Jens-Frederik Nielsen Piers Morganimit apersorneqarnermini: Nunatta minnerpaartanngualuunniit tunniunnavianngilarput
Nunatta minnerpaartanngualuunniit tunniunnavianngilarput, Jens-Frederik Nielsen tusagassiortumit Piers Morganimit apersorneqarluni oqarpoq. Aamma kalaallit USA-mit dollarinik siunissami akilerneqarlutik nunaminnut aalajangersinnaassuseqarunnaarsinnaanerat takorloorneqarsinnaanngitsoq oqarpoq.
- Nunatut killeqarfivut oqartussaassuseqarnerpullu tatineqarniarsarissappata, taava killissamik qaangiinerusoq oqaatigisinnaavara. Nunatta minnerpaartanngualuunniit tunniunnavianngilarput, Jens-Frederik Nielsen oqarpoq.
Foto: Oscar Scott Carl
Naalakkersuisut siulittaasuat Jens-Frederik Nielsen (D) Piers Morganip aallakaatitassiaani Uncensoredimi, YouTube-kkut millionilinnik malinnaasoqartumi, pingasunngormat apersorneqarpoq.
Tuluit Nunaanni tv-kkut aallakaatitassiami saqqummiisartumit tusagassiortumillu Piers Morganimit apersorneqarpoq, tassani ilaatigut USA Danmarkimik/Kalaallit Nunaannik isumaqatiginninniarnermigut Kalaallit Nunaata ilaani sumiiffiinnut minnerusunut oqartussaassuseqalersinnaanersoq aperineqarpoq. Taamaaliornikkut naalagaaffissuaq sakkutooqarfilersorsinnaassalluni.
Jens-Frederik Nielsenip 1951-imi illersornissamut isumaqatigiissut tunngavigalugu Amerikamiut Kalaallit Nunaanni sakkutooqarfiat Pituffik Space Base pioreersoq, aamma Kalaallit Nunaat isumaqatigiissutip tamatuma iluani iliuuseqarnerusoqarsinnaannginneranik oqarsimanngisaannartoq oqaatigaa.
Killissamik qaangiineq
Kalaallit Nunaatali ilaanut oqartussaassutsimik pisinnaatitaaffiliisoqanngisaannassasqo Naalakkersuisut siulittaasuata oqaatigaa:
- Nunatut killeqarfivut oqartussaassuseqarnerpullu tatineqarniarsarissappata, taava killissamik qaangiinerusoq oqaatigisinnaavara. Nunatta minnerpaartanngualuunniit tunniunnavianngilarput.
- Nunatsinnut oqartussaassuseqarnerput tunniutiinnarnavianngilarput, Jens-Frederik Nielsen oqarpoq. Aamma killeqarfiit oqartussaassuseqarnerillu ataqqineeruppata nunarsuup sinneranut sunniuteqassasoq oqarpoq.
Trumpimmi neqeroorfigippasi?
Donald Trumpilli Kalaallit Nunaat kingusinnerusukkut namminiilivinniarluni aalajangerpat, kalaallit tamaasa 100.000 dollarsinik tunissallugit neqerooruteqarsinnaanersoq Piers Morganip Jens-Frederik Nielsen aamma aperaa.
Jens-Frederik Nielsenip taamatut pisoqarsinnaannginnerarpaa:
- Innuttaasut 65 procentii sukkasuumik namminersulivikkusussimasuuppata qinersinermi ajugaasimanavianngikkaluarpunga, Jens-Frederik Nielsen oqarpoq, taassumalu namminiilivitsinnani peqqinnissakkut, aningaasaqarnikkut allatigullu qajannaatsumik tunngavissaqarluartoqartariaqartoq aamma erseqqissarpaa.
Nammineq aalajangiisinnaatitaaneq Namminersorlutik Oqartussanut inatsimmi akuerineqartoq aarlerinartorsiortunneqassanngimmat Kalaallit Nunaata Danmarki maannakkut toqqaraa uteqqippaa. Kalaallit aamma pisiarineqarsinnaanerarlugit oqalunneq narrujuumminartuunerarpaa:
- Siunissami namminiilivissimagaluaruttaluunniit kalaallit inuiaat pisiarineqarsinnaanngillat.
- Kalaallit namminneq aalajangersinnaassusertik dollarinik akilerlugu tuniunnanngilaat. Taamaattoqanngisaannassaaq. Inuiaavugut tulluusimaartut.
Ataqqinnittumik oqaloqatigiinnissamut kajumissaarisoq
Jens-Frederik Nielsenip USA-mik suleqateqarnerulernissaq pillugu isumaqatiginninniarnissaminut piareersimalluni naqissuserpaa.
- Iligiit akornanni eqqissisimasumik ataqqeqatigiittumillu oqaloqatigiittoqarli, Jens-Frederik Nielsen kajumissaarivoq.
Jens-Frederik Nielsenip apersorneqarnerani aalakaatitassiaq tamakkiisoq YouTubemi isiginnaarneqarsinnaavoq:
