Islandimi tusagassiortunik katersortitsineq: Issittoq pillugu inuit oqaluttartut amerlanertigut tassaaneq ajorput issittumi najugallit

Naalakkersuisut siulittaasuat Jens-Frederik Nielsen (D) Islandimut ullumi tikippoq, tassanilu Islandip ministeriunissaa Kristrún Frostadóttir Savalimmiunilu Lagmandi Beinir Johannesen ataatsimeeqatigai.

Tikeraarnermi Atlantikup Avannaani suleqatigiinnerup nukittorsarneqarnissaa Issittumilu soqutigisat ataatsimut sammineqassapput.

Naalakkersuisut siuttui pingasut tusagassiortunik maanna katersortitsisuupput.

- Tamatta assigiinnik arlariiusunik unammilligassaqarpugut, aammali periarfissaqarluarpugut, Kristrún Frostadóttir tusagassiortunik katersortitsineq aallarnerlugu taama oqarpoq.

Taassuma oqaluttuaraa naalakkersuisut siuttui pingasut siullermeerlutik ataatsimeeqatigiinnerat ingerlanneqartoq, aalajangertoqarporli ukiumoortumik ataatsimiinnerit ingerlanneqartalissasut.

- Issittoq pillugu inuit oqaluttartut amerlanertigut tassaaneq ajorput issittumi najugallit, taamaattumik ataatsimoornissarput pingaaruteqarpoq, Beinir Johannesen oqaaseqarnermini taama oqarpoq.

Inatsisartut assigiinngitsut sivisuumik suleqatigiittut, naalakkersuinikkulli suleqatigiinnerit qaffanneqarpata, akulikinnerusumillu ataatsimiinnerit ingerlanneqartalerpata, nunanut taakkununnga iluaqutaassasoq, Jens-Frederik Nielsen oqarpoq.

Nunat allat taakkua marluk Kalaallit Nunaannut ukiuni kingullerni tapersersuisimanerannik naggataatigut qutsavigai.

- Tamanna uagutsinnut soorunalimi isumaqaqaaq.

USA-mik isumaqatigiissut

Islandimi tusagassiorfiup Danmarkip, Kalaallit Nunaata USA-llu isumaqatigiissutaat pillugu aperimmani Jens-Frederik quiatsappoq, oqarlunilu tamanna pillugu aperineqarnissani naatsorsuutiginngikkaluarlugu.

- Isumaqatigiissut taanna inatsisitigut pisussaaffiliivoq, kalaallillu namminneq aalajangiisinnaatitaanerat tassani ataqqineqarnera ersersinneqarluni, oqarpoq erseqqissarlugulu illersornissaq pillugu isumaqatigiissut atuuttoq tunngavigalugu isumaqatigiissutaasoq.

- Isumaqatigiissut maanna isumaqatigiissutigisarput, qanoq ineriartortinneqaqqissinnaanera pillugu oqaloqatigiinneq ingerlatiinnassavarput.

Savalimmiut lagmandiata isumaqatigiissutip pitsaasuunera aamma nassuerutigaa.

Aningaasaliissutigineqartariaqartut

Nunat taakku pingasut akornanni suleqatigiittoqassanersoq, tusagassiorfik aperivoq. Suleqatigiittoqarusuttorlu Kristrún Frostadóttir akissuteqarpoq.

- Suliassat arlallit ataatsimut suliniutigilereerpavut, isumaqarpungali attaveqaatit ineriartortinneqarnerannut tunngatillugu unamminartoqartoq takusinnaagipput, Islandip ministeriunerata oqaatigaa.

Taanna oqarpoq aningaasaliisoqartariaqartoq, isumaqarporlu taakkua ataatsimut isigalugit nunap immikkoortuani aningaasaliinissamut tunngavissiisinnaasut.

- Ilisimavarput nunarsuup ilaanut tamatumunnga aningaasaliisartut soqutiginnilluinnartut.

Taakkua pingasut tamarmik eqqaavaat nunap immikkoortua taanna pillugu ullumiummat oqaloqatigiissuteqarsimallutik.

Jens-Frederik Nielsen Naalakkersuisut siulittaasuattut siullermeerluni Islandimut pisortatigoortumik tikeraarpoq, Keflavikimilu sakkutooqarfimmut pulaassaaq.