KL

DK

Jeremiassenip Landry attaveqarfigileqqikkaa: Qasigiannguanut qimusseriarnialersaarpoq   

USA-mi præsidentip nunatsinnik tiguaanialersaarnermi nalaani nunatsinnut immikkut aallartitaa, guvernøri Jeff Landry, qimusserfissanngorpat Qasigiannguanukarataannaavoq. Inatsisartunummi ilaasortap Kristian Jeremiassenip (IA), aamma Qasigiannguani takornarialerisuusup, nunarput, Danmark USA-lu atsioqatigeereersullu guvernøri attaveqatigeqqilersimallugu oqaluttuarpoq.

Kristian Jeremiassen Inatsisartunut ilaasortaanermi saniatigut ilaqutariillutik takornariartitsivitsik, Experience Qasigiannguit, ingerlataraa.
Arnaq Nielsen Arnaq Nielsen tusagassiortoq
Saqqummersinneqarpoq

Nunarput, Danmark USA-lu atsioqatigeereersullu nunat taakkua akornanni silaannaq qatsoriartoqqitutut ippoq. 

Kristian Jeremiassenip takornariaqartitsivitsik, Experience Qasigiannguit, aqqutigalugu Jeff Landry Avannaata Qimussersuanut ukioq takuniaaqqullugu qaaqqoreeraalu KNQK sakkortuumik isornartorsiuinikuuvoq.

Tikeraarnissaraluallu taamaatiinnarneqarluni. Taassuma saniatigut Jeff Landryp Kristian Jeremiassen koorbut festivaliannut, New Orleansimi pisussamut aamma qaaqqunikuugaluarpaa, pilersaarut aamma taanna taamaatiinnarneqarnikuuvoq. 

Taamaatitsinerit kingorna Jeff Landrymik attaveqarnini unitsissimallugu Kristian Jeremiassenip oqaluttuaraa. Maannali nunarput, Danmark USA-lu atsioqatigiissuteqareersullu attaveqatigeeqqilersimapput.

- Trump atsioreerpoq tiguarniarnata, suleqatigivarput, Kristian Jeremiassen Sermitsiamut oqarpoq. 

Taanna USA-mut qanillattoqqilertuni kisimiinngilaq.

Ilisimatusarfiup USA-mi ilisimatusarfinnik suleqateqarnini pisut sakkortusineranni unitseqqasinnarlugu suleqateqaqqilernissartik isumaliutersuutigileqqissimallugu, Ilisimatusarfiup rektoriata Mari Kleistip Videnskab.dk-mut oqaluttuaraa. 

Takornariaqarnermut sunniuteqarnissaa neriuutigaa 

Jeff Landryp, ukioq maajimi Nuummut tikeraartup, qaqugu Qasigiannguanukarnissaa suli ullulerneqarsimanngitsoq Kristian Jeremiassenip oqaluttuaraa. Qimussernissaali pilersaarutaammat tikeraassaguni ukioru tikeraarnissaa ilimanarpoq.

Jeff Landryp Nuummut maajimi Future Greenlandertoqarnerata nalaani tikeraarnermini Nuummi borgmesteriusimasoq Nikolaj Heinrich ilaatigut pulaarpaa. Nuummiinnerani ilassisimanagu Kristian Jeremiassenip oqaatigaa.

- Aggeqqunikuuarput, uagut kulturitsinnik takutinniarparput. Aggerusuppoq, aamma aggissooq, taanna qularnanngilaq. Qimusseriarusuppoq, Kristian Jeremiassen oqarpoq. 

Trumpip nunatsinnut immikkut ittumik aallartitaanik tikeraarteqarnissaq Qasigiannguani inuussutissarsiornermut iluaqutaassasoq Kristian Jeremiassenip neriuutigaa. 

- Inuussutissarsiornikkut sunniuteqassooq, aamma takornariaqarnikkut. Tusagassiortunik malinnaaffigineqartussaavoq, taamaattumik pingaartorujuuvoq uatsinnut, taanna oqarpoq.

Jeff Landry toqqaannartumik, aammali atorfilittaatigoorlugu attavigalugu Kristian Jeremiassenip oqaluttuaraa. 

- Uannut pingaarnerpaanikuuvoq inuppalaarnera. Nunatsinnut soqutiginninnera attavikkuminarneralu, Kristian Jeremiassen naggasiivoq. 

qasigiannguit jeff landry inuiaqatigiit usa takornariaqarneq kristian jeremiassen

Atorfiit tamaasa takukkit

PODCASTI

Powered by Labrador CMS