Jens-Frederik Nielsen: Erseqqinnerusumik qisuariartariaqarpugut
Naalakkersuisut siulittaasuat Jens-Frederik Nielsen præsident Donald Trumpip Kalaallit Nunaannik tiguaarusunneq pillugu oqaaseqaqqinneranut qisuariarpoq. - Alianaraluartumik nalunaarut ataqqinninnginnermik takutitsivoq. Ersarinnerusariaqarpugut. Nunalli allat tapersersuinerat aamma qujamasuutigalugu, oqaatigaa.
Jens-Frederik Nielsen (D) Københavnimi EU-mi nunat siuttuisa ataatsimiinneranni peqataavoq. Donald Trumpip Kalaallit Nunaannik tiguaaniarnerminik kissaateqarluni oqariartuuteqaqqinnerani nunat tamalaat Kalaallit Nunaannik Danmarkimillu tapersersuinertik maanna aammaarlutik erseqqissarpaat.
Assi: Ida Marie Odgaard/Ritzau Scanpix
Ulloq aallartipparput paasillugu erseqqinnerusumik iliuuseqartariaqarnerput ersersinneqartoq. Naalakkersuisut siulittaasuata Jens-Frederik Nielsenip marlunngornermi ullaakkut oqaasii taama ersaritsigipput.
- Uagut Inuiaat Kalaaliusugut taamaattussaannartut isigineqassanngilagut. Inuiaajuvugut oqaluttuarisaanikkut, kulturikkut, demokratii atuutsinneqarneranullu nukittuumik inissisimasut. Nunatut killeqarfitsinnik siunissatsinnillu akisussaaffeqarniarluta sulivugut. Killeqarfitsinnik ataqqineqarnissarput aammalu nammineq aaliangiisinnaassuseqarnissarput inuit pisinnaatitaaffiini nunallu tamalaat akornanni inatsisini naqissuserneqaqqavoq, tamannalu avaqqutaarneqaannarnavianngilaq, Jens-Frederik Nielsen facebookimi allappoq.
Donald Trumpip ataasinngornerup unnuaani tusagassiortunik katersortitsinermini Kalaallit Nunaata tigunissaanik kissaateqarnini uteqqippaa, Kalaallit Nunaat USA-p nunap sillimanissaanut pingaaruteqarnera tunngavilersuutigalugu.
Jens-Frederik Nielsenilli tamanna aliasuutigaa, erseqqissarlugu USA-mit nalunaarutit uteqattaartut Kalaallit Nunaata nammineq aalajangiisinnaaneranik ataqqinninnginnermik ersersitsinerarlugit:
- USA-p præsidentiata unnuaq tusagassiortunik aggersaanermini nunarput tigunissaa kissaatigalugu naqissuseqqimmagi suli ersarinnissatsinnut naqissusiivoq. Oqaatsimigut Nunarput ataqqinagu illersornissamut pissaanermullu kisimi tunngatillugu eqqartuivoq.
Tapersersuinermut qujamasungaarneq
Jens-Frederik Nielsen ataasinngornermi oqarpoq USA-p Kalaallit Nunaannut immikkut aallartitamik toqqaanissamik pilersaaruteqartoqarnera nunatsinnut eqqaaneqarsimanngitsoq. Amerikamiut ambassadøria sapaatit akunneri marluk matuma siorna Kalaallit Nunaannut tikeraarneraniluunniit pilersaaruteqartoqarneranik qaqitsisoqanngilaq.
Ukioq manna siusinnerusukkut nunanit soorlu Frankrigimit, Islandimit Tysklandimillu aamma EU-mit nuimasut Kalaallit Nunaannut tikeraarput tapersersuinertik ersersinniarlugu.
Naalakkersuisut siulittaasuata qujamasuutigaa nunat arlallit ulluni makkunani Kalaallit Nunaannut Danmarkimullu tapersersuinertik erseqqissarmassuk:
- Nunattalu avataaniit siuttut suleqatigisallu ersarissumik nunatsinnut, inuiaqatigiiusugut demokratiillu maani atuutsinneqarneranut inuit pisinnaatitaaffiini aaliangiisinnaassuseqarnissatsinnut ataqqinnillutik tapersiisut qujaffigerusuppakka. Tapersersuineq tamanna kisimiinngitsugut ersersiinnarpaa.
