Piffissami kingullermi nunarsuarmi pisut sammineqarneranni, allaaserisami matumani Nunatsinni ilaqutariit
kisermaallu, taakkualu aningaasaqarnikkut inissisimanerisa samminissaat kissaatigaara.
Pissutsit ataani taaneqartut pissutigalugit.
Piffissami kingullermi nunarsuarmi pisut sammineqarneranni, allaaserisami matumani Nunatsinni ilaqutariit
kisermaallu, taakkualu aningaasaqarnikkut inissisimanerisa samminissaat kissaatigaara.
Pissutsit ataani taaneqartut pissutigalugit.
Aningaasaqarnermut naalakkersuisup erseqqissumik oqaatigaa:
Ukiut qulit tulliuttut aningaasaqarnikkut Nunatsinnut ilungersunartussaapput. Kisianni
ilaqutariippassuarnut tamanna siunissami pisussatut takorluugaanngilaq. Ulluinnarsiutaareerpoq. Inuiaqatigiinni innuttaasut ilarpassui aningaasakilliorput, aamma
Nuummi, amerlasuut qaammammit qaaammammut naammattusaaralutik inuupput. Tamanna nalunaarusiami decembarip 16-ianni 2025-mi saqqummersumi takuneqarsinnaavoq.
Tamatuma peqatigisaanik aamma Danmarkimi aviisini atuarneqarsinnaavoq, Qallunaat aningaasaqarnerat
nukittuumik inissisimasoq. Ilaqutariit aningaasaqarnerat 30.000 koruuninik 2026-imi annertunerussasoq, qaamammut 2.000 koruunit sinnerlugit atuinerusinnaassallutik. Aningaasat
atisanut, sulinngiffeqarnermut, imaluunniit toqqissisimanissamut atorneqarsinnaassallutik. Assigiinngissut erseqqeqaaq. Tasiilami aningaasat ukiumut tiguneqartartut, suli akileraartinnani,
145.000 koruunit missaanniipput, ineqarnermut allanullu akiligassat suli akilertinnagit.
Siorapalummi 100.000 koruunit ataassimavaat. Kisitsisit qangaminngaanneersuunngillat,
ullutsinneersuupput.
Aningaasaqarnermut ilinniagartuutut ukiorpassuarni Kalaallit Nunaat paasiniarsarinikuuara, nunatut pinnagu, kisianni
aningaasaqarnikkut aaqqissuussaaneranut tunngatillugu. Tamatigut uunga killittarpunga: Kalaallit
Nunaata aningaasaqarnera periaatsit naliginnaasut,
inuiaqatigiinnut innuttakitsunut atorneqartartut atorlugit nassuiarsinnaanngilarput. Nunatsinni innuttaasut imminnut qanillutik inuunngillat, ataqatigiinngillat, niuerfittullu imminnut
atanngillat. Innuttaasut ikittuinnaapput, imminnullu ungaseqalutik inuullutik. Inoqarfiit illoqarfiillu pissusissamisoortumik imminnut ataqatigiinngillat, aningaasaqarnerlu niuerfittut ataasiusutut
ingerlanngilaq. Ulluinnarni inuunitsinnut sunniusimasut tassaallutik avinngarusimaqaluta inuugatta, silap pissusiani peqqarniitsumi, inuiaqatigiillu ikittunnguakkutaarluta sumiiffinni assigiinngitsorpassuarni inuugatta.
Apeqqut taamaammat tassaavoq Nunarput
tapiiffigineqarani ingerlasinnaanersoq, kisiannili ilumut piviusorsiornersoq
tamanna ilimagissallugu. Akissut apeqqummut naamiuvoq. Imaanngitsoq kulturerput
imaluunniit sulerusussuseq pillugu, kisiannili issittumi najugaqariaaseq niuernermut tulluartuunngimmat, kisiannili politikikkut aalajangerneq tunngavigalugu pisarmat.
Kisitsisit qangaminngaanneersuunngillat, ullutsinneersuupput
Kalaallit Nunaat nunaassappat nutaaliaasoq,
peqqinnissamik isumaginninneq, atuarfiit, ineqarneq, attaveqaatillu, ingerlalluarpata aningaasanik agguaassineq aaqqissuussaasoq aallaaviusariaqarpoq. Tamanna sanngiiffiunngilaq, kisianili piviusuulluni.
Tamatumani Namminersorluni Oqartussaanermut Inatsit, aningaasaqarnikkullu
isumaqatigiissutit qitiulerput. Isumaqatigiissutaammatali Naalagaaffiit Peqatigiit inuttut pisinnaatitaaffiinut nalilersueriaatsini malunnaatilimmik inerisarneqarsimapput.
Ullumikkut aningaasaqarnikkut isumaqatigiissutit siunertaat kisimik nalilersugassaanngillat, kisiannili sunniussat, piffissaq sivisuup ingerlanerani, inuiaqatigiit pisinnaatitaaffiinut aningaasaqarnikkut, inunnik
isumaginninnermut, kulturikkullu pisinnaatitaaffiit pineqarlutik. Taakku pisinnaatitaaffiit taasinikkut
atorunnaarsinneqarsinnaanngillat, allaammi innuttaasunik taasisitsinikkut atorunnaarsinneqarsinnaanatik.
Naalagaaffimmit tapiissutit nalimmassarnerat piffissap
ingerlanerani annikillisikkiartorneqarpat periarfissat peqqinnissaqarfikkut,
ilinniarnikkut, ineqarnikkulluunniit inuiaqatigiinnut tamanut, politikikkut apeqqutaannaanngilaq,
kisiannili inuttut pisinnaatitaaffinnut aamma tunngalluni. Unnerluutiginninnerunngilaq,
kisiannili pisarialimmik paasinninnerulluni, Naalakkersuisut Qallunaallu rnaalakkersuisuisa isummerfigisariaqagaat.
Nunanit allanit tusagassiuutitigut nalunaarutit sakkortuut sammineqarajuttut pineranni, inuiaqatigiit namminneq iluanni naligiinnginneq annertusiartorpoq. Oqallinneq tassungarpiaq tunngasariaqaraluarpoq. Inuiaqatigiit tatineqarneranni nukittunerulerniassammata.
