Jens-Frederik Nielsen Barcelonami nersornaaserneqarpoq

Naalakkersuisut siulittaasuat Jens-Frederik Nielsen (D) ulluni makkunani Spaniamiippoq, Barcelonamilu Spaniamiut aviisiannit ataasinngornermi nersornaaserneqarpoq.

Jens-Frederik Nielsen Facebookimi ima ilisimatitsivoq:

- Inuiaat kalaallit tamat oqartussaaqataanerannut aammalu nunatta siunissaa pillugu aalajangiisinnaanissatta tamaviaarutigisimammassuk, kalaallit sinnerlugit nersornaat tiguara. Tamanna pissusissamisoorpoq, Naalakkersuisut siulittaasuat oqarpoq.

Jens-Frederik Nielsen USA-mit tatineqarnini qanoq iliuuseqarfigisimaneraa pillugu nunanit tamalaanit nersornaammik aviisimit La Vanguardia-mit tunineqarpoq. Isumaginninnera USA-p nunanut allanut atassuteqaatinik malinninnissamut akuersineranik kinguneqartoq aviisi naliliivoq.

La Vanguardia naapertorlugu Jens-Frederik Nielsen qujaniutitut oqalugiarnermini nunat tamalaat inatsisiinik namminerlu oqartussaanerannik ataqqinninnissamik kajumissaaruteqarpoq:

– Nunarsuarput sorsunnersuup kingulliup kingorna najoqqutassiarineqartunik tunngaveqartoq illorsortariaqarparput – najoqqutassat inuit pisinnaatitaaffiinik namminerlu naalakkersuisinnaanermik tunngaveqartut. Nunarsuaq akerleriinnikinnerusoq taamaalilluta pilersissavarput, Jens-Frederik Nielsen La Vanguardia naapertorlugu taama oqarpoq.