Jørgen Boassen: – Politikkimik suliaqarnissara nutaamillu partiiliornissara mattutinngilara

Amerikamiut præsidentiata republikanerineersup Donald Trumpip Kalaallit Nunaata pisiarinissaa pillugu kissaateqarnikuunera, kiisalu sakkulersorluni nunatsinnik tiguaasinnaanerup periarfissaasinnaanera pillugu oqaaseqarnikuunera, Kalaallit Nunaata Amerikallu akornanni politikkikkut attaveqatigiinnerup ajorseriarneranik kinguneqaannarani aammali inuiaat kalaallit amerikamut isiginnittaasiannik allannguilluinnarpoq.

Piffissamilu Kalaallit Nunaata Amerikallu akornanni pissutsit najummannartorsiorfianni Donald Trumpimik illersuineq inuttut akisusimaqisoq, Jørgen Boassen, Nuummi najugaqartoq oqarpoq.

Taanna akuttunngitsumik inuit attaveqatigiittarfii atorlugit Donald Trumpimik amerikamillu tapersersuisuunini pillugu saqqummiussisarpoq, qaammatinilu kingullerni danskit naalagaaffiata Kalaallillu Nunaata suleqatigiinnerat arlalitsigut sakkortuumik isornartorsiortarlugu. Politikkikkut pissutsit pillugit isummertarnini pillugu annertuumik isornartorsiorneqartaraluarluni, piffissami kingullermi tapersersuisut amerliartortut politikkimullu pulanissaminut kaammattorneqartarluni taassuma oqaatigaa.

Siorasaarinerit

Siorna novemberimi Amerikami præsidentimut qinersisoqarneranut atatillugu Donald Trumpimut tapersersuiartorluni Jørgen Boassen USA-miippoq, taassumalu kingorna piffissaq annertooq Donald Trumpimut tapersersuinermut atulersimallugu oqaatigaa, tamannalu pillugu inuttut malersorneqarnini sakkortusiartorsimasoq erseqqissaatigaa.

- Toqumik imaluunniit unatarneqarnissamik siorasaarneqartarnera sakkortusiartuinnarsimavoq, soorlu issaq imerniartarfiit ilaanniitillunga tununninngaanniit sakkortuumik tillunneqarpunga.

- Inuit isumaqartarput ersitinneqarsinnaasunga, kisianni inuiaat kalaallit nunarpullu pillugit isummersornissannut ersitinneqarsinnaanngilanga, taanna oqarpoq.

Qaammatilli kingulliit ingerlaneranni inuit amerliartuinnartut tapersersuilersimasut Kalaallit Nunaata USA-llu qaninnerulernissaannik sorsuuteqartoq erseqqissaavoq.

Tapersersuineq annertusiartortoq

Inuit amerliartuinnartut danskit naalagaaffiata aamma Kalaallit Nunaata akornanni pissutsit apeqqusertalersimagaat Jørgen Boassen isumaqarpoq.

- Kalaallit nunaminni maannakkornit annertunerusumik oqartussaassuseqalernissaat pillugu oqariartuuteqartarnikka inunniit amerlanerujartuinnartunit paasineqaleriartortut malugisinnaavara.

- Inuppassuit uanga nalusakka danskit naalagaaffianniit eqqunngitsumik pineqarsimasutut misigisimasut ullut tamaasa saaffigisarpaannga, tamannalu soorunami sulininni nukissamik tunisisarpoq.

- Inuit attaveqatigiittarfiisigut sakkortuumik saassutarineqartarpunga, kisianni uannut tapersersuisut ullut tamaasa amerliartorput. Aammali inuit ilaasa allaffigisarpaannga tapersersorlunga, kisiannili suliffimminni soraarsitaanissartik ernummatigalugu tapersersuinerminnik isertuussisariaqarlutik, taanna oqarpoq.

Amerikamiu inuussutissarsiornermik suliaqartoq aamma peqatigiiffimmik Kalaallit Nunaata Amerikallu qaninnerulernissaannik suliaqartumik American Daybreak-imik ingerlatsisoq Tom Dans qanimut suleqatigalugu, kiisalu naalakkersuinermik suliaqartut Repræsentanternes Hus-imeersut ilai saaffiginnittartut Jørgen Boassenip naqissuserpaa. Taassuma saniatigut politikkimik suliaqartoq Donald Trumpimillu illersuisoq Charlie Kirk ukiarmi aallaaneqarluni inuartarineqartoq ikinngutigilluarsimallugu taassuma erseqqissaatigaa.

Illaruaatigineqartartoq

Jørgen Boassen siorna novemberimi Donald Trumpimut illersuiartorluni USA-meereernermi kingorna nunani allani tusaamaneqarlualerpoq, tamannalu aqqutigalugu nunani allani naalakkersuinermik sulialinniit aggersarneqartarluni erseqqissaatigaa.

- Inuiaat kalaallit massakkut qanoq inissisimanerat pillugu nunani allani oqalugiaraangama tusarnaartut ataqqinnittumik pissusilersortarput, tamannalu assut tupigusuutigisarpara paasillugu sunaaffa naligisutut aamma pineqarsinnaalluta.

- Danmarkimi qallunaarparujussuit aamma tapersersorpaannga, kisiannili nunatsinni politikkimik suliaqartut amerlasuut taamatut saqqumertarnera pillugu illaruaatigiinnartarpaannga.

- Danskit naalagaaffiata Amerika ukiorpassuarni suleqatigereerpaa, taamaattumillu uagut Amerikamut ersissutissaqarata erseqqissaatigisarpara, taanna oqarpoq

Jørgen Boassenip nammineq isumaa naapertorlugu ersiorneq aporfiginagu nunanik allanik suleqateqarnissaq siunertaralugu politikkikkut ingerlariaqqinnissaq pingaaruteqarpoq.

Politikki mattutinngikkaa

Jørgen Boassenip politikeriunani siornatigut arlaleriarluni oqaatigisarpaa, piffissalli ingerlanerani tassunga tunngatillugu isumaa allanngoriartorpoq.

- Partiimut aalajangersimasumut ilaasortaanangalu pituttorsimanngilanga, kisianni suliakka politikkimut tunngasorujussuupput.

- Taamaattumik politikkimik suliaqarnissara nutaamillu partiiliornissara mattutinngilara. Sulialli oqimaattut pillugit partiit kikkut suleqatigerusussaneraannga apeqqutaavoq.

- Partiimik nutaamik nunanik allanik suleqateqarnissamut periarfissanik ammaassinissamut anguniagaqartumik pilersitsinissannut kaammattorneqartarpunga, taannalu nalilersugasannut ilaavoq, taanna oqarpoq.

Inatsisartunut ilaasortaq Per Berthelsen, Demokraatit, aamma Jørgen Boassen, tallimanngormat Nuummi neriniartarfiit ilaata silataani oqqannerat politiinit misissuiffigineqartoq una sapaatip akunnera nalunaarutigineqarpoq.