Japanimiu Siorapalummi piniartoq toqusoq eqqaaniarneqartoq

- Kalaallit Nunaat silarsuaq tamakkerlugu najugarissallugu pitsaanerpaavoq. Illoqarfimmi suligaluaraanniluunniit soraarfiup kingorna avatangiisipiluunersuaq sanitsinniippoq. Kimulluunniit ammavoq. Suna tamarmi piniagassarpassuaqarpoq. Taamaammat avatangiiseq peqqissaarunneqartariaqarpoq, Ikou Oshima, KNR TV-p 2017-imi aallakaatitaani nangeqattaartuni  "Inughuit Nunaat"-nni peqataanermini ilaatigut oqarpoq.

Ikou Oshima septembarip arfineq pingajuanni toquvoq. Avannaata Kommuniani borgmesterip, Lars Erik Gabrielsenip (S), kommunimi ukiorpassuarni innuttaasoq eqqaaniarlugu misiginneqataalluni allaatigisamini ima aallartippoq.

- Ikuo Oshima ulloq 10. juni 1947 Tokyo-mi inunngorpoq, qatanngutigiinni pingasuusuni akulliuvoq. Qaqqasiortut klubianut ilaasortaasimavoq, Japanillu avannaani, piffinnilu allani qaqqasioqataasarsimalluni. Takorluugarisimavaa issittumi angalasinnaaneq, ukioq 1972 november-imi piviusunngorpoq, misigisassarsiorumatooq Naomi Uemura-i Siorapalummiittoq ornikkamiuk, borgmesteri allappoq.

Ikou Oshima tamanna ukiumik ataatsimik sioqqullugu Nihon Universitet-imi produktionteknik ingeniør-itut, tassa sanaartornermut teknikkimik ingeniøritut, 1971-imi naammassivoq.

Ikuo Oshima avanersuarmukaqqaarami 25-nik ukioqarpoq. Ikou Oshimap taamani nunaqqatitaavissa aallaqqaammut taagorsimavaat "Ikuuha". Piniartorsuartulli ilikkaramikku taagulersimavaat "Ikoorruaq". Utoqqalillunili piniarunnaarami "Ikuunnguaq"-mik taagorneqarusussimavoq. Tassagooq utoqqarmut pinerrarikkunnaarami millillunilu.

Avanersuarmiut utoqqaat Oshimap tikeqqaarnera eqqartuleraagamikku ilaatigut ima oqartarsimapput: "Tikeqqaaramigooq inuttut isikkoqarpoq ilisimasaqarpasinngitsoq."

Ikuo Oshima Siorapalummi 1972-imi ukiivoq. Tamanna sioqqullugu ukiinissamut akuersissummik pissarsinissaminik Danmarkimi qaammat ataaseq sinnerlugu utaqqivoq. Utaqqinini KNR TV-p aallakaatitassiaani aamma oqaluttuaraa.

Qaanaamut tikinneq

Ikou Oshima ukioq ataaseq Kalaallit Nunaanniinnissaminut akuersissuteqarsimavoq. Siorapalummi issittumi inuusinnaaneq piniarnerlu ilinniarpai. Piniartut najugaqartullu ilitsersuisoralugit, pingaarnertut Kaugunnaq Qissuk ilitsersuisoralugu.

Japanimiup Qaanaamut tikinnini KNR TV-mut 2017-imi ima oqaluttuaraa.

- Taamani Qaanaarmiut point-innassimasut nalaarlugit tikippunga. Novembarip naanerani. Tupinnaqaaq inuit tamarmik putumasut. Ilai silami sinittut. Isumaqatigiinngillutik paasut. Ilaat qingamikkut aanaartut, qingaani kigutit ineqarlutik, Ikou Oshima illarluni Qaanaamut tikinnerminik oqaluttuarpoq. Nangipporlu:

- Kisianni inussiarnersut assut. Tikinnginnera sioqqullugu qallunaat nunaanni akuersissutitaarniarlunga qaammat sinnerlugu utaqqivunga. Qallunaat Nunaat allaagami, inussiarnersoqannginnami. Taamaammat manna eqqissisimanarivara, oqarpoq.

Ikou Oshimap qiimasuunini, illarumatuninilu ilisarnaatigilluarpai.

Ikou Oshima Japanimiutut innuttaassuseqarpoq, najugaqarnissamut inuussutissarsiorsinnaanermullu akuersissummik pissarsisarluni. Akuersissullu kingulleq pissarsiaa sivisuujuuvoq naassaanngitsumik atuuttoq.

