KL

DK

Imarsuaq eqqaamaviuk

Ina Rosingip suliai nutaat Ilulissani Eqqumiitsulianut Katersugaasivimmi aggustimiit saqqummersinneqassapput. Eqqaamasat, nammineq misigisat, peqatigiit aamma piffissaq toqqorneqarsimasoq eqqumiitsuliaani sammineqarput.

Ina Rosingip qalipagaasa nutaat ilaat, taanna Ilulissani Eqqumiitsulianik Katersugaasivimmi aggustip 15-ianiit saqqummersinneqartussat ilagaat.
Trine Juncher Jørgensen TUSAGASSIORTOQ / TUSAGASSIORTOQ
Saqqummersinneqarpoq

Danskinit kalaallinillu kingoqqisoq eqqumiitsuliortoq Ina Rosing, Ilulissani Eqqumiitsulianik Katersugaasivimmi aggustip 15-ianniit oktobarip 15-iata tungaanut saqqummersitsissaaq.

Nunap assinganik qalipakkat, assit pappiaqqamullu suliat inuttut misigissutsinut piffissamullu aalajangersimasumut tunngassuteqartut saqqummersinneqassapput.

Imeq eqqaamasanik nassatalik

Ina Rosingip eqqumiitsuliamini kuup ingerlaarnera sarfanngortutullusooq ililluni suliaminik atassusiisoq allappoq.

"Saqqummersitani allakkanilu imeq eqqaamasanik nassataqartutut pisarnera ersersinneqarpoq - ilaat sermimi qerisimasut allallu sermip aanneraniit siammarternerat. Sermip aakkiartornera, immap qaffakkiartornera Europamilu siallernera Kalaallit Nunaata nunarsuup sinneranut attaveqarneranik malitseqarpoq, tamannalu pissutigalugu nunap inoqqaavisa inuup pinngortitallu ataqatigiinnerannik isiginnittaaseqarnerannut takussutisseeqataalluni. Taamaattoqarsinnaanerata eqqunnginneraannarsinnanera nassuerutigiartuuaalerparput".

Ilulissanut uterneq

Ina Rosing ukiut ingerlaneranni assigiinngitsorpassuarnik suliaqartarpoq, arlaleriarlunilu nammineq saqqummersitsisarluni.

– Takorluukkanik eqqarsaatinillu siornatigut qalipaasarnikuuvunga. Nunarsuarmi pissutsit sakkortuumik oqimaaqatigiikkunnaarnerata nalaani ukiuni makkunani pinngortitaq kisiat, oqalutsikkumavara sapinngisamillu akuliuffiginaveersaarlugu – taamaattumik qalipakkakka kusanartuupput kusanaatsorujussuullutik, Ina Rosing oqarpoq.

Ilulissani Eqqumiitsulianik Katersugaasivimmi saqqummersitaminik ilaqutariit oqaluttuarisaanerat, ataataata eqqumiitsuliortup Jens Rosingip 1925-mi palasip illuani inunngorfianit aallartittoq, taassuma uterfigaa.

"Naartunermi ilormioq kipineqarani, pooqarluni inunngorpoq, tamannalu ileqqutoqaat naapertorlugit angakkussaatut isumaqarpoq, anersaatut pissaaneqartussatut nammineq aalajangersimasoq. Aatama palasiusup tamanna tulluusimaarutigisarpaa oqaluttuariuarlungulu. Taamatut Inuit, Europamiullu kulturiannut marloqiusamik attaveqalerpunga. Tamannalu ataatama inunngornerani aallartinngilaq, ilaquttamali oqaluttuarisaaneranni sivisuumik atuuppoq."

"Saqqummersitanni nunarsuarmut isiginnittaatsit marluk taakkua naapinnerat ersersinneqarpoq, soorluttaaq Kalaallit Nunaanni pinngortitaq isummertariaatsini pingaarnerpaasartoq“

Ilulissani Eqqumiitsulianik Katersugaasivimmi aggustip 15-ianni ammaanersiortoqassaaq, Ina Rosingillu suliai oktobarip 15-iata tungaanut takuniarneqarsinnaassallutik. Saqqummersitsineq Nuna Fondenimiit aningaasaliiffigineqarpoq.



ina rosing kulturi imeq saqqummersitsineq eqqaamasat ilulissat eqqumiitsulianik katersugaasivik

Atorfiit tamaasa takukkit

PODCASTI

Powered by Labrador CMS