– Kalaallit siunissartik namminneq aalajangersinnaanerat ataqqivarput

USA-p sinniisua Ken Howery siullerpaamik Kalaallit Nunaanniippoq.

Ukiumoortumik Joint Committeemi ataatsimiigiarnermini Hans Egedep Illuani Nuummiittumi pingasunngornermi ullaakkut qulingiluanngulersoq minutsit qulit missaanni tusagassiortunik katersortitsinermi oqaatigaa.

Sinniisoq ulloq taanna sioqqullugu illoqarfimmi pinngortitamullu takuniaalluni biilersimavoq. Tassani seqernup Sermitsiamut qinngornera takusimallugu eqqartorpaa – misigisaq kalaallit sooq nunaminnik tulluusimaarutiginninnerannik paasinnilersitsisoq. Perngaammik Nuummiinnera Kalaallillu Nunaanniinnera ersarippoq.

Nunanut allanut naalakkersuisoq Vivian Motzfeldt (S) aamma naalakkersuisoqarfiup pisortaa Mininnguaq Kleist sanianiipput. Aamma Amerikamiut nunanut allanut ministereqarfianni qaffasissumik atorfilik Brendan Hanrahan, USA-p Issittumi Europallu avannaani politikkianut akisussaasoq, peqataavoq.

Periarfissarpassuit

Ken Howeryp oqaaseqarnermini Kalaallit Nunaata USA-llu ukiuni 80-ini ikinngutiginnerat, suleqatigiinnerullu ingammik Amerikamiut Nuummi sinniisoqarfeqalernerannit ukiuni tallimani kingullerni pitsanngoriartuinnarsimanera erseqqissarpaa. Nammineq aalajangiisinnaassuseqarneq USA-mit ataqqineqartoq aamma oqaatigaa.

- USA-p kalaallit siunissaminnik namminneq aalajangiisinnaassuseqarnerat ataqqivaat, Ken Howery oqarpoq.

Niuerneq aningaasaliinerlu, ilinniartitaaneq kulturilu, aatsitassarsiorneq nukissiornerlu kiisalu ilisimatusarnikkut suli suleqatigiinnissamut periarfissaqarluartoq, sinniisoq oqarpoq.

- Issittumi najugaqartut siunissaat nukittullunilu isumannaatsoq pigissaarfiusorlu tapersersornissaa kissaatigaarput, Ken Howery oqarpoq.

Tusagassiortut saanni assammittut

Sinniisoq Naalakkersuisullu ataatsimiigiarniarlutik ingerlalertullu atorfilittaasa unitseriarlugit uteqqoriarlugit assammeqquaat. Tusagassiortut assiliisinnaaqqullugit taama peqquneqarput. Uterput, assiliiviit saanni assammipput - ingerlallutillu.

Ukioq ilivitsoq akuerineqarsinnaanngitsunik oqaaseqartoqartareersorlu tusagassiortut aperisinnaatitaanngitsut

Tusagassiortunik sivikitsumik katersortitsinermi apeqquteqarnissamik periarfissiisoqanngilaq. Taamaasilluni apeqqutit pingaarutillit arlallit — ingammik USA-p præsidentiata Kalaallit Nunaat pillugu ukiumi kingullermi oqaaserisartagai, Kalaallit Nunaanni akuerineqarsinnaanngitsutut ataqqinninngitsutullu isigineqartut — akissutisineqanngillat.

Apeqqutit suli akineqanngitsut

USA-miit assigiinngitsunk isummerfigineqartunik oqariartuuteqartoqartarnerata kingorna apeqqutit uku suli akineqanngillat:

USA-miit Kalaallit Nunaannut attaveqarnerup ataqqinninnermik, tatiginninnermik ammasumillu tunngaveqartileqqinniarlugu qanoq iliortoqarniarpa?

USA-p Amerikamut Avannarlermut periusissiaa nutaaq Kalaallit Nunaannut qanoq sunniuteqarpa? Amerikamiut Kalaallit Nunaanni politikkikkut, aningaasatigut sakkutooqarnikkullu peqataanerat annertusissava – qanorlu?

USA Kalaallit Nunaanni aatsitassarsiornermut, piiaanermut nukissiornermullu tunngatillugu qanoq inissisimaffeqarusuppa?

Apeqqutit taakku tusagassiortunik ullumi sivikitsumi katersortitsinermi sammineqanngillat.