USSASSAARUT
Kalaallit Tuluit Nunaanni ilinniarnissamut tapiissutinut qinnuteqarsinnaalerput
Kalaallit Tuluit Nunaanni universitetini ukioq ataaseq masterinngorniarnissamut Chevening-stipendiamut aningaasaliiffigineqarnissamik qinnuteqarsinnaalerput. Periarfissaq piginnaasanik, misilittakkanik nunanilu tamalaaniit Kalaallit Nunaata qanoq isigineqarneranik misilittagaqalernissamik aqqutissaavoq.
Assi: Mariam Inayat, British Embassy Copenhagen.
Periarfissaq manna Ilinniartitaanermut, Kultureqarnermut, Timersornermut Ilageeqarnermullu Naalakkersuisup Nivi Olsenip aamma Tuluit Nunaata Danmarkimut ambassadøriata Victoria Elizabeth Billingip 20. maaji 2026-mi suleqatigiinnissamik isumaqatigiissummik oqaluttuarisaanermut pingaarutilimmik atsioqatigiinnerisa malitsigaa.
Chevening tuluit naalakkersuisuisa siuttussanik nunanit tamalaaneersunik ilinniartitsinissamut aaqqissuussaanut ilaavoq. Tapiissuteqarsinnaaneq Naalakkersuisut, Tuluit Nunaata tuluillu aatsitassarsiortuisa Amaroq aningaasaliinissamik suleqatigiinnerisigut pilersinneqarpoq.
Tuluit Nunaanni universitetini aalajangersimasuni ukiumi ataatsimi kandidatinngorniarnissamut aningaasartuutit, angalanermut aningaasartuutit inuuniarnermilu aningaasartuutit Kalaallit Nunaannut tapiissut nutaaq aqqutigalugu matussuserneqarsinnaalerput.
Qinnuteqarnissaq ammareerpoq oktobarillu tungaanut qinnuteqaammik nassiussisoqartoqarsinnaalluni. Tuluit Nunaanni ilinniartut siulliit septembarimi 2027-mi aallartinnissaat naatsorsuutigineqarpoq.
Assi: Chevening.
Chevening Tuluit Nunaata nunat tamalaat akornanni pisortatigoortumik stipendiaqartitsisarneranut aaqqissuussaavoq. Aaqqissuussaq Tuluit Nunaata Nunanut Allanut Ministereqarfianit suleqatigisaannillu aningaasalersorneqarpoq. Siunissami aqutsisunngorsinnaasunut Tuluit Nunaanni ilinniaqqinnissamut kiisalu nunarsuaq tamakkerlugu attaveqaqatigiilernissamik periarfissiivoq.
Naalakkersuisoq: ”Periarfissaq immikkut ittoq”
“Qinnuteqartoqarsinnaalermat nuannaarutigaara. Kalaallit bacheloritut ilinniakkaminnik naammassinnissimasut Tuluit Nunaanni universitetit pitsaanersaasa ilaanni ilinniagaqaqqinnissamut, kiisalu nunat tamalaat akornanni attaveqaatinik pilersitsinissamut periarfissaq immikkut ittoq maanna atorluarsinnaavaat. Neriuppunga amerlasuut qinnuteqassasut, kingornalu ilisimasatik misilittakkatillu nutaat Kalaallit Nunaata ineriartortinneqarneranut iluaqutaasumik atussagaat,” Naalakkersuisoq Nivi Olsen oqarpoq.
Tuluit Nunaata Danmarkimi aallartitaa Victoria Billing soqutiginnittunik qinnuteqartoqarnissaanut kajumissaarivoq:
“Anguniagaqarusussusilinnik tunniusimasunillu Kalaallit Nunaanneersunik qinnuteqartoqassasoq qinnuteqartoqassasoq neriuutigaarput. Chevening tassaavoq siunissami aqutsisussanik, sumiikkaluarunilluunniit, piginnaasanik ineriartortitsinissaannik periarfisseerusuttoq. Nunani tamalaani periarfissaqarnerulernissaat nunarsuarmilu attaveqaqatigiinnermut asseqanngilluinnartumut peqalernissaat, namminnerlu sulinerminni aamma Kalaallit Nunaata siunissaanut iluaqutaanissaa anguniarlugu.”
