Jens-Erik Kirkegaard: Nunaga pillugu sulinissamut piareersimavunga

Avatangiisinut, pinngortitamut, nukissiornermut ilisimatusarnermullu naalakkersuisunngortup aperineqarnissani naatsorsuutiginngikkaluarlugu inuiaqatigiinnut tunniussaqarsinnaalluni misigivoq.

Jens-Erik Kirkegaard (D) Nivi Olsenip (D) sapaatip akunnerata siuliani tunuarnerata kingorna Naalakkersuisunut ilaasortanngorpoq.
Saqqummersinneqarpoq

Jens-Erik Kirkegaard (D) nikittoqareersoq maanna avatangiisinut, pinngortitamut, nukissiornermut ilisimatusarnermullu naalakkersuisunngorpoq.

Qinigaanngilaq, Demokraatilli sinnerlugit naalakkersuisunngortinneqarpoq.

- Aperineqarama eqqarsaatigeqqaarpara, kisianni akuersivunga. 2019-imiilli Demokraatini ilaasortaavunga. Kisianni tapersersuisutut naalakkersuisunngorsinnaanerlunga aperineqarnissara naatsorsuutigisimanngilara, Jens-Erik Kirkegaard Naalakkersuisunut ilaasortanngornermi kingorna Sermitsiamut oqarpoq.

Jørgen Rosbachip (D) akisussaaffii tigussavai, taannalu ilinniartitaanermut, kulturimut, timersornermut ilageeqarnermullu naalakkersuisunngussaaq.

- Tulluusimaarutigaara, inuiaqatigiinnut tunniussaqarsinnaasutut misigalunga pissanganartumillu suliassinneqarama nuannaarutigaara, Jens-Erik Kirkegaard oqarpoq.

Taanna suliassaminut nutaamut tunngatillugu paasisaqarnerunissani qilanaaralugu, oqarpoq.

- Soorunami suliassakka pillugit ilisimasaqarpunga, naalakkersuisoqarfinniilernissaralu qilanaaraara.

- Nunaga pillugu sulinissamut piareersimavunga, taanna naggasiivoq.

Jens-Erik Kirkegaard Siumumi ilaasortaasimasoq 2013-imi Inatsisartunut qinigaaqqaarpoq. Inuussutissarsiornermut, aatsitassanut kingusinnerusukkullu suliffeqarnermut 2014-ip tungaanut naalakkersuisuuvoq. Inatsisartunut qinigassanngorteqqinniarnani 2018-imi aalajangerpoq aappaaguanilu Demokraatinut ilanngulluni. Tunngaviusumik inatsisissaq pillugu isumalioqatigiissitami 2020-mi sinniisunngorpoq.

Powered by Labrador CMS