Isumannaallisaaneq pingaarnerujussuusariaqarpoq

New Yorkimi aqqusinermi pisutsillunga eqqarsaatigaara arnaq angutaatikuminit unnuaannakkut iserfigitissimasoq, angutaatikualu saavanut periarluni imminut aallaalluni toquttoq. 

Arnap angut nakuusertarmat qimassimavaa.Pisoq alianartoq alla aamma eqqarsaatigilerpara, tassani uiusimasup nuliakuni iserfigisimavaa toqoriarlugulu imminut toqulluni. Arnap angut nakuusertarmat qimassimavaa.

Pisut ilungersunarlutillu kingunerlutsitsingaartut, pineqartut saniatigut qanigisaanut, ikinngutaanut nalunngisanullu anniartitsillutillu aliasungaartitsisut. Ajornerpaasorli tassa taakku kisimik taamak pisimanngimmata. Assingusumimmi pisimasut amerlavallaarput. Immaqalu taakku pinngitsoortinneqarsinnaasimassagaluarput ullumikkornit sakkut pillugit inatsit sukanganerusimagaluarpat.

Justus Hansenip Demokraatineersup Kalaallit Nunaanni sakkut pillugit inatsimmik sukaterinissaq pillugu Inatsisartuni oqaluuserisassanngortitseqqaarnera eqqaamaqqissaarpara. Tamannami pitsaasuuvoq sakkunimmi isumaginninnginnerup inatsisillu naammannginnerisa kingunerisaannik ajornartorsiutit annertoqaat pimoorunneqarlutik isumagineqartariaqartut. Naalakkersuisunit inatsisissatut siunnersuutigineqarnissaanut ukiut 15-it ingerlapput. Maannalu kinguartinneqaqqippoq.

Inatsisissatut siunnersuummi immikkoortut ilai, aallaasit isumannaatsumik toqqorsimatinneqarnissaannut kiisalu aallaasit, atortui paassaasalu immikkoortillugit toqqorsimatinneqarnissaannut tunngasut tassa tapersersorneqaraluarput. Aallaasit akuerineqanngitsumik tiguneqarsinnaannginnissaat atorneqarsinnaannginnissaallu siunertaavoq. Aallaasimik pisinissamut, sananissamut, pigisaqarnissamut atuinissamullu ukiut killissarititaasut 15-inut inissinneqarnissaannut, kiisalu meeqqat aqqaneq marlunnik ukioqalerpata akisussaassusilimmik inersimasumik peqateqarlutik atuisinnaanissaannut tunngasut siunnersuummi isumaqatigiinngissutaapput.

Siumumit tunngavilersuutigineqarpoq, »ukiorpassuarni aallaat atorlugu piniarnermik ingerlatsisimanerput matumani aamma sukateriniarnermi oqimaalutaasariaqartoq, aallaaniarneq piniarnerlu kulturitsinnut ilaalluinnartuuneri eqqarsaatigalugit.

Meeqqat piniartoqarfimmiut aallaammik tigummiaqarsinnaajunnaarsillugit aalajangersaaniarneq tulluanngilaq akuersaarneqarsinnaananilu.«

Taamannak isummerneq pissutigalugu inatsisissatut siunnersuutip aappassaaneerneqarnissaa upernaami ataatsimiinnissamut kinguartinneqarpoq. Ilaqutariit assigiinngitsunik periaaseqarmata ilisimavara. Inuiattut meerartatta ukiornissaanut, nalliuttunut ulluinnarnullumi ileqqaarnissamut aalisarnermik, piniarnermik katersuinissamillu ilisimasatsinnik ingerlatitseqqiffiginissaat inuiattut tulluusimaarutigalugu ileqqorivarput.Tamannalu attatiinnassavarput. Meerartattami perorsarneqarneranni naleqartitatta, ileqqutta kulturittalu ilinniartitsissutiginissaat pingaarutilimmik ilaavoq.

Apeqqulli aana: Piniarnermik aallaaniarnermillu kulturerput innarlerneqassava meeqqat aqqaneq marlunnik ukioqalerneranniit aallaasinik isumaginninnermik ilinniartinneqartalerpata? Ilumut kingusinaarnerussava? Imaluunniit meeqqat tarnikkut timikkullu ineriartornerannut tulluarnerua?

Apeqqummimi pingaarutilerujussuarmik eqqarsaatigisassaqarpugut. Oqaluttuarisaanitsinnimi amiilaarnartumik piniutitsinnik taakkuninnga immitsinnut allanullu ajortumeerisarsimavugut. Qanigisatsinnik, ilaquttatsinnik suleqatitsinnilluunniit tamatta annaasaqarsimavugut. Taamaammat isumaqarpunga sakkunik atuisarnitsinnik allannguineq piniarnermik kulturitsinnut sanngiillisaanngitsoq. Akerlianilli isumaqarpunga sukaterineq nukittuunngortitsissasoq, oqaluttuarisaanitsinnimi amiilaarnartunut akuersaannginnitsinnik takutitseqataassaaq. Sakkut piniutaapput. Inummik allamik siorasaarinermut toqutsinermulluunniit atugassiaanngillat.

Inuit illersorniarlugit isumannaallisaaneq pingaarnerujuartariaqarpoq. Taamaanngippammi piniarnermik kulturitsinnut tulluusimaarutigisatsinnut imaqanngitsumik utoqqatsissutaannaassaaq.