Kalaallit Nunaanni Politiit kaammattuipput: Imminut toqunneq aqqutissaanngilaq
Inuit arfinillit sapaatip akunnerata naanerani kingullermi imminut toqunniarlutik aalajangersimapput. Kalaallit Nunaanni Politiit taama nalunaaruteqarput, aammali piffissani artornartuni ikiortissarsisoqarsinnaammat erseqqissarpaat.
Kalaallit Nunaanni politiit sapaatip-akunnerata naanerani arfinilinnik toqutsisimasutut misissuipput.
Assi: Oscar Scott Carl
Kalaallit Nunaanni
Politiit maanna juulli sioqqullugu sapaatip akunnerata naanerani, illoqarfinni
nunaqarfinnilu arlalinni orniguttarsimapput, inuillu katillugit arfinillit
alianartumik imminut toqussimasut isumagisarsimallugit.
TUSAANNGA
Imminut toqunnissamik eqqarsaateqaruit eqqarsaatitit pillugit Tusaannga attavigisinnaajuaannarpat.
Kinaassutsit isertuullugu ulloq unnuarlu akeqanngitsumik sianersinnaavutit. Oqarasuaat: 80 11 80. SMS: 1899.
Ullut pineqartut
tassaallutik tallimanngorneq decembarip 19-iat, arfininngorneq decembarip 20-at
aamma sapaat decembarip 21-at. Imminut toqunnerit imminnut
attuumassuteqanngitsut nunamilu tamarmi pisimasut, politiit tusagassiuutinut
nalunaarumminni allapput.
Ikiortissarsisoqarsinnaasoq
- Kalaallit Nunaanni
Politiit ilaatigut peqqissutsimik isumaginnittut imminut toqunnissamut
pinngitsoortitsiniarlutik suleqatigisarpaat, tamatumalu saniatigut imminut
toqunnerit, imminut toqunnissamik sioorasaarinerit aamma imminut
toqoriaraluarnerit misissortarlugit, pinerluttoqarsimannginnera
qulakkeerniarlugu imminullu toqunniarlutik sioorasaarisartut imminnut allanillu
navianartorsiortitsinnginnerat qulakkeerniarlugu, politiit allapput.
Imminut toquttarneq
inuiaqatigiinni ajornartorsiutaasoq, Kalaallit Nunaanni Politiit
erseqqissarpaat. Nunatsinni imminut toquttartut ukiumut 40-50-it
missaanniittarput.
Politiit imminut
toqunnissamik eqqarsaateqartartut maanna kajumissaarpaat, inuuneq qineqqullugu
ikiortissarsiorlutillu, aamma ikiorneqarnissamut periarfissat pillugit
paasissutissiipput:
- Imminut
toqunnissamik eqqarsaateqaruit imaluunniit ilisarisimasat imminut toqunnissamik
eqqarsaateqarpat, taava eqqaamajuk politiinut aamma peqqissutsimik
isumaginnittunut ikiortissarsiortuaannarsinnaagavit. Tusaanngamut
sianersinnaavutit normumut 80 11 80-imut (akeqanngitsumik kinaassutsinnillu
isertuussillutit). Aamma 1899-imut SMS-ersinnaavutit imaluunniit
siunnersuisartumik taakkua nittartagaanni chat-eqateqarsinnaavutit, politiit
allapput.
