Kalaallit Nunaanni Politiit toqusoqarnerani pissutsit pasinarsinnaanerat pillugu Danmarkimiit ikiortiserinnipput

Maniitsumi toqungasut marluk pillugit pasinartoqarnerani politiit annertoorujussuarmik misissuinermik ingerlataqarput. Misissuinermut atatillugu Danmarkimiit ikiortissanik noqqaasoqarpoq.

Pisumi inuit allat iliuuseqarsimanissaat takussutissaqanngitsoq, taamaattumillu Maniitsumi innuttaasut immikkut iliuuseqartariaqanngitsut, Kalaallit Nunaanni Politiit paasissutissiipput.

Foto: Oscar Scott Carl

Hanna Hviid Hanna Hviid Tusagassiortoq

Saqqummersinneqarpoq 8. Juuli 2026 - 13:08

Inuit marluk Maniitsumi ataasinngornermi toqungasut nassaarineqarput. Suliaq pasinartoqartutut politiinit paasiniarneqarluni suliassanngortinneqarpoq.

Politiit annertuumik misissuipput toqusullu timaannik misissueqqissaartartoq pinerlunnermilu atortunik ilisimasalik Danmarkimit ikiuukkiartortussatut aggersarneqarput. Ikiuuttussat sapaatip akunnerata ingerlanerani tikinnissaat naatsorsuutigineqarput.

Kalaallit Nunaanni Politiit taama tusagassiorfinnut nalunaaruteqarput.

Ussassaarut

- Misissuineq suli ingerlavoq, maannakkullu toqusut pillugit annertunerusumik paasissutissiisinnaanngilagut. Allalli pisumi peqataasimanissaat ilimanaateqanngilaq, taamaattumik Maniitsumi innuttaasut immikkut iliuuseqartariaqarnerat pissutissaqanngilaq, vicepolitiinspektør Malik Sandgreen oqarpoq.

Kalaallit Nunaanni Politiit suliamut tunngatillugu allanik oqaaseqarsinnaanngillat.