Jens-Frederik Trumpip toqqaanerata kingorna: Ataatsimoorpugut nikisitassaanatalu

Naalakkersuisut siulittaasuat Jens-Frederik Nielsen (D) ataasinngornermi ullaakkut eqqissisaavoq, tamannalu pilluni Donald Trumpip unnuap ingerlanerani nalunaarutigereeraalu Nunatsinnut immikkut aallartitamik toqqaasimalluni.

- Ullaaq manna itersimalerpugut Amerikap præsidentiata Nunarput pillugu immikkut aallartitamik toqqaasimanerminut atatillugu pilluta oqariartuuteqarsimasoq. Annertuutut isigineqarsinnaavoq. Kisianni uatsinnut tamanna allannguissanngilaq, Jens-Frederik Nielsen Facebookimi quppernermi allappoq.

Jens-Frederik Nielsenip Nunarput Kalaallit pigimmassuk erseqqissarpaa:

- Siunissarput nammineerluta sanarfissavarput. Kalaallit Nunaat uagut pigaarput. Demokrati immitsinnik pigisarput, aaliangiisinnaaneq nammineq pigisarput aamma ataatsimoorneq nukittooq nikisitassaanngitsoq.

Suleqatigiinneq ataqqeqatigiinnikkut pissaaq

Siornatigut arlaleriarluni erseqqissaasarsimanermisut USA-mik suleqateqarnermi Kalaallit Nunaat ataqqineqassasoq erseqqissarpaa:

- Nunanik allanik, aamma USA-mik, suleqateqarusuppugut, tamannali tamatigut uagutsinnik ataqqinninnermik pingaartitatsinnillu kissaatitsinnillu tunngaveqartariaqarpoq.

- Ernumassutissaqarnissamut pilersitsissanngilaq. Ataatsimoorpugut nikisitassaanatalu, Naalakkersuisut siulittaasuat allappoq.

Nunanut allanut ministerip aallartitaq oqaloqatiginiarlugu aggersaraa

Jens-Frederik Nielsen marsimi qinersisoqareermat naalakkersuisoqatigiinnik siamasissunik pilersitsivoq, ilaatigut Donald Trumpimit tatineqarnermut qisuariaatitut.

Nunatsinni unnuarortoq Donald Trump inoqatinut attaveqaqatigiittarfimmini Truth Socialimi allappoq Louisianami guvernøri Jeff Landry USA-p Kalaallit Nunaannut immikkut aallartitassaatut toqqarsimallugu.

Landry tamatumunnga atatillugu oqarpoq, Kalaallit Nunaata USA-mut ilanngunnissaanut peqataanissani qilanaarinerarlugu.

Trumpip taama toqqaanini sioqqullugu Kunngeqarfik Danmark ilisimatissimanngilaa, nunanullu allanut ministeri Lars Løkke Rasmussen ataasinngornermi ullaap tungaani oqarpoq, Ken Howery aallartitaq aggersarumallugu tamanna pillugu nassuiaaffigineqarusulluni.