Jens-Frederik Nielsen kuultimik nersornaaserneqartoq

Naalakkersuisuni siulittaasoq Jens-Frederik Nielsen (D) kuultimik ataasinngormat nersornaaserneqarpoq.

Inatsisartut siulittaasuannit Kim Kielsenimit saqqarmiulerneqarpoq, taassumalu Jens-Frederik Nielsenip politikimik suliaqarnera pillugu nersornaaserneqartoq tusagassiuutitigut nalunaarutigaa.

Inuussutissarsiornermut aatsitassanullu 2020-mi naalakkersuisunngorpoq, ukiumilu tassani Demokraatit siulittaasuattut aamma qinigaalluni.

Kim Kielsenip oqalugiaammini Jens-Frederik Nielsen politikkikkut siuttutut piginnaasai nersualaarpai:

- Inuiaqatigiinni kalaallini inuttut nuimasutut pingaarutilittullu inissisimavutit aammalu Naalakkersuisunut ilaasortatut naalakkersuinikkut ingerlatanik pingaarutilinnik arlalippassuarnik ataatsimoornitsinnut toqqaannartumik sunniuteqarsimasunik ilusilersueqataasimallutit. Minnerunngitsumik Kalaallit Nunaata nunarsuarmi sumi inissisimanini pissutigalugu, nunanullu allanut tunngatillugu naalakkersuinikkut ilungersunartumik inissisimanerani ataatsimoortitsisinnaanermik piginnaasaqarnerit takutissimavat.

- Naalakkersuinermik ingerlatani ajornakusoortuni aqutsisinnaassuseqarnerit tamatsinnut kajumissuseqalersitsisimavoq. Kalaallit Nunaat sinnerlugu malunnaatilimmik oqaaseqartartuuginnanngilatit aammali attaveqaatinik pilersitsisimavutit nunat ingerlataqartullu assigiinngitsut akornanni suleqatigiinnermik pilersitsiviusumik. Inuit assigiinngitsunik tunuliaqutillit ataatsimoortilersinnaasimavatit, taamaalillutillu sumiikkaluaraangavilluunniit peqataatitsinerulersimallutillu oqaloqatigiinnerunissamik ujartuinermik pilersitsisimallutit, Kim Kielsen ilaatigut oqarpoq.

Kuultimik nersornaasiineq aalajangersakkat malillugit ukiumut ataasiarluni tunniunneqartarpoq. Kuultimik nersornaat Namminersorlutik Oqartussanit pigineqarpoq, nersornaaserneqarnikullu toqukkut qimaguppata Namminersorlutik Oqartussanut uterteqqinneqartarluni.