutigineqarluni, Thomas Jeppesen oqaluttuarpoq.

Imigassartorsimanermut tunngasunik amerlasuunik pisoqarnera aallaavigalugu unnaq taanna politiinit ulapaarfiusimasoq, pigaartut pisortaat oqarpoq.