Kalaallit Nunaanniinnissamut akuersissutini 1973-imi naasussanngormat Japanimukaqqikkallarpoq. Japanimiinnerali sivisunngilaq. Ukiup tulliani Siorapalummukaqqereerpoq. Ukiinermini inughuit oqaasiinik paasinnilaartalersimanini tunngavigalugu filmiliorniartumut taamani ikiuuppoq. Taamanimit toqussani tikillugu avanersuarmi najugaqarpoq. Ilaquttanilu ukioq ataaseq, Qaanaap ungasinngisaani, Qeqertarsuarmi ukiisimanertik aamma KNR TV-mut unikkaaraa.

Katittussanngornertik radiokkut paasigaat

Ikou Oshimap nuliassani Anna Manumina Siorapalummi naapippaa. Arnaq taanna ataatamini Arruttarsuaq Manuminami taamani najugaqarpoq. Aappariit taakkua katittussanngornertik 1974-imi Siorapaluup avannaarsuanut, Etah-mut, aasami piniariartornerminni radiokkut nalunaarutit tusarnaarneranni paasivaat.

- Anna Manumina Ikuo Oshima-lu, ulloq aalajangersimasoq Augustimi 1974-imi Siorapaluup Oqaluffiani katissasut. Etah-imiillu Siorapaluliaqquneqartut. Sunaaffa Siorapalummi utoqqaanersap Inuutersuaq Uvdloriaq ningaartaarusullutik, Qaanaamut palaseqarfimmut nalunaarutigisimagai, Avannaata Kommunia allappoq. Katinnissartik akuerisimavaat Siorapalummullu katikkiartorlutik.

Ikuo Oshima Anna Manuminalu tallimanik meeraqarput. Arnat sisamat angullu ataaseq. Toku Oshima, Magssannguaq Oshima, Mika Oshima Etah, Mami Oshima Skade aamma Aya Oshima.

Ammerineq iparaatsiornerlu

- Ikuo nulianilu piniartorsuarnik ilinniartilluarneqarnikuupput, piniakkat pissusaannik, silap pissusaannik kiisalu ammerinermut mersornerullu tungaatigut. Marluullutik kulturimik pingaartitsisuupput, borgmesteri allappoq. Ikou Oshimalu pillugu ima nangippoq:

- Ukiut 50-it missaani piniartutut inuussutissarsiuteqarpoq, ukiut tamarluinnaasa qimussertarpoq pisinnaajunnaarnissani ukioq 2026 tikillugu. Inuk tamatigoortoq, eqqarsartoq, aalajangersimasoq pimoorussisoq, illarumatooq, tunniussaqarusuttoq.

Nuliariittaaq taakkua inuusuttorpassuarnut perorsaaqataanikuusut, inooqataanissamut, piniarnissamut, ammerinikkut, mersornikkullu ilitsersuussisarlutik tapersersuisarnikuusut, kommuni allappoq. 

- Issittumut naleqquttunik atisassaqartitseqataasarsimapput, nunaqqatiminnut, issittormiunut allanut aammali ilisimasassarsiorlutik angalasunut.

Ikou Oshimap KNR TV-kkut aallakaatitami, issittorsuarmi kialaarnissani anguniarlugu, uumasut pisami ammii atorlugit nammineq imminut atisaliuuttarnini, piniutissaminillu suliaqartarnini aamma oqaluttuaraa. 

- Atortussakka atisassakkalu tamaasa nammineq suliarisinnaavakka, taanna oqarpoq.

Ikou Oshima iperaatsiullaqqissutsimik tusaamaneqarpoq. Allunaat piniartunit ilinniartinneqarnermisut suliarisarai, Kalaallit Nunaanni nunanilu allani qimuttoqarfinni iperaatsiai iluarineqarlutillu piumaneqartaqisut, meerai aamma allapput. 

- Iparaattanik kisissaanngitsunik sananikuusimavoq pisiniarfinnut, peqatigiiffinnut, tunissutissanut namminerlu atugassanik.

- Aammali ammerinermut atortunik Avanersuarmiut atortagaannik sannarissorsuuvoq, arnallu ammeriinnarnissaannut atortussaqartitsisooqataalluni. Tunissuteqartarsimavoq sanaassisarluni ammererusuttunut, meerai allapput.

Ikou Oshimap Japanimut angerlaqqinnissani naatsorsuutiginngilluinnarlugu, KNR TV-mut 2017-imi oqaluttuarnermi ilaani aamma oqarpoq. 

- Japanimut angerlarneq atorfissaqanngilaq. Aasap kiannersuini immaqa uumasinnaanngilanga, taanna illarluni oqarpoq.

Ikou Oshima nunaqarfimmi qimallugisamini, Siorapalummi ilisaavoq.

- Eqqaaneqarnera ataqqinartuuli, Lars Erik Gabrielsen allappoq.