Qaqortumi tillinniarnerit imaaginnartut, politiit immikkut ukkatarinnipput

Qaqortumi pisiniarfik ataasinngornermi juulip 27-ani unnuakkut tillinniarfigineqarpoq, tillinnianit igalaaq aserorneqarpoq, arlariinnillu, ilaatigut karsi 10.000 koruunit missaannik imalik tillittoqarpoq.

Pisiniarfimmut tillinniarluni isertertoqarnerata saniatigut Qaqortumi tillinniarfigineqartut arlaqarput. Assersuutigalugulu Qaqortumi tillinniartoqarneranik ataasinngornermi juulip 27-ani politiit nalunaarfigineqarput.

Paasiniaanermut aningaasarpassuit atorneqartut Politiit oqarput:

- Ilisimavarput suliat taamaattut innuttaasut toqqissisimanerannut sunniuteqartartut, taamaattumillu misissuinerit ukkatarineqarput.

- Suliamut aningaasarpassuit immikkoortinneqarput, misissuinerli suli ingerlasoq eqqarsaatigalugu suliaq pillugu maanna oqaaseqarsinnaanngilagut, Kalaallit Nunaanni Politiit Sermitsiamut allakkatigut akissuteqarlutik ilisimatitsipput.

Illoqarfimmi takussaanerunissaq pingaartinneqartoq aamma Kommune Kujallermi pinerlunnermik pinaveersaartitsinermullu oqartussat qanimut suleqatigineqartut, politiit nangillutik allapput:

- Innuttaasut toqqissisimanissaat pingaarnerpaatipparput. Taamaattumik illoqarfimmi ersarinnerulernissarput innuttaasunillu oqaloqateqarluarnissaq immikkut pingaartippavut. Tamatuma saniatigut Qaqortumi pinerlunnermik pinaveersaartitsinermut tunngatillugu Kommune Kujalleq suleqatigisartakkallu allat qanimut suleqatigaavut.

Innuttaasut juulip 27-ani tillinniarnerit pillugit ilisimasallit, politiinut saaffiginninnissaat kajumissaarutigineqarpoq.

Qaqortumi tillinniartoqaqqittoq sapaatip-akunnerata naanerani kingullermi nalunaarutigineqarpoq, Brugsenip igalaava aserorlugu iluatsinngitsumik sapaammi ullaaralaakkut iserniartoqarsimagaluarpoq.