Bacheloritut ilinniagallit ukiullu marluk missaanni suliffimmi misilittagallit qinnuteqarsinnaapput. Ilinniarfinni tamaneersut qinnuteqarnissaat kaammattuutigaarput, immikkulli sammineqartussat tassaapput piujuartsitsineq, avatangiisit pillugit, pinngortitaq, ingeniøritut ilinniarneq, mingutsitsinngitsumik teknologi, aningaasaqarneq, suliniutinut aqutsineq, assartuineq assartuinermilu ingerlatsineq.
Tuluit Nunaanni ilinniagaqarnerup saniatigut ilinniartut siunnersuinermik suliffimmilu misilittagaqalernissamik neqeroorfigineqassapput.
Assi: Victoria Health, Unsplash.
Kalaallit ilinniartut Tuluit Nunaanni universitetit pitsaanerpaat ilaanni, ilaatigut University of Cambridgemi assimi takuneqarsinnaasumi, ukiumi ataatsimi tamakkiisumik aningaasaliiffigineqarlutik masterinngorniarnissamik periarfissaqalerput.
Ilinniarnissamik tapiiffigineqartut ilisimasanik nutaanik nunanilu tamalaani attaveqaateqalerlutik utissapput
Cheveningimi ilinniartuunikut 60.000-init amerlanerusut nunanit 140-nit amerlanerusuneersut tapiiffiginikuuai, taamaalillutillu ilinniagaqartut nunarsuaq tamakkerlugu ilinniarsimasunik, aalajangiisartunik siunissamilu siuttussanik attaveqaateqalersarput.
Kalaallit Nunaanni aatsitassarsiornerup siuariartorneranut tapersersuinissamut najukkami piginnaasaqarluartunik ineriartortitsinissaq pingaartipparput
Tuluit Nunaanni aatsitassarsioqatigiiffimmi Amaromi pisortaaneq Eldur Olafsson oqarpoq. Suliffeqarfik taanna Kalaallit Nunaanni aatsitassarsiortoqarsinnaanerani periarfissanik piviusunngortitsiniartuullunilu Cheveningimut aningaasaleeqataasuuvoq.
Assi: Mariam Inayat, British Embassy Copenhagen.
Tuluit Nunaanni aatsitassarsiorfiup Amaqqup aningaasaleeqataanerani ilinniartitaanermut tapiissutit pilersinneqarput. Ambassadøri suliffeqarfimmilu Amaqqumi pisortaaneq Eldur Olafsson assimi takuneqarsinnaapput.
Aningaasanik tapiiffigineqartut ilinniakkamik naammassineraniit ukiut marluk qaangiutsinnagit Kalaallit Nunaannut uternissartik pisussaaffigaat, taamaalillutik ilisimasatik misilittakkatillu atorlugit sulisussanngussallutik. Aaqqissuussami taanna pingaaruteqartuusoq Victoria Billing oqarpoq:
"Kalaallit Nunaat ukiuni aggersuni pingaarutilinnik periarfissarpassuaqarlunilu unammilligassarpassuaqarpoq. Inunnut siunissamut ilusilersueqataasinnaasunut aningaasaliissuteqarusuppugut. Chevening-stipendiamik tapiiffigineqartut nutaanik isumassarsisimallutik, nunani tamalaani attaveqaateqalersimallutik piginnaasaqarnerulersimallutillu Kalaallit Nunaannut utissasut anguniagaraarput, taamaalillunilu nunamut iluaqutaasinnaasumik suliaqalissallutik".
Stipendia pillugu paasisaqarnerorusukkuit qinnuteqarniarlutilluunniit uunga iserit: www.chevening.org/scholarship/greenland/
Apeqqutit uunga saaffiginnissutigineqassapput Chevening.Greenland@fcdo.gov.uk.
Nittarsaassisoqarnermut aningaasaliissutit tunngavigalugit Danmarkimi Tuluit Nunaanni aallartitaqarfik suleqatigalugu saqqummiunneqartoq
