Januaarimi kiannerunera aalisarnermut sunniuteqarpoq
Avannaani sikuniaasaartoq kujasinnerusumi saattuaqarneruvoq. Kitaani kiannerunera aalisakkani tunineqartuni malugineqarsinnaasoq Royal Greenlandip ilisimatitsissutigaa.
Nuummi januaarimi ullualuinnaat nittaappoq, aana ullut taakkua ilaanni assilisaq.
Assiliisoq: Oscar Scott Carl
Kalaallit Nunaata
kitaani januaarimi kiannerunera aalisartunit aamma malugineqartoq Royal Greenlandip ilisimatitsissutigaa.
Kiannerunera ilaannut
akimmisaartitsisoq, aalisartut allat periarfissaqarnerunerannnik kinguneqarpoq.
Nunatta kitaani
januaarimi aatsaat taama kiatsiginera DMI-p nalunaarsorsimagaa siusinnerusukkut
allaaseraarput.
Nuummi januaari tamaat
nalinginnaasumit 7,8 gradinik kiannerulluni agguaqatigiissillugu 0,1 gradinik
kiappoq. Illoqarfinni arlariinni aamma
aatsaat taama kiatsigisoq nalunaarsorneqarpoq.
Silap kiannerunera Royal
Greenlandimit assigiinngitsutigut malugineqarpoq.
– Kalaallit Nunaanni
silap pissusia allanngoriartortoq qularnanngilaq. Ajunngitsumik ajortumilluunniit kinguneqarnersoq nalilissagutsigu sumiiffiit assigiinngitsut aalisakkallu assigiinngitsut qiviaqqaartariaqarpagut, saarullinnik saattuanillu tigooraanermi
ingerlatsinermut pisortaq Sten Sørensen taama oqarpoq.
Sikuniaasaarnerata
aalisarneq kigaallatseqqavaa
Pisarnermit
kiannerunera nunatsinni sumiiffinni assigiinngitsuni assigiinngitsumik sunniuteqarpoq.
Avannaani kianneruna malunnaatilimmik kinguneqarpoq. Uummannap sulluani siornamut sanilliullugu sikuniiaasaarneruvoq,
kangerluillu qinngui aatsaat sikoqqammerlutik. Tamanna sikumi qaleralinniartut
kingusinnerusumik aalisalernerannik kinguneqarpoq. Juullimmi nalaani nalinginnaasumik
sikusaraluarami.
– Naak sikoqanngikkaluartoq
sikualoqarpallaarnera peqqutigalugu angalaniarnerat ajornakusoorpoq. Arlalinnilli
peqquteqarlutik aalisarnerat uninngasinnaavoq, soorlu qilaluarniarfiup nalaani,
Sten Sørensen oqarpoq.
Kiannerunera kujasinnerusumi allaanerusumik malugineqarpoq. Kianneruneranimi saattuarniat
ingerlalluarnerupput. Nuummi kujasinnerusumilu maannakkut saattuarniartoqaleruttorpoq.
