Kalaallit
Nunaanni politikki pikkunaallinngisaannartoq
oqartarnikuuvunga allattarnikuullungalu.
Nunap iluani
politikki pisarpara, kingullertigulli nunani allani politikki
qulequttani amerlanerpaani allaaserineqarpoq.
Kalaallit
Nunaanni politikki pikkunaallinngisaannartoq
oqartarnikuuvunga allattarnikuullungalu.
Nunap iluani
politikki pisarpara, kingullertigulli nunani allani politikki
qulequttani amerlanerpaani allaaserineqarpoq.
Politikki
minguttupilussuuvoq, iliuuserineqarsinnaasut tamarmik
atorneqartarlutik. Taamaattumik sumi qanorlu oqaaseqassalluni
ilisimassallugu pingaaruteqartuaannarpoq. Uanga nasiffinniit maanna
takusinnaavarput ukiut arlallit ingerlaneranni sianiilliorlutik
inerisimanngitsumillu politikkikkut periutsit/suliniutit nipituumik
naammaginninngilluinnartumillu oqaluttarnerup kingunerisa
nalliutileruttorfiani. Utertoorfiusarpoq, tamannalu Kalaallit
Nunaanni politikkimi qaffasissumiittunut tamanit ilinniutaassaaq.
Namminiilivinnissaq
qanorluunniit akeqassagaluarpat suaarunneqarpat, nunani allaniittut
ilaasa tusarnaassavaat namminnerlu politikkikkut anguniakkaminnik
siuarsaaniutigalugu. Imaanngilaq Kalaallit Nunaata
namminiilivinnissaanik siuarsaaqataarusuttoqartoq, kisiannili
namminiilivinnissamik kissaateqartut inuiaqatigiinni
avissaartuutsitsiniarlutik politikkikkut sakkussatut
atorneqarumaarput. Tamanna toqqissisimajunnaarsitsissaaq
navianarluinnarsinnaallunilu.
Soorunami
pineqartut tassaapput "§ 21-mik tapersersuisut“-nik
taasakkama ilaat. Angorusutaat paasilluarpara aappaatigulli
kukkulluinnartut politikkikkullu pissutsit ilungersunartuunerat,
inuiaqatigiinnilu toqqissisimanissamik pisariaqartitsinerup
ilumoornera takusinnaanngikkaat isumaqarpunga.
Taamaattumik
akerleriissut tamanna tamat oqartussaaqataanerata ineriartorneranut
nukittussusianullu uppernarsaataavoq. Maanna Naalakkersuisut
misilinneqarnermi tamatumani angusarissaarput. Isumaqatigiinnginneq
inissaqartinneqartariaqarpoq, ersarissumik Kalaallit Nunaat qanoq
iliortariaqartoq oqaatigineqarpoq. Siuarsimavoq, nukittuvoq
siunissamullu neriuutissaalluarluni.
Inuiaqatigiit
inarisimalluarpat nunanullu allanut politikkimut tunngatillugu
akerleriinnernut piareersimallutik? Akissut aap, naamik immaqalu.
(Politikkeritoqaanarpoq). Aap, maanna Naalakkersuisut ersarissumik
iliuuseqartarput suliassarlu naammassilluarlugu. Naagga,
inuiaqatigiit piareersimanngillat sakkutuut pisariaqartut
piareersimasimanngimmata, aamma upalungaarsimanissamut
pilersaaruteqanngimmat, nunap saassunneqartup
piareersimaffigisariaqartagai. Ukraine eqqarsaatigiuk, taanna 40
millionit missaannik inoqartoq ullut tamaasa saassunneqartarnini
akiorniarlugu suli ilungersorpoq. Kalaallit Nunaat tamatumunnga
assingusumik pisoqassappat qanoq periassagami?
Akissutaasinnaagunartumulli.
Qinersinermi tulliuttumi inuiaqatigiit namminiilivinnissamik
kissaateqarnerup taamaaliornissamullu aqqutissap
oqimaaqatigiissaarinissaannut piareersimanersut paasinarsissaaq.
"Paragraf 21-mik tapersersuisut“ ajugaassappata tamanna
innuttaasut kissaatigissavaat, tamatumali politikkikkut inerisimaneq
suli atuutinngitsoq aamma takutissavaa.
Qinersisoqarnissaanut
atatillugu qineqqusaartoq ”manchurian
candidate”-mik taaneqartartuunersoq
kikkut tamarmik eqqumaffigisariaqarpaat.
Qineqqusaartoq avataanit aqunneqartoq, siunertaalu
isertorniarneqartut. Takorloorsinnaaviuk USA tulliani Inatsisartunut
qinersisoqarnerani taamatut tapersersuissasoq? Nunarsuarmi
sumiiffinni allarpassuarni taama iliortarput,
taamaattumik ernumassutigaara taamatut iliuuseqarumaarnissaat.
Tamanna Kalaallit Nunaanni tamat
oqartussaaqataanerisa inerisimaneranut
misilinneqaataassaaq.
