Kalaallit Nunaanni innuttaasut aatsaat taama amerlatigaat — nunasisut suli amerliartorput

Nuummi innuttaasut maanna 20.384-iupput, tassa siorna ullormut tassunga sanilliullugu 299-inik amerlanerullutik, Naatsorsueqqissaartarfik ilisimatitsivoq.

Naatsorsueqqissaartarfiup innuttaasut pillugit kisitsisit nutaat saqqummiuteqqammerpai 'Ukiup qiteqqunnerani innuttaasut aatsaat taamak amerlatigipput'-mik qulequtserlugu.

Kisitsisit naapertorlugit juulip aallaqqaataani 2026-mi inuit 56.945-t nunami najugaqarput — 114-inik ukiup siulianut sanilliullugu amerlanerullutik.

Naatsorsueqqissaartarfimmiit aamma allaaserineqarpoq ukiup ataatsip ingerlanerani Asiami inunngortut 283-inik amerleriarsimasut, tassa 1.881-iniit 2.164-inut.

Kalaallit Nunaanni inunngortut siornamut sanilliullugit 188-inik ikinnerupput, Danmarkimilu inunngortut pingasunik ikileriarlutik 3.941-iupput.

Innuttaasut amerlassusaat kingumut qiviaraanni 2021-mi 56.653-iupput. Tassa 300-ngajaanik taamanerniilli amerleriarsimallutik. Innuttaasut Kalaallit Nunaanni inunngorsimasut 2021-mi 50.495-iupput. Maannakkut 49.697-iupput. Tassa inuit 798-inik ikileriarput.

Naatsorsueqqissaartarfiup saqqummersitamini nutaami Nuummi ineriartorneq aamma maluginiarpaa, maannakkut tassani inuit 20.384-iupput, tassa siorna piffissamut tassunga sanilliullugu 299-inik amerlanerullutik.

Kisitsisilli nutaat saqqummiunneqarnerannut atatillugu naatsorsueqqissaartarfik ima oqaaseqarpoq:

– Innuttaasut kisitsisitigut paasissutissaat CPR-imi nalunaarsuutinik, piffissami pineqartumi Kalaallit Nunaanni innuttaasunik inunnut nalunaarsuiffimmi nalunaarsuiffiusimasumik, tunngaveqarput. Eqqumaffigineqassaarli innuttaasut Naalagaaffeqatigiinnerup avataanut nuussimasut paasissutissaannik nalunaarsuinerit kingusinaarajuttarnerat. Tamannalu peqqutaalluni innuttaasut nunani allani innuttaassusillit kisitsisitigut paasissutissani amerlassusaat piviusumit amerlanerusinnaasarput, Naatsorsueqqissaartarfik allappoq.