Kalaallit Nunaannut aallartitaq toqqarneqaqqammisoq: Allap nutaa tigunianngilarput

USA-p Kalaallit Nunaanut immikkut aallartitaatut toqqarneqaqqammisoq, Jeff Landry naapertorlugu USA ”iserluni tiguaanianngilaq allalluunniit nunaanik” tigusiniarsariniarnani.

Taama Landry pingasunngornermut unnuaani TV-eqarfimmi Fox Newsimi tv-kkut aallakaatitassiamut ”The Will Cain Show”-imi oqarpoq.

USA-p præsidentiata Donald Trumpip sapaatip akunnerani matumani siusinnersukkut Louisianami guvernørimik republikaneriusumik toqqaanerata kingorna, aatsaat Landry sivisunerusumik apersorneqarpoq.

- Nunatut kiinnerartuujuarsimavugut. Nunamut allamut iserluta tiguaaniartanngilagut allalluunniit nunaanik tigusiniartuunata. Kiffaanngissuseq aningaasaqarnikkullu nukimmut sinniisuuvugut. Illersuinermut sinniisuuvugut, Landry oqarpoq.

Landry qanoq danskinut oqaasissaqarnerluni aperineqarami, aallartitaq toqqarneqaqqammisoq ima akivoq:

- Inunnik Kalaallit Nunaanni najugaqartunik – kalaallinik – tamanna oqaloqatiginnissutigisariaqarparput.

- Sunnaana ujartoraat? Periarfissanik sunik tunineqarsimanngillat? Sooq illersorneqartariaqarnermissut illersorneqarsimanngillat, Landry tv-kkut aallakaatitassiami aperivoq.

Donald Trumpip siullermeerluni præsidentiunermini 2019-mi Amerikamiut Kalaallit Nunaannik piginnittuunissaat oqaluuserisalerpaa.

Ukioq manna januaarimi aappassaanik præsidentitut neriorsuisinneqalernissaani qaammammik sioqqullugu, immikkoortoq oqaaseqarfigeqqippaa.

- Russit aqqartartui Kalaallit Nunaannik kaaviiaarinnittuarput. Kiniserit nunarsuup kitaani nunani aatsitassanik qaqutigoortunik qalluiuarput. Tassanngaannarlu Donald Trump

qinigaavoq, taassumalu Monroep oqariartuutaa piviusuunerarpaa, Landry Fox Newsimut oqarpoq.

Monroep oqariartuutaa Amerikamiut nunanut allanut politikimut oqariartuutigaat 1823-meersoq, taannalu Amerikap avannarliup kujalliullu pissaanilissuarnit allanit akuleruffigineqarnatik Amerikamiunit soqutigisaqarfiuneranik naatsumik oqaatigalugu imaqarpoq.

- Taamanikkut Europap Kalaallit Nunaat sumiginnaqqavaa. Kalaallit Nunaalluunniit tamakkiisumik EU-mut ilaasortaanngilaq. Manna Kalaallit Nunaata USA peqatigalugu aningaasaqarnikkut nerrivimmut issianissamut qaaqquneqarnissaanut periarfissaavoq, Landry oqarpoq.

Kalaallit Nunaat taamanikkut EF-iusumit 1985-mi anivoq.

/ritzau/