Avannaani Tunumilu aalisartut tapiissutinik pilerinartunik ikiorserniarneqartut

Isorliunerusuni aalisarneq nukittorsarneqassaaq. Tamanna nalunaarummi Naalakkersuisut tusarniaassutigileqqammigaanni siunertaavoq qitiulluinnarlunilu.

Inatsimmi maleruaqqusanut nalinginnaasunut tunngatillugu, aalisariutit angissusaat eqqarsaatigalugit tapiissutinik aaqqissuussineq ima pitsanngorsarneqassaaq:

Aalisariutit 6 meterit 9,5 meterillu akornanni angissusillit inuussutissarsiornermut atorneqartussatut nalunaarsukkat, raajarniarneq kisiat pinnagu allanik aalisarnermut atorneqartussat, pisiarineqarneranni aningaasartuutit tamarmiusut 85 procentii tikillugit tapiiffigineqartalernissaat siunnersuutigineqarpoq — nalinginnaasumik 40 procentiusaraluarpoq.

Angallatit 9,5 meterinit takinerusut pissarsiarineqarnerannut aningaasartuutit 60 procentii tikillugit tapiissutigineqartalernissaat siunnersuutigineqarpoq — nalinginnaasumik 40 procentiusaraluarpoq.

Pingaarutillit aappaat tassaavoq aalisartup nammineq aningaasaliissuteqarnissaanik piumasaqaat. Tassa angallatinut inuussutissarsiornermut atorneqartussanut 6 meterit 9,5 meterillu akornanni angissusilinnut akiligassat 2 procentiinnaat akiligassaraat, angallatinullu 9,5 meterinit anginerusunut 5 procentiinnaat akiligassaraat, maannamut 10 procentit nammineq akiligassarineqartaraluartut.

Tusarniaassutigineqarnera marsip qulingiluaannut killeqarpoq.