Jens-Frederik Nielsen: Naalakkersuisooqatigiinnissamut isumaqatigiissut allanngussappat nalunaassaagut

Naalakkersuisut naalakkersuisooqatigiinnissamut isumaqatigiissut nalilersortuarpaat, nutaamillu isumaqatigiissuteqartoqassappat tamanna aamma nalunaarutigineqassaaq, Naalakkersuisut siulittaasuat Jens-Frederik Nielsen (D) naalakkersuisunngortunik nuannaarutiginnittoq oqarpoq.

Jens-Frederik Nielsen Naalakkersuisut nutaanngorpai. Naalakkersuisut nutaat ataasinngornermi 16 november akuerineqarput.
Saqqummersinneqarpoq

Naalakkersuisooqatigiinnissamut isumaqatigiissummik atsioqataasunit sisamaasunit marluk atsiornerup kingorna ukiup aappaa avillugu qaangiuttoq Naalakkersuisuni ilaasortaajunnaarput.

Tamanna Naalakkersuisut siulittaasuata Jens-Frederik Nielsenip (D) Sermitsiamut nassuerutigaa.

- Ilumoorpoq naalakkersuisooqatigiinnissamut isumaqatigiissummik partiini atsiortuni sisamaasuni marluk suli atammata. Naalakkersuisut naalakkersuisooqatigiinnissamut isumaqatigiissut nalilersortuarpaat, nutaamillu naalakkersuisooqatigiinnissamut isumaqatigiissuteqassagaluarutta nalunaarutigissavarput, Jens-Frederik Nielsen Sermitsiamut oqarpoq.

Naalakkersuisooqatigiinnissamut isumaqatigiissut USA-p præsidentianit tatineqangaarnermi Naalakkersuisooqatigiinnissami naligiissitaaneq, nammineersinnaassuseq ataatsimoornerlu tunngavigalugit isumaqatigiissutigineqarpoq.

- Naalakkersuisooqatigiinnissamut isumaqatigiissutip tunngaviusumik sinaakkutissai ajorinngilagut.

- Soorunami naalakkersuisooqatigiinnissamut isumaqatigiissut nalilersortuassavarput, oqarpoq.

Piffissaanngitsukkut qinersisoqassanngilaq

Innuttaasut arlallit akerliussutsimik sapaatip-akunnerani kingullermi takutitsipput, qinersisoqarnissaalu piumasaralugu.

- Qinersisoqassanngilaq.

- Oqaatigerusuppara inuit attaveqaqatigiittarfiisigut oqallinneq sakkortooq maluginiaratsigut. Maligassiuerusuppugut oqallinnerullu taama sakkortutiginnginnissaa qulakkeerniarlugu, Jens-Frederik Nielsen naggasiivoq.

Powered by Labrador CMS