Kattuffik: Wangenheimip akisussaaffimi siusinaartumik iperassagaa kissaatiginanngilaq

- Anna Wangenheim Naalakkersuisutut sulilluarpoq, kissaatiginngilarput siusinaarluni tunuassasoq.

Navarana Johansen, Peqqinnissaq Pillugu Kattuffiit (PPK) siulittaasuat taama oqarpoq.

Peqqissutsimut Innarluutilinnullu Naalakkersuisup Anna Wangenheimip (D) marsip 24-ani Folketingimut qinersinissami qinigassanngortinniarluni tallimanngornermi nalunaarutiginninnera pillugu taama oqariartuuteqarpoq.

Tamatuma kingorna Naalakkersuisoq oqariartuuteqarpoq qinigaassaguni Inatsisartuni Naalakkersuisunilu ilaasortaajunnaarniarluni.

- Naalakkersuisuuneq ulloq tamaat suliffiuvoq, qinigaassagumalu soorunami naalakkersuisuujunnaassaanga, Anna Wangenheim Sermitsiamut sapaatip akunnera kingulleq oqarpoq.

- Toqqissisimallunga qimassavara, ukiummi kingulliup ingerlanerani peqqinnissaqarfiup aningaasaqarnerata sussaanngitsumik inissisimajunnaarnera qulakkeerpara.

Qineqqusaarnera arlalinnit isornartorsiorneqarpoq, ilaatigut naalakkersuisoqatigiinniittut Atassutip siulittaasua Aqqalu C. Jeremiassen Facebookimi allappoq naalakkersuisutut akisussaaffik “pimoorunneqartariaqartoq”.

Maanna peqqinnissaqarfimmi sulisut isumaat saqqummeraleruttorput.

- Soorunami akueraarput kikkut tamarmik tamat oqartussaaqataanerat aallaavigalugu politikkikkut qinigassanngortissinnaanerat, tamanna aamma Anna Wangenheimimut atuuppoq. Tamanna tamat oqartussaaqataaneranni pisinnaatitaaffiuvoq tunngaviusoq PPK-mi ataqqisarput, PPK-p siulittaasua Navarana Johansen Sermitsiamut allakkamini taama aallartippoq.

- Taamaakkaluartoq tupigusuutigisinnaavarput Peqqissutsimut Innarluutilinnullu Naalakkersuisuusup Folketingimut qinigassanngortinniarluni aalajangernera, nangippoq.

PPK: Suli suliassarpassuaqarpoq

Anna Wangenheim (D) Inatsisartunut siorna qinersisoqarnerata kingorna peqqissaasutut suliassat eqqartuinnarnagit pimoorussilluni sulilerpoq.

- Oqarsinnaavunga piffissaq ilungersunartoq qalliartorpoq, Anna Wangeheim aasaq peqqinnissaqarfik pillugu oqarpoq, taanna naapertorlugu ilisimasallit arlaqartut peqqinnissaqarfimmilu sulisut tatisimaneqangaatsiarput.

Sulisunik amigaateqarneq, sulisussarsiornermi ajornartorsiutit aningaasallu immikkoortinneqartut sipporneqartarnerat Wangeheimip suliassaasa pingaarnerit ilagaat.

Suliassat taakku ilaatigut Danmarkimik suleqateqarnerunikkut aaqqinneqassasut, oqaatigineqarpoq.

Tamanna ilaatigut kinguneqarpoq taartaasunik atorfinitsitsisarneq pillugu isumaqatigiissummik, tamannalu qulakkeerneqassasoq Danmarkimit Kalaallit Nunaanni peqqinnissaqarfimmi taartaasunik sulisussanik suliartortoqarnerulernissaanik ataavartumillu taartaasartunik atuilernikkut.

Tamatuma saniatigut februaarimi 2026-mut 185 millionit koruunit qulakkeerneqarput, taakkulu kalaallit napparsimasut Danmarkimut katsorsartikkiartortunut aningaasartuutinut matussusiissapput. Aningaasartuutit Danmarkimit akilerneqassapput.

Anna Wangenheimilli ukioq ataaseq atorfimmineereerluni ’eqqissisimalluni’ soraarnissaa PPK-p upperinngilaa.

- Suliffiuvoq ilungersunartoq suliassarpassuaqarlunilu, tamatumanilu sapinngisamik iliuuseqartuartariaqarpugut, siulittaasoq Navarana Johansen oqarpoq.

AAMMA ATUARUK

Peqqinnissaqarfik aningaasalersorniarlugu allannguinersuaq – aningaasaqarnerup aqunneqarnissaa misissoqqissaarneqassasoq

Sermitsiamut aamma erseqqissaatigaa "pingaaruteqarluinnartoq“ peqqinnissaqarfimmi aamma inuit innarluutillit pillugit sulinerup pimoorunneqarnissaa qineqqusaarnerlu peqqutigalugu tunulliunneqannginnissaa.

Peqqinnissaqarfimmi sulisut kattuffiata saniatigut Sermitsiap peqqinnissaqarfimmi aqutsisut Naalakkersuisup Folketingimut ilaasortanngoratarsinnaanera pillugu paasiniaaffigai.

Peqqinnissaqarfimmi aqutsisoqarfimmit allakkatigut ima nalunaaruteqarput:

- Peqqinnissaqarfimmi aqutsisut politikkimut tunngasut oqaaseqarfiginianngilai, tamatigullu peqqissutsimut naalakkersuisup aalajangersimasup killiliussaanut ilumoorfiginnilluta sulisarpugut.

Anna Wangenheim (D) qineqqusaarnissami nalunaarutiginerata kingorna ernumassutigineqartut pillugit qanoq isumaqarnersoq Sermitsiap attaveqarfigaa. Tamanna kingusinnerusukkut malitseqarumaarpoq.