Kalaallit Nunaannut tapiissutit appasinnerat sakkutuunit naammagineqanngitsoq

Sakkutuut Kalaallit Nunaanni suliaqarnerminni tapiissutigisartagaat annikitsuararsuaq naammaginngikkaat, Berlingske allappoq.

Konstabelit Kalaallit Nunaanni suliassaminnik suliaqaraangamik ullormut 1.200 koruuninik tapeqartinneqartarput.

- Sulisutut akikittutut misigivugut, Carl Emil Alsing Kongsmark, Slesvigske Fodregimentimi sakkutuunut oqaaseqartartoq oqarpoq.

Oqallinnermi sakkutuunngorniat inissisimaffiat naammattumik nassuiarneqarsimanngitsoq ersertoq, naalagaaffiit pissusiinik ilisimatusarnermi professori Mikkel Vedby Rasmussen isumaqarpoq.

Sakkutuut aallartitat akissarsiaat misissorneqaleruttortut, Illersornissamut ministereqarfik Berlingskemut ilisimatitsivoq.

Sakkutuut Arctic Endurance-mut sungiusarnermut peqataajartorlutik Kalaallit Nunaannut aggustimi aallartut, Illersornissaqarfiup juunimi uppernarsarpaa.

- Sakkutuut pisussaaffilerneqarsimasut suliassanik aalajangersimasunik Kalaallit Nunaanni suliaqarsinnaanissaannut taamatullu sakkutuut sakkutooqatigiivisa akiuussinnaanerannik pitsanngorsaanissamut peqataasinnaanerat nuannaarutissaavoq, illersornissamut ministeri Jeppe Bruus (S) taamanikkut oqarpoq.