Nunatta uagullu inuiattut sammineqarnerujussuarput
arajutsiuminaappoq.
Nunarsuup assingani kusernertut qaqortuinnannguatut
inissisimajunnaarpugut. Nunarput pisoqarfinngoriataarpoq pingaartoq! Misigisaq
immini ataatsikkut alutornassuseqarlunilu quilertanartoq.
Nunatta uagullu inuiattut sammineqarnerujussuarput
arajutsiuminaappoq.
Nunarsuup assingani kusernertut qaqortuinnannguatut
inissisimajunnaarpugut. Nunarput pisoqarfinngoriataarpoq pingaartoq! Misigisaq
immini ataatsikkut alutornassuseqarlunilu quilertanartoq.
Nunarsuatsinni pisimasunut kateriffiit
taakkuujuaannangajattuupput avatitsinni allani pisut. Pisimasunummi kateriffiit
tassaasarmata suut pingaarutillit soqutiginartullu susoqarfii. Ulloq manna
tikillugu taassumarsuup, taakanngaaneersup Trumpip kisiivimmi naluvaa kina Hr.
Jens Frederik Nielseniunersoq.
Nunatsinnik ukkassinermi sakkuaakkusuttup
inornaraluassusersua.
Sapiitsut
USA-mit soqqusaatsumik nakkunneqarnitsinni politikkikkut
kulturikkullu Danmarkimit, Frankrigimit, Europamit, Canadamit nunanillu
avannarlernit tapersersorneqarnerujussuarput qujamasunnaqaaq.
Allaat
tusaamasarsuit Neil Young (teach your children il.il.) aamma Viggo Mortensen
(Ringenes herremi Aragorni) tapersersuinerujussuartik takutippaat.
Tipaatsunnaq! Tamanilli nersortariaqartutut taasariaqarpoq folketingimut
ilaasortaq, qasusuitsoq Aaja Chemnitz Larsen. Naliitsuuvoq! Suliamigut
nersortariaqarpoq. Nalunngilara allarpassuaqartoq suleruloortunik, kisianni
Aaja Chemnitzip sulinerata iluaqusersungaarpaatigut.
Taannami eqqissiivilluni
tunngavilersuilluarlunilu sassartarpoq, iluaqutissatinnillu aalliulluta –
aningaasaliissutaannanngitsunik aammali inunnik tapersersortissatsinnik
suleqateqarnermigut. Nersortariaqarpoq.
Tunngavissaq pitsak
Nunarput tassaanngilaq ”alianartut nunaat”,
pinngortitarsuarmit alianaalluinnartumit puugaq, ippassigami aviisimi
Kristeligt Dagbladimi isummersortup allassimaneratut, DR 1-imi
aallakaatitassiaq ”Issittumi annaassiniartartut” isiginnaareerlugit nunarpullu
tummaqqajarnikuunagu taama allaaserisaqarmat. Palasit ilisimasaqalaaratik
sorpajunnik allattut qaqutigooraluassusersui! Sørine Godtfredseniaa,
oqaluttuutilaannga nunarsuatsinniuna sumi alianartunik inunnillu
eqquisunik pisoqartanngitsoq. Sumi
tamaani alianartut pisarput, aamma Jeruusalaami, Nakskovimi Skivemilu.
Inuiattut ikilersugaasimaqaagut, sorsuuteqarluta
qiartalimmik. Amerlanerpaalli tassaapput inuit nukittuut, pitsaasumik
inuuneqartut ilinniagaqarsimasullu, nunatsinnik kiffartuussilluartuusut.
Inuusuttaqarlutalu utoqqartaqarpugut sapiillutik siunissallu isumalluarlutik
inuusunik, naak annaasaqartaraluaqalutik.
Nunami perorfigisatsinni ikilersugaasimavugut mamisartunik
paarilluagassanillu, allat piliaannik. Aamma immitsinnut
ikilersortuarnikuuvugut mamisagassanik, kinguaariit inuugaluartillugit.
Nunarput nammineq pitsaasumik tunngavissiorniarsaraarput inerikkiartortillugulu.
Taamaammat nikaginnittut atorfissaqartinngilagut. Amerlammatalumi.
Taamatulli oqareerluni oqarusunnarsivoq qaa nikutserta aat,
uppeqqajaanata. Oqartoqarnikuunngilaq suut tamarmik piuminartumik aaqqissasut.
Ataatsimooruttali patajaatsunillu anguniagaqarutta soorlu ajornavianngitsoq.
Paatsiveerusimaarnersuup nalaani suleruluttunut oqarusunnarpoq: Sapeeqaasi